ဇွန် ၂၅။

 

ရှမ်းပြည်နယ်မြောက်ပိုင်း ကျောက်မဲမြို့မှာ ဒီနေ့ဇွန်လ ၂၅ ရက်မနက်ပိုင်းအချိန်က​ စစ်ကောင်စီနဲ့ တအာင်းအမျိုးသားလွတ်မြောက်ရေးတပ်မတော်တို့တိုက်ပွဲအတွင်း လက်နက်ကြီးစထိမှန်ခဲ့သူအရပ်သားနှစ်ဦးသေဆုံးခဲ့ကာ ဒဏ်ရာရခဲ့သူတွေရှိခဲ့တယ်လို့ သိရပါတယ်။

 

“လက်နက်ကြီးပစ်တဲ့ အသံမနက်ကတည်းကကြားနေရတယ်၊ လေယာဉ်လဲဝဲတယ်၊ မြို့ခံတွေအကုန်ပြောင်းပြေးကြပြီ၊ မြို့ထဲလူမရှိတော့ဘူး၊ သွားလို့ရတဲ့နည်းလမ်းမှန်သမျှနဲ့ပြောင်းပြေးနေကြရပြီ"လို့ ကျောက်မဲမြို့ခံအမျိုးသမီး တစ်ဦးကပြောပါတယ်။

 

စစ်ကောင်စီက ပစ်ခတ်ခဲ့တဲ့ လက်နက်ကြီး​တွေ ထိမှန်ခဲ့တာကြောင့်အမျိုးသားတစ်ဦးနဲ့အမျိုးသမီးတစ်ဦး သေဆုံးခဲ့ပြီး ကလေးငယ် ၁ ဦး အပါအဝင် ၂ ဦး ဒဏ်ရာရရှိခဲ့တယ်လို့ ဒေသခံတွေက ပြောပါတယ်။

 

တအာင်းအမျိုးသမီးအဖွဲ့အစည်းရဲ့ထုတ်ပြန်ချက်အရ ထုံးဖိုရပ်ကွက်(၈) အရပ်သားနေအိမ်မှာ လက်နက်ကြီးတစ်လုံး ကျရောက်ပေါက်ကွဲခဲ့ပြီး ညီအစ်ကို ၂ ဦးထိမှန်ခဲ့ကာ ညီဖြစ်သူ ကသေဆုံးခဲ့ပြီး အစ်ကိုဖြစ်သူဦးခေါင်း ကျည်စထိမှန်ဒဏ်ရာရရှိခဲ့တယ်လို့ ဆိုပါတယ်။

 

ဒါ့အပြင်(၉)ရပ်ကွက်က အမျိုးသမီးတဦး ဦးခေါင်းသေနတ် ကျည်ထိမှန်သေဆုံးသွားခဲ့တယ်လို့လည်း သိရပါတယ်။

 

ဒါ့အပြင် ပြည်ထောင်စုလမ်းမကြီးပေါ်က ပန်ပေါင်းကျေးရွာနေသူအသက် ၁၄ နှစ်အရွယ် ကလေးတစ်ဦးကျည်ထိမှန်ဒဏ်ရာရခဲ့တာကြောင့် ကျောက်မဲဆေးရုံကို ပို့ဆောင်ထားတယ်လို့ သိရပါတယ်။

 

ညီနောင်မဟာမိတ်သုံးဖွဲ့နဲ့စစ်ကောင်စီတို့အကြား၊ ပြီးခဲ့တဲ့ ဇန်နဝါရီလ က တရုတ်အစိုးရရဲ့ စီစဥ်ပေးမူနဲ့ ၆ လ ကြာ ယာယီအပစ်ရပ်ပြီးနောက် တိုက်ပွဲ​တွေ ပြန်ဖြစ်လာတာပါ။

 

ဒီ​နေ့ ဇွန်လ ၂၅ ရက်မှာ ကျောက်မဲ၊ မိုးကုတ်၊ နောင်ချိုမြို့​တွေမှာ တိုက်ပွဲတစ်ဖန်ပြန်လည် စတင်ဖြစ်ပွားနေတာဖြစ်ပြီး၊ မြို့ခံတွေရှောင်ပြေးနေကြရပါတယ်။

 

"ဇွန်လအစကတည်းက တိုက်ပွဲဖြစ်တော့မယ်ဆိုတာ မြို့ခံတွေရိပ်မိနေကြတယ်၊ တအောဝ်းတပ်ဖွဲ့တွေမြို့ထဲနေရာဝင်ယူနေကြတာကြောင့် သတင်းကြားကတည်းက ငွေကြေးချမ်းသာသူတွေ မန္တလေး ရန်ကုန်ပြေးနေကြပြီ"လို့ ကျောက်မဲဒေသခံတဦးက ပြောပါတယ်။

 

မန္တလေးတိုင်း၊ မိုးကုတ်မြို့နယ်၊ ဒေါ်နန်းကြည်တောင်အနီးမှာ တအာင်းအမျိုးသားလွတ်မြောက်ရေးတပ်မတော်နဲ့ စစ်ကောင်စီတပ်​တွေ ပစ်ခတ်မှုဖြစ်နေပြီး မိုးကုတ်-မိုးမိတ် လမ်းကြောင်းရှိ သရက်ချောင်းတံတားမှာ မိုင်းခွဲခံရပြီးပျက်စီးခဲ့တယ်လို့ သိရပါတယ်။

 

ဓါတ်ပုံ-လူမှုကွန်ရက်

 

Burma Associated Press