ဇွန် ၁၉။

 

ရှမ်းပြည်တောင်ပိုင်း၊ ဆီဆိုင်မြို့နယ် လွယ်မောတောင်ဒေသ ထမ်းယံတိုင်ကျေးရွာအနီးမှာ စစ်တပ်က စစ်ကြောင်းထိုးလာတာကြောင့် နှစ်ဘက်တိုက်ပွဲဖြစ်ပွားခဲ့ပြီး စစ်ကောင်စီဘက်က သုံးဦးသေဆုံးခဲ့တယ်လို့ ပအိုဝ်းအမျိုးသားလွတ်မြောက်ရေးတပ်မတော်-PNLA ဆီက သိရပါတယ်။

 

ဇွန်လ ၁၈ရက်မနက် ၉ နာရီကနေ ၁၁ နာရီထိ နှစ်ဖက်ထိတွေ့တိုက်ပွဲဖြစ်ပွားခဲ့ပြီး စစ်ကောင်စီနဲ့လက်အောက်ခံ ပြည်သူ့စစ်​တွေက ထမ်းယံတိုင်ရွာအနီးမှာတပ်စွဲနေထိုင်နေကြတယ်လို့ ပြောပါတယ်။

 

ဒါ့အပြင် စာသင်ကျောင်း​တွေမှာ တပ်စွဲနေထိုင်တာကြောင့် ကလေး​တွေပညာသင်ယူရမယ့် အခွင့်အရေး ဆုံးရှုံးနေရတယ်လို့ ဆိုပါတယ်။

 

စစ်ကောင်စီနဲ့လက်အောက်ခံ ပြည်သူ့စစ်​တွေက ပြည်သူ​တွေကို တောင်ယာထဲမှာ တွေ့ခဲ့ရင်လည်း တော်လှန်ရေးတပ်ဖွဲ့ဝင်လို့ သတ်မှတ်ကာ ပစ်သတ်မယ်လို့ ခြိမ်းခြောက်ထားတယ်လို့ ဆိုပါတယ်။

 

"ခုစိုက်ပျိုးရေးရာသီဖြစ်ပေမယ့် လူတွေကမစိုက်ရဘူး၊ အရဲစွန့်စိုက်တဲ့သူ တဦးစနှစ်ဦးစပဲတွေ့ရတယ်၊ ရွာထဲကလူတွေလည်း မြို့တက်ပြီးပစ္စည်းမဝယ်ရဲကြတာတွေဖြစ်နေတယ်"လို့ ဆီဆိုင်မြို့ခံတဦးကပြောပါတယ်။

 

လက်ရှိအချိန်ဟာ စိုက်ပျိုးရာသီဖြစ်​ပေမဲ့ ပြည်သူ​​တွေ စိုက်ပျိုးရေးလုပ်ငန်းခွင် ဝင်ရောက်နိုင်ခြင်းမရှိသေးဘူးလို့ သိရပါတယ်။

 

ပအိုဝ်းအမျိုးသားလွတ်မြောက်ရေးတပ်မတော် (PNLA)နဲ့မဟာမိတ်တပ်တွေဟာ ၂၀၂၄ခုနှစ် ဇန်နဝါရီ ၂၁ ရက်က​နေ ဇွန် ၁၇ ရက်အထိ တိုက်ပွဲ ၁၂၆ ကြိမ် ဖြစ်ပွားခဲ့ပြီး စစ်ကောင်စီဘက်က ၄၀၀ ထက်မနည်းသေဆုံးခဲ့ကာ ဗိုလ်မှူးအဆင့် အပါအဝင် စစ်ကောင်စီတပ်ဖွဲ့ဝင် ၂၀ဦး နီးပါးကို ဖမ်းဆီးရရှိခဲ့တယ်လို့(PNLA)က ထုတ်ပြန်ထားပါတယ်။

 

ဓါတ်ပုံ-PNLA

 

Burma Associated Press