BAP၊ ဘာသာပြန်။

၂၀၂၁ ခုနှစ် အာဏာသိမ်းပြီးနောက်ပိုင်း ပထမဆုံးအကြိမ်အဖြစ် မြန်မာစစ်အုပ်ချုပ်ရေးက ရွေးကောက်ပွဲများ ကျင်းပလျက်ရှိရာ နိုင်ငံ၏ အကြီးဆုံးမြို့တော်တွင် နေထိုင်သူများမှာ စိုးရိမ်ပူပန်မှုများဖြင့် ပြည့်နှက်နေသည်။

 

ရန်ကုန်မြို့၏ အပေါ်ယံသွင်ပြင်မှာ ပုံမှန်အတိုင်း စည်ကားလှုပ်ရှားနေသကဲ့သို့ ရှိသည်။ မြို့လယ်ကောင်တွင် ခရီးသွားပြည်သူများသည် လမ်းဘေးဈေးသည်များကို ဖြတ်သန်းသွားလာနေကြပြီး ထီးများအောက်ရှိ စားသောက်ဆိုင်များတွင်လည်း လူများဖြင့် ပြည့်နှက်နေသည်။ လမ်းမများပေါ်တွင် ဘတ်စ်ကားများနှင့် ကားများ တိုးဝှေ့သွားလာနေကြသည်။ နေဝင်ချိန်တွင် လူငယ်များသည် ပန်းရောင်နှင့် အပြာရောင် ရောယှက်နေသော မိုးကုပ်စက်ဝိုင်းအောက်၌ တောက်ပနေသော ဆူးလေဘုရားကို နောက်ခံထားကာ ဓာတ်ပုံရိုက်ရန် ရပ်နားလေ့ရှိကြသည်။

 

စစ်တပ်က အာဏာသိမ်းပြီး နိုင်ငံ၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို ဖမ်းဆီးထိန်းသိမ်းခဲ့သည်မှာ ငါးနှစ်နီးပါး ရှိလာပြီဖြစ်သော်လည်း ဒေသခံပြည်သူများ၏ ဘဝမှာ တည်ငြိမ်မှုမရှိပေ။ စစ်ကောင်စီက ဒီမိုကရေစီနှင့် တည်ငြိမ်မှုဆီသို့ ပြန်လည်ဦးတည်ခြင်းဖြစ်သည်ဟု ကြွေးကြော်ထားသည့် အာဏာသိမ်းပြီးနောက်ပိုင်း ပထမဆုံးအကြိမ် ရွေးကောက်ပွဲကို မြန်မာစစ်အုပ်ချုပ်ရေးက ကျင်းပလျက်ရှိသည်။ ဇန်နဝါရီ ၂၅ ရက်တွင် အပြီးသတ်မည့် အဆင့်သုံးဆင့်ဖြင့် ကျင်းပသော အဆိုပါ လုပ်ငန်းစဉ်ကို ကုလသမဂ္ဂနှင့် အနောက်နိုင်ငံ အစိုးရများက အတုအယောင်ဟု ခေါ်ဆိုခဲ့ကြသည်။

 

“ကျွန်မတို့က အမြဲတမ်း ကြောက်စိတ်နဲ့ နေနေရတာပါ” ဟု ခရီးသွားအမျိုးသမီးတစ်ဦးက ခေတ္တရပ်နားကာ ပြောကြားသည်။ “[အာဏာမသိမ်းခင်က] ကျွန်မတို့မှာ အနာဂတ်အတွက် မျှော်လင့်ချက်တွေ အများကြီးရှိခဲ့တယ်။ အစိုးရကိုလည်း လုံးဝမကြောက်ခဲ့ဘူး။ အခုတော့ အားလုံး ပြောင်းလဲသွားပြီ။” ဟု ၎င်းက ဆိုသည်။

 

“ကျွန်မတို့ရဲ့ အသံတွေကို တခြားသူတွေကို လွတ်လွတ်လပ်လပ် မပြောရဲတော့ဘူး။” ဟု သူမက ဆက်ပြောသည်။ ရန်ကုန်လမ်းမပေါ်တွင် တွေ့ဆုံမေးမြန်းခဲ့သူ အားလုံးကဲ့သို့ပင် သူမသည်လည်း အမည်ဖော်ပြရန် သို့မဟုတ် အကြာကြီး စကားပြောရန် ဆန္ဒမရှိပေ။

 

၂၀၂၁ ခုနှစ် ဖေဖော်ဝါရီ ၁ ရက် အာဏာသိမ်းပြီးနောက် ဤလမ်းမများသည် ဒီမိုကရေစီ ပြန်လည်ရရှိရေး တောင်းဆိုသည့် ဆန္ဒပြသူများဖြင့် ပြည့်နှက်ခဲ့သည်။ စစ်တပ်က ဆန္ဒပြပွဲများကို အကြမ်းဖက်နှိမ်နင်းခြင်း မပြုမီအထိ တစ်နိုင်ငံလုံးတွင် သိန်းနှင့်ချီသော လူထု ချီတက်ခဲ့ကြသည်။

 

မတ်လကုန်တွင် လမ်းမများပေါ်၌ လူပေါင်း ၄၀၀ ကျော် သေဆုံးခဲ့ရပြီးနောက်ပိုင်း လူပေါင်းသောင်းနှင့်ချီ ဖမ်းဆီးခံခဲ့ရသည်။ အများစုမှာ ကျေးလက်ဒေသများသို့ ထွက်ပြေးတိမ်းရှောင်ကာ စစ်ကောင်စီဆန့်ကျင်ရေး တော်လှန်ရေးအဖွဲ့များကို ဖွဲ့စည်းခဲ့ကြပြီး ကိုယ်ပိုင်အုပ်ချုပ်ခွင့် တောင်းဆိုနေကြသည့် အတွေ့အကြုံရှိ တိုင်းရင်းသားလက်နက်ကိုင်အဖွဲ့များ၏ အကူအညီဖြင့် တိုက်ပွဲဝင်ခဲ့ကြသည်။ ၂၀၂၃ ခုနှစ်နှောင်းပိုင်းတွင် စစ်မီးသည် နိုင်ငံ၏ သုံးပုံနှစ်ပုံအထိ ပျံ့နှံ့သွားခဲ့သည်။

 

ရန်ကုန်မြို့သည် စစ်တပ်၏ နေ့စဉ်နှင့်အမျှ လေကြောင်းတိုက်ခိုက်မှုနှင့် ဒရုန်းဖြင့် တိုက်ခိုက်မှုများ ဖြစ်ပွားနေသည့် နိုင်ငံ၏ အခြားဒေသများရှိ ပြင်းထန်သော ပဋိပက္ခများနှင့် ကင်းကွာနေသော်လည်း အဆိုပါ တိုက်ခိုက်မှုများကို အရပ်ဘက်၊ စစ်ဘက် ခွဲခြားမှုမရှိသော တိုက်ခိုက်မှုများအဖြစ် နိုင်ငံတကာက အကြိမ်ကြိမ် ရှုတ်ချထားသည်။

 

သို့သော် မြို့ပြဘဝမှာ စိုးရိမ်ပူပန်မှုများဖြင့် ပြည့်နှက်နေသည်။ “ရန်ကုန်က အရင် ရန်ကုန်လို မဟုတ်တော့ဘူး။” ဟု အွန်လိုင်းတွင် ထင်ရှားသူ နှင်းစန္ဒာ(အမည်လွှဲ)ဖြင့် ပြောသည်။ “ရန်ကုန်က အရင်လို ပျော်စရာကောင်းတဲ့နေရာ မဟုတ်တော့ဘူး။”

 

“တက္ကစီပေါ်မှာ ဒါမှမဟုတ် ဘတ်စ်ကားပေါ်မှာတောင် နိုင်ငံရေးအကြောင်း မပြောဖို့ သူငယ်ချင်းတွေက သတိပေးတတ်ကြတယ်။ ဘာလို့လဲဆိုတော့ သူတို့က နားထောင်နေကြလို့ပဲ။” ဟု သူမက ပြောသည်။ နိုင်ငံရေးနှင့် မသက်ဆိုင်သည့် ကိစ္စများတွင်ပင် မိမိထင်မြင်ချက်ကို မပြောဘဲ တိတ်တဆိတ်ငုံ့လျှိုးနေခြင်းက ပို၍ ဘေးကင်းသည်ဟု သူမက ဆိုသည်။ “ကျွန်မ ထောင်ထဲမှာ နေနေရသလို ခံစားရတယ်။”

 

တစ်ချိန်က ဆိုင်များ၊ လမ်းမများနှင့် အစိုးရရုံးများတွင် တွေ့မြင်ရလေ့ရှိသော နိုင်ငံ၏ လူချစ်လူခင်အများဆုံး နိုင်ငံရေးသမား ဒေါ်အောင်ဆန်းစုကြည်၏ ပုံများကို ဖယ်ရှားခြင်း ခံထားရသည်။ လမ်းဘေးပလက်ဖောင်းများပေါ်ရှိ မီးစက်များသည် ပိုမိုဆိုးရွားလာသော လျှပ်စစ်မီးပြတ်တောက်မှုများကြားတွင် လုပ်ငန်းရှင်များက ကုန်ကျစရိတ်ကြီးစွာဖြင့် မည်သို့ ရုန်းကန်နေရသည်ကို သတိပေးနေသကဲ့သို့ ရှိသည်။

 

ညအချိန်တွင် လမ်းမများသည် တိတ်ဆိတ်ငြိမ်သက်သွားသည်။ နိုင်ငံ၏ နိုင်ငံရေးမတည်ငြိမ်မှုများမှ ခေတ္တလွတ်မြောက်ရန် လူငယ်အချို့သည် မူးယစ်ဆေးဝါးများ ပေါများနေသည့် ဘားများနှင့် ကလပ်များတွင် မိုးလင်းပေါက်အထိ နေထိုင်ကြသည်။ အများစုမှာမူ ဖမ်းဆီးခံရမည် သို့မဟုတ် အာဏာပိုင်များ၏ ခေါ်ဆောင်ခြင်းကို ခံရပြီး ပြင်းထန်သော ပြည်တွင်းစစ်တွင် စစ်မှုထမ်းရန် စိုးရိမ်ကာ အိမ်တွင်သာ နေထိုင်ကြသည်။

 

လမ်းပေါ်တွင် တစ်ဦးတစ်ယောက် ဖမ်းဆီးခံရသည့် သတင်းကို လူတိုင်းလိုလို သိရှိကြသည်။ ရန်ကုန်မြို့ခံ ကိုအောင်မိုး(အမည်လွှဲ) က ၎င်း၏ သူငယ်ချင်းမှာ ဖြတ်သန်းသွားသော တက္ကစီတစ်စီးပေါ်သို့ ဆွဲတင်ခံရပြီးနောက် ပျောက်ဆုံးသွားခဲ့ကြောင်း ပြောသည်။ “သူ့ကို ကားထဲဆွဲသွင်းပြီး မျက်စိကို အဝတ်စီးတယ်၊ ဖုန်းကိုသိမ်းပြီး သူ့မိသားစုဆီ ဖုန်းဆက်ခိုင်းကာ ငွေညှစ်ခဲ့တယ်။” ဟု ၎င်းက ဆိုသည်။

 

မိသားစုသည် တောင်းဆိုထားသော အမေရိကန်ဒေါ်လာ ၁,၂၀၀ ကို မပေးနိုင်ခဲ့ပေ။ ထိုအချိန်မှစ၍ သူနှင့်ပတ်သက်သော သတင်း တစ်စုံတစ်ရာ မကြားရတော့ပေ။

 

၂၀၂၁ ခုနှစ် အာဏာသိမ်းဆန့်ကျင်ရေး အဖွဲ့များထံ နယ်မြေအမြောက်အမြား ဆုံးရှုံးခဲ့ရပြီးနောက် ၂၀၂၄ ခုနှစ်တွင် စစ်တပ်က စစ်မှု မထမ်းမနေရဥပဒေကို ပြဋ္ဌာန်းခဲ့သည်။ ငွေကြေးတတ်နိုင်သော လူငယ်အမျိုးသားများသည် ပြည်ပသို့ ထွက်ခွာသွားခဲ့ကြသည်။

 

အနည်းဆုံး တစ်ပတ်လောက်ဖြစ်ဖြစ် အရာအားလုံးကနေ လွတ်မြောက်ပြီး ဘာမှ မစဉ်းစား၊ မပူပန်ဘဲ နေချင်တယ်

 

မအိ(အမည်လွှဲ) သည် မြို့တော်ရှိ အထည်ချုပ်စက်ရုံတစ်ခုတွင် အလုပ်လုပ်ကိုင်နေသော်လည်း သူမသည် စစ်တပ်နှင့် အတိုက်အခံအဖွဲ့များအကြား ပြင်းထန်သော တိုက်ပွဲများ ဖြစ်ပွားနေသည့် ရခိုင်ပြည်နယ်မှ ဖြစ်သည်။ သူမသည် မိသားစုနှင့် မတွေ့ရသည်မှာ ခုနစ်နှစ်ရှိပြီဖြစ်ပြီး အိမ်သို့ အမြန်ပြန်သင့်သလား သို့မဟုတ် ရန်ကုန်တွင် ဆက်နေပြီး အိမ်သို့ ငွေပို့သင့်သလား ဆိုသည်ကို ဝေခွဲမရဖြစ်နေသည်။ သူမ၏ ဇာတိကျေးရွာတွင် ငါးဖမ်းထွက်ရင်းပင် သတ်ဖြတ်ခံရမှုများ ရှိနေကြောင်း သူမက ဆိုသည်။

 

“အနည်းဆုံး တစ်ပတ်လောက်ဖြစ်ဖြစ် အရာအားလုံးကနေ လွတ်မြောက်ပြီး ဘာမှ မစဉ်းစား၊ မပူပန်ဘဲ နေချင်တယ်။” ဟု မအိဖူးက ပြောသည်။ “မကောင်းတဲ့ သတင်းတွေကို ထပ်မကြားချင်တော့ဘူး။”

 

ညဉ့်နက်ချိန်တွင် အလုပ်မှ ပြန်ရန် မလုံခြုံတော့သဖြင့် သူမသည် အချိန်ပို ဆင်းနိုင်ခြင်း မရှိတော့ပေ။ လူအများအပြား မြို့ကို စွန့်ခွာသွားကြသောကြောင့် လုပ်ဖော်ကိုင်ဖက်များကို အလှကုန်ရောင်းသည့် သူမ၏ တစ်ပိုင်တစ်နိုင် လုပ်ငန်းလည်း ရပ်ဆိုင်းသွားခဲ့သည်။ တစ်ချိန်တည်းမှာပင် အာဏာသိမ်းပြီးနောက်ပိုင်း တန်ဖိုး ၈၀ ရာခိုင်နှုန်းခန့် ကျဆင်းသွားသော မြန်မာကျပ်ငွေ တန်ဖိုးပြိုလဲမှုကြောင့် ကုန်စျေးနှုန်းများမှာ အဆမတန် မြင့်တက်လာခဲ့သည်။

 

ကုလသမဂ္ဂ၏ အဆိုအရ ၂၀၂၀ ပြည့်နှစ်မှစတင်ကာ မြန်မာနိုင်ငံ၏ စုစုပေါင်း ပြည်တွင်းထုတ်ကုန် (GDP) မှာ ၉ ရာခိုင်နှုန်း ကျဆင်းသွားခဲ့ပြီး ဆယ်စုနှစ်တစ်ခုကြာ ဒီမိုကရေစီ အသွင်ကူးပြောင်းရေးကာလအတွင်း ရရှိခဲ့သော စီးပွားရေး တိုးတက်မှုများမှာ နောက်ပြန်လှည့်သွားခဲ့သည်။

 

ထို ၁၀ နှစ်တာအတွင်း မြန်မာနိုင်ငံ၏ လျင်မြန်သော အပြောင်းအလဲ အမှတ်အသားများကို ရန်ကုန်မြို့တွင် မြင်တွေ့နိုင်သည်။ နိုင်ငံတကာသို့ တံခါးဖွင့်ပေးလိုက်သောအခါ နိုင်ငံခြားရင်းနှီးမြှုပ်နှံမှုများ စီးဝင်လာပြီး ကွန်ဒိုများ၊ ဇိမ်ခံဟိုတယ်များနှင့် ကုန်တိုက်များ မြို့ထဲတွင် ပေါ်ပေါက်လာခဲ့သည်။ ကမ္ဘာ့ဘဏ်၏ အဆိုအရ ဆင်းရဲမွဲတေမှုနှုန်းမှာ ၂၀၀၅ ခုနှစ်တွင် ၄၈.၂ ရာခိုင်နှုန်း ရှိခဲ့ရာမှ ၂၀၁၇ ခုနှစ်တွင် ၂၄.၈ ရာခိုင်နှုန်းအထိ ထက်ဝက်နီးပါး လျော့ကျသွားခဲ့သည်။

 

ဒါပေမဲ့ အာဏာသိမ်းပြီးနောက်မှာတော့ ကျွန်မတို့ အသက်ရှင်ရပ်တည်ဖို့ လိုအပ်တာတွေကိုပဲ လုပ်နေကြရတယ်

 

ယနေ့တွင်မူ နိုင်ငံခြားစီးပွားရေး လုပ်ငန်းအများအပြား နုတ်ထွက်သွားကြပြီး ကမ္ဘာလှည့်ခရီးသွားများလည်း ပျောက်ကွယ်သွားခဲ့သည်။ ဗိုလ်ချုပ်အောင်ဆန်းစျေးတွင် ယက်လုပ်ထားသော အိတ်များနှင့် ရိုးရာအထည်များ၊ လက်ဝတ်ရတနာများနှင့် သစ်သားပန်းပု အမှတ်တရပစ္စည်းများ ခင်းကျင်းထားသော်လည်း တစ်ချိန်က ကမ္ဘာတစ်ဝန်းမှ ခရီးသွားများဖြင့် ပြည့်နှက်နေခဲ့သော လမ်းကြားများသည် ယခုအခါ အရောင်းအဝယ် အလွန်အေးနေကြောင်း ဆိုင်ပိုင်ရှင်တစ်ဦးက ပြောသည်။

 

“အာဏာမသိမ်းခင်က ကျွန်မတို့ရဲ့ မျှော်လင့်ချက်နဲ့ အိပ်မက်တွေက အမြင့်ဆုံးမှာ ရှိခဲ့တယ်” ဟု နှင်းစန္ဒာက ဆိုသည်။ “ဒါပေမဲ့ အာဏာသိမ်းပြီးနောက်မှာတော့ ကျွန်မတို့ အသက်ရှင်ရပ်တည်ဖို့ လိုအပ်တာတွေကိုပဲ လုပ်နေကြရတယ်။”

 

ယခင်ရွေးကောက်ပွဲများတွင် လူထုသည် ဒေါ်အောင်ဆန်းစုကြည်၏ အမျိုးသားဒီမိုကရေစီအဖွဲ့ချုပ် အရောင်ဖြစ်သော အနီရောင်များဖြင့် လမ်းမများပေါ်တွင် လွှမ်းမိုးကာ အလုံးအရင်းဖြင့် မဲပေးခဲ့ကြသည်။ သူမသည် အသက် ၈၀ အရွယ်တွင် ထောင်ထဲ၌ ရှိနေဆဲဖြစ်ပြီး ၂၀၂၀ ပြည့်နှစ်တွင် အပြတ်အသတ် အနိုင်ရခဲ့သော သူမ၏ ပါတီမှာလည်း ပိတ်ပင်ခံထားရသည်။

 

ထိုင်းနိုင်ငံသို့ တိမ်းရှောင်နေသည့် ဒီမိုကရေစီအရေး တက်ကြွလှုပ်ရှားသူ လူငယ်တစ်ဦးက တော်လှန်ရေး အောင်နိုင်မည်ဟု ယုံကြည်နေဆဲဖြစ်ကြောင်း ပြောသည်။ သို့သော် အချိန်ယူရမည်ဟု ၎င်းက ဆိုသည်။ စစ်တပ်၏ အမြစ်တွယ်နေသော အာဏာသည် ဆယ်စုနှစ်များစွာ ကြာခဲ့ပြီဖြစ်သည်။

 

“ဒီ ၅ နှစ်အတွင်းမှာ [စစ်တပ်ရဲ့ လွှမ်းမိုးမှုကို] ဖြေရှင်းနိုင်မယ်လို့ ကျွန်တော်တို့ မထင်ခဲ့ပါဘူး။” လူငယ်များသည် ဆက်လက် တော်လှန်ရန် အသင့်ရှိနေကြပြီး နောက်ထပ် ၅ နှစ် သို့မဟုတ် ၁၀ နှစ်ခန့် ကြာနိုင်သည်ဟု ၎င်းက ခန့်မှန်းသည်။

 

တရုတ်နိုင်ငံ၏ ထောက်ခံမှုဖြင့် စစ်ကောင်စီက စစ်မြေပြင်တွင် အရှိန်အဟုန် ပြန်လည်ရရှိနေသည့် အချိန်၌ ကျင်းပသော ယခုလ ရွေးကောက်ပွဲသည် စစ်တပ်အား နိုင်ငံတကာတွင် ပိုမိုတရားဝင်မှု ရရှိစေမည်ကို တက်ကြွလှုပ်ရှားသူများက စိုးရိမ်နေကြသည်။

 

တနင်္ဂနွေနေ့က မဲရုံများတွင် တီဗွီဖန်သားပြင်များမှ မြူးကြွသော သီချင်းတစ်ပုဒ်ကို ထုတ်လွှင့်နေသည်။ “ဟေး မိတ်ဆွေတို့၊ လှပတဲ့ အနာဂတ်တွေ ပွင့်လန်းဖို့ မနက်ဖြန်ကို ပုံဖော်မယ့်သူတွေကို ရွေးချယ်ကြပါစို့။” ဟု စာသားများပါရှိပြီး ဖန်သားပြင်ပေါ်မှ အမျိုးသမီးတစ်ဦးက ပြုံးရွှင်ကာ ကပြနေသည်။ မီတာအနည်းငယ်အကွာတွင်မူ သေနတ်ကိုင်ဆောင်ထားသော ရဲတပ်ဖွဲ့ဝင်များက စောင့်ကြည့်နေကြသည်။

 

စစ်ကောင်စီ၏ ထုတ်ပြန်ချက်အရ တနင်္ဂနွေနေ့တွင် မဲပေးသူ ၅၂ ရာခိုင်နှုန်းရှိပြီး ၂၀၂၀ နှင့် ၂၀၁၅ ရွေးကောက်ပွဲများရှိ ၇၀ ရာခိုင်နှုန်းနှင့် နှိုင်းယှဉ်လျှင် နည်းပါးနေသည်။ အချို့ဒေသများတွင် လူများသည် မဲမပေးပါက ပြစ်ဒဏ်အနေဖြင့် စစ်မှုထမ်းရန် စေခိုင်းခံရမည် သို့မဟုတ် ပြည်ပထွက်ခွာခွင့် ပိတ်ပင်ခံရမည်ကို စိုးရိမ်ကာ ကြောက်ရွံ့စိတ်ဖြင့် မဲပေးခဲ့ကြသည်။ နိုင်ငံ၏ နေရာအနှံ့အပြားတွင် ပြင်းထန်သော တိုက်ပွဲများ ဖြစ်ပွားနေသဖြင့် ရွေးကောက်ပွဲတွင် လုံးဝ မပါဝင်နိုင်ခဲ့ပေ။

 

စစ်တပ်ကမူ ရွေးကောက်ပွဲအပေါ် ဝေဖန်မှုများကို ပယ်ချခဲ့ပြီး လွတ်လပ်ပြီး တရားမျှတသည့် ရွေးကောက်ပွဲ ဖြစ်လိမ့်မည်ဟု အခိုင်အမာ ပြောကြားခဲ့သည်။

 

ဤမဲပေးမှုသည် နိုင်ငံ၏ စီးပွားရေးနှင့် နိုင်ငံရေးအကျပ်အတည်းကို ထူးခြားစေမည်လားဟု မေးမြန်းရာတွင် အသက် ၂၃ နှစ်အရွယ် အမျိုးသားတစ်ဦးက “၅၀-၅၀ ပါပဲ” ဟု ဖြေကြားသည်။ ၎င်းအနေဖြင့် မဲပေးရန် စိတ်လှုပ်ရှားမှု မရှိသော်လည်း တာဝန်တစ်ခုအရ မဲပေးခဲ့ခြင်းဖြစ်သည်ဟု ဆိုသည်။

 

မဲဆန္ဒရှင် အများအပြားမှာမူ မလုံခြုံမည်ကို စိုးရိမ်သဖြင့် စကားပြောရန် ငြင်းဆိုခဲ့ကြသည်။

 

မဲရုံများနှင့် ဝေးရာတွင် လူငယ်တစ်ဦးသည် အလုပ်မှ အိမ်အပြန် နေဝင်ချိန်ကို ကြည့်ရှုရန် ခေတ္တရပ်နားနေသည်။ သူသည် ၂၀၂၁ ခုနှစ်က ဆန္ဒပြခဲ့သူများထဲတွင် ပါဝင်ခဲ့ကြောင်း ပြောသည်။ ယနေ့တွင်မူ ထိုသို့ပြုလုပ်ရန် မဖြစ်နိုင်တော့ပေ။ “အာဏာပိုင်တွေက ချက်ချင်းသိပြီး လာဖမ်းကြတာပဲ။” ဟု ၎င်းက ဆိုသည်။

 

“သူတို့က ဟန်ပြလုပ်နေတာ၊ ကမ္ဘာကြီးကို ရွေးကောက်ပွဲလုပ်တယ်၊ ဒီမိုကရေစီကို ပြန်သွားတယ်ဆိုတာကို ပြချင်နေတာ၊ ဒါပေမဲ့ ရလဒ်ကို ကျွန်တော်တို့အားလုံး သိပြီးသားပါ။” ဟု ၎င်းက ဆက်ပြောသည်။ “ဘယ်သူမှ ပြိုင်မယ့်သူ မရှိဘူး။”

 

သူသည် မဲသွားမပေးခဲ့ကြောင်း ပြောကြားသည်။ ရန်ကုန်မြို့ရှိ လူအများအပြားသည်လည်း အလားတူပင် တိတ်ဆိတ်စွာဖြင့် ဖီဆန်ခဲ့ကြသည်။

 

ကိုးကား - The Guardian

 

ပုံစာ - ရန်ကုန်မြို့လယ်တွင် ရွေးကောက်ပွဲ မဲဆွယ်စည်းရုံးရေးပိုစတာများကို ဖြတ်သန်းသွားလာနေကြသည့် ပြည်သူများ။ မြန်မာနိုင်ငံသည် အထွေထွေရွေးကောက်ပွဲကို အဆင့်ဆင့် ကျင်းပလျက်ရှိရာ မဲပေးမှုများကို ဇန်နဝါရီလအထိ ဆက်လက်ကျင်းပသွားရန် သတ်မှတ်ထားသည်။ ဓာတ်ပုံ - Lauren DeCicca/Getty Images