ဖမ်းဆီးထိန်းသိမ်းခံထားရသည့် ဒေါ်အောင်ဆန်းစုကြည်ကို အကျဉ်းထောင်မှ နေအိမ်အကျယ်ချုပ်သို့ ပြောင်းရွှေ့လိုက်ခြင်းသည် စစ်အာဏာရှင်တို့က ခုခံတော်လှန်တိုက်ခိုက်ရေးသမားများနှင့် ဖြစ်ပွားနေသော ပဋိပက္ခတွင် လူသားဒိုင်းအဖြစ် အသုံးချခြင်းဖြစ်နိုင်သည့်အတွက် စိုးရိမ်မှုရှိကြောင်း သူမ၏ သားက ကြာသပတေးနေ့တွင် ပြောသည်။

 

စစ်အာဏာရှင် ပြောခွင့်ရသူက ဒေါ်အောင်ဆန်းစုကြည်နှင့် အခြားသော သက်ကြီးရွယ်အို အကျဉ်းသားများကို ပူပြင်းသည့် ရာသီဥတုမှ ကာကွယ်ရန်အတွက် နေအိမ်အကျယ်ချုပ်သို့ ပြောင်းရွှေ့လိုက်ကြောင်း ယခုအပတ်အတွင်း ပြောသည်။ ဒေါ်အောင်ဆန်းစုကြည်ကို မည်သည့်နေရာသို့ ပြောင်းရွှေ့လိုက်ကြောင်း ရှင်းလင်းစွာ မသိရပါ။

 

လန်ဒန်မြို့တွင် နေထိုင်သော သူမ၏ သားဖြစ်သူ ကင်အဲရစ်က ဒေါ်အောင်ဆန်းစုကြည်သည် အပူဒဏ် ခံစားနေရသည်ဟု ကြားသိရကြောင်း၊ သို့သော် စစ်အာဏာရှင်တို့၏ ရွှေ့ပြောင်းရခြင်း တရားဝင်အကြောင်းပြချက်မှာ "ဖြစ်နိုင်ချေ မရှိ” ဟု ပြောသည်။

 

“သူတို့မှာ ပြောင်းရွှေ့ရခြင်း အကြောင်းပြချက် သပ်သပ် ရှိမယ်လို့ ကျွန်တော် ထင်တယ်။ အတိအကျ ပြောရရင် လူသားဒိုင်းအဖြစ် အသုံးချတာ ဒါမှမဟုတ် ညှိနှိုင်းရာမှာ အသာစီးရဖို့ အချက်တစ်ခုအနေနဲ့ပေါ့။” ဟု အဲရစ်က အင်တာဗျူးတစ်ခုတွင် ပြောသည်။

 

“တိုက်ပွဲတွေ စစ်တပ် အမာခံဒေသတွေဆီ နီးကပ်လာတဲ့အတွက် အမေ့ကို အနီးကပ် လူသားဒိုင်းအဖြစ် အသုံးချချင်တယ်လို့ ကျွန်တော် ထင်တယ်။ ဒါမှမဟုတ် အမေ့ကို လွှတ်ပေးမယ်ဆိုတဲ့အချက်နဲ့ ခုခံတော်လှန်ရေးတပ်ဖွဲ့တွေကို ညှိနှိုင်းနိုင်တယ်။ အနာဂတ်အတွက် ကြိုတင် ခြေလှမ်းပြင်တဲ့ သဘောပေါ့။” ဟု ၎င်းက ပြောသည်။

 

ကမ္ဘာ့ခေါင်းဆောင်များနှင့် ဒီမိုကရေစီလိုလားသည့် တက်ကြွလှုပ်ရှားသူများက ဒေါ်အောင်ဆန်းစုကြည်ကို လွှတ်ပေးရန် အကြိမ်ကြိမ် တောင်းဆိုထားသည်။ သူမကို နိုင်ငံတော်သစ္စာဖောက်မှု၊ အဂတိလိုက်စားမှု၊ ဆက်သွယ်ရေးဥပဒေချိုးဖောက်မှု စသည်တို့ဖြင့် ထောင်ဒဏ် ၂၇ နှစ် ချမှတ်ခံထားရပြီး သူမက စွဲချက်များကို ငြင်းဆိုထားသည်။

 

ကိုးကား - Reuters

 

ပုံစာ - ဧပြီလ ၁၈ ရက် ၂၀၂၄ ခုနှစ် ဗြိတိန်နိုင်ငံ လန်ဒန်မြို့ Reuters ရုံးခန်းတွင် ဓာတ်ပုံရိုက်ရန် ဟန်ပြနေသည့် ဒေါ်အောင်ဆန်းစုကြည်၏ သား ကင်အဲရစ်။ (REUTERS/Suzanne Plunkett)

 

Burma Associated Press