ဧပြီ ၂၂။

 

​တော်လှန်​ရေးတပ်ဖွဲ့​တွေထိန်းချုပ်ထားရာ မြဝတီမြို့ကို တက်လာတဲ့ "​အောင်​ဇေယျ"အမည်ခံ စစ်ကောင်စီယာဥ်တန်းကို ယမန်​နေ့ ဧပြီ ၂၁ ရက်မှာ KNLA၊ PDF ပူးပေါင်းတပ်​တွေက ကြားဖြတ် တိုက်ခိုက်ခဲ့ပြီး သံချပ်ကာနဲ့ စက်သေနတ်တပ်ယာဥ်တွေ ရရှိခဲ့တယ်လို့ မြေပြင်နဲ့ နီးစပ်သူ တစ်ဦးက BAP ကို ပြောပါတယ်။

 

တိုက်ပွဲအတွင်း သံချပ်ကာယာဥ် ၁ စီး၊ စက်​သေနတ်တပ် စစ်သုံးယာဥ် ၂ စီးအပြင် အော်လီဂန်း တစ်လက်၊ ပွိုင့်ဖွိုက် တစ်လက် သိမ်းဆည်းမိခဲ့တယ်လို့လည်း ဆိုပါတယ်။

 

ကရင်အမျိုးသားလွတ်မြောက်ရေးတပ်မတော်- KNLA နဲ့ ပြည်သူ့ကာကွယ်ရေး ပူးပေါင်းတပ်တို့က အဲဒီယာဉ်တန်းကို ဒေါန တောင်ခြေတ​နေရာမှာ တိုက်ခိုက်ခဲ့တာပါ။

 

အဲဒီတိုက်ပွဲမှာ စစ်ကောင်စီဘက်က ဗိုလ်ကြီးတစ်ဦး၊ ဗိုလ်တစ်ဦး အပါအဝင် ၆ ဦးသေဆုံးခဲ့သလို တိုက်ခိုက်ခံရအပြီးမှာ စစ်ကောင်စီယာဉ်တန်းဟာ ပြန်ဆုတ်သွားတယ်လို့ ​မြေပြင်အတည်ပြုချက် ရယူနိုင်ခဲ့ပါတယ်။

 

တိုက်ခိုက်ခံရတဲ့ စစ်ကောင်စီယာဉ်တန်းဟာ ဧပြီ ၁၂ ရက်ထဲက ကရင်ပြည်နယ်၊ ကော့ကရိတ်မြို့က ထွက်လာတာဖြစ်ပြီး ၁၀ ရက်ကြာတဲ့အထိ ကော့ကရိတ်အကျော် တောနော်ရေတံခွန်နားမှာပဲ ရှိနေသေးတာ ဖြစ်ပါတယ်။

 

ပုံစာ- စစ်​ကောင်စီထံမှ တိုက်ခိုက်သိမ်းပိုက် ရရှိခဲ့တဲ့ သံချပ်ကာ ယာဥ်တစ်စီး (ဓါတ်ပုံ- The Reporters)

 

Burma Associated Press