ဇွန် ၂၀။

 

ရှမ်းပြည်နယ်တောင်ပိုင်း၊ ဆီဆိုင်မြို့နယ်မှာ စစ်အသုံးစရိတ်အဖြစ် ‌တစ်အိမ် ၅ သိန်းကျပ်၊ နိုင်ငံခြားထွက် အလုပ်လုပ်တဲ့အိမ်တွေကို တစ်အိမ် ၈ သိန်းကျပ် စစ်ကောင်စီနဲ့လက်အောက်ခံ ပြည်သူ့စစ်​တွေက ဆက်ကြေးကောက်ခံနေတယ်လို့ သိရပါတယ်။

 

ဆီဆိုင်မြို့နယ်၊ ဆီဆိုင်ကြီးကျေးရွာမှာ စစ်ကောင်စီနဲ့လက်အောက်ခံ PNO ပြည်သူ့စစ်က စစ်ရှောင်ရာကနေ ပြန်လာတဲ့ ပြည်သူ​တွေကို အတင်းအဓမ္မ လူသစ်စုဆောင်းနေတာ​တွေလည်း ရှိ​နေတယ်လို့ ပအိုဝ်းအမျိုးသားလွတ်မြောက်ရေးတပ်မတော်က အသိပေးထားပါတယ်။

 

စစ်ကောင်စီနဲ့ PNO ပြည်သူ့စစ်တွေက တစ်ဖက်၊ ပအိုဝ်းလွတ်မြောက်ရေး တပ်မတော်(PNLA)နဲ့ မဟာမိတ်တော်လှန်ရေး တပ်ဖွဲ့တွေက တဖက် တိုက်ပွဲတွေဖြစ်ပွားခဲ့ပြီး ၅ လအကြာမှာ ပြည်သူအများစု မြို့ထဲပြန်လည်နေထိုင်နေကြတာဖြစ်ပါတယ်။

 

"ရွာဖက်တွေပြီးရင် မြို့ပေါ်ကို ကောက်တော့မယ်ဆိုပြီး စစ်ရှောင်နေသူတွေပြန်မလာရဲတာတွေရှိနေပြီ၊ တစ်ရွာပြီးတစ်ရွာကောက်နေကြတယ်၊ မြို့ပေါ်ပြန်လာနေကြသူတွေလည်း စိုးတထိတ်ထိတ်နဲ့ လန့်နေကြပြီ၊ ပစ္စည်းကအစအကုန်ဆုံးရှုံးသူတွေဆီ ကောက်မယ်ဆိုရင် ဘယ်သူမှပြန်မလာနေကြတော့ဘူး"လို့ ဆီဆိုင်မြို့ခံတစ်ဦးကပြောပါတယ်။

 

စစ်ကောင်စီနဲ့ PNO ပြည်သူ့စစ်က ပြီးခဲ့တဲ့ ဇွန်လ ၁၇ ရက်က ဒေသခံ​တွေကို အစည်းအဝေးခေါ်ပြီး စစ်စရိတ်အဖြစ် ဆက်ကြေးကောက်ခံခဲ့တာလို့ ဆိုပါတယ်။

 

ဒါ့အပြင်တစ်ရွာကို တစ်လ တပ်သားသစ် ၆ ဦးပို့ဆောင်ရမယ်လို့ စစ်ကောင်စီနဲ့ PNO ပြည်သူ့စစ်က ကောက်ခံခဲ့ပြီး တပ်သားလူသစ်​တွေကို ဆီဆိုင်မြို့နယ် ဘုရားဖြူဘောလုံးကွင်းမှာ သင်တန်းပေးနေတယ်လို့ သိရပါတယ်။

 

စစ်အသုံးစရိတ် တစ်အိမ် ၅ သိန်းကျပ်ကို တခါတည်းမထည့်နိုင်ရင် ၂ ကြိမ်ခွဲထည့်ခိုင်းပြီး ဇွန်လ ၁၉ ရက်နေ့မှာ တစ်ကြိမ်ထည့်ခဲ့ရပြီး ကျန်တဲ့ငွေကို လကုန်ရက် အပြီးထည့်ရမယ်လို့​ပြည်သူ့စစ်​တွေက ဒေသခံ​တွေကို ပြောဆိုထားတယ်လို့ သိရပါတယ်။

 

ဓါတ်ပုံ-PNLA

 

Burma Associated Press