ဧပြီ ၁၈။

 

ကော့ကရိတ်တောင်ပိုင်း၊ မြို့ဟောင်းရွာကို စစ်ကောင်စီက ဒီနေ့ ဧပြီ ၁၈ ရက် နေ့လယ် ၁၁ နာရီ ဝန်းကျင်က Y-12 လေယာဉ်နဲ့ ဗုံးကြဲချခဲ့တယ်လို့ ဒေသခံတွေဆီက သိရပါတယ်။

 

နေ့လယ် ၁၁ နာရီဝန်းကျင် ဘုန်းကြီးဆွမ်းဘုန်းချိန်​လောက် လေယာဉ်ဗုံးကြဲခံရတဲ့အတွက် ဆရာတော်တစ်ပါး ပျံလွန်တော်မူပြီး ရွာသား လေးဦး ဒဏ်ရာရခဲ့တယ်လို့ ဒေသခံတွေက ပြောပါတယ်။

 

ပြီးခဲ့တဲ့ ဧပြီ ၁၂ ရက်ကလည်း စစ်ကောင်စီစစ်ကြောင်းက ရမ်းသမ်းပစ်ခတ်လိုက်တဲ့ လက်နက်ကြီးကြောင့် ရွာသစ်​ကျေးရွာက အမျိုးသမီးတစ်ဦး သေဆုံးခဲ့ပါသေးတယ်။

 

“Y-12 ရော၊ ကင်းထောက်ရော ၁၂ ရက်နေ့ထဲက ဒီနေ့အထိ ကော့ကရိတ်နဲ့ မြဝတီတဝိုက်ကို တနေကုန် ပျံနေတယ်” ဆိုပြီး ဒေသခံတစ်ဦးက ပြောပါတယ်။

 

စစ်ကောင်စီတပ်ဟာ စစ်ကြောင်းထိုးရာ လမ်းတလျှောက်က ကျေးရွာတွေကို ရမ်းကားပစ်ခတ်တာတွေလည်း ရှိနေပြီး လက်တလောမှာ အဲဒီစစ်ကြောင်းဟာ တတန်ကူးရွာ နားမှာ ရှိနေတယ်လို့ သိရ ပါတယ်။

 

အဲဒီစစ်ကြောင်းဟာ တတန်ကူးရွာကနေ ဒေါန တောင်ပေါ်တက်ပြီး သင်္ကန်းညီနောင်နဲ့ မြဝတီ တက်ဖို့လုပ်နေလို့လည်း မြေပြင်နဲ့ နီးစပ်သူတွေက ပြောပါတယ်။

 

ပုံစာ - ၂၀၂၂ ခုနှစ်ကလည်း လက်နက်ကြီး ထိမှန်ဖူးတဲ့ ကော့ကရိတ်တောင်ပိုင်း၊ မြို့ဟောင်းရွာဘုန်းကြီးကျောင်း

 

Burma Associated Press