ဇူလိုင် ၂၈။

 

ဆေးဝါးကုသမှု အချိန်မီမရရှိခဲ့လို့ သရက်ထောင်တွင်း အကျဥ်းကျ ခံနေရတဲ့ နိုင်ငံရေးအကျဉ်းသားတစ်ဦး ဇူလိုင် ၂၇ ရက် မနက်ခင်းမှာ သေဆုံးခဲ့တယ်လို့ သိရပါတယ်။

 

သေဆုံးသူဟာ အကြမ်းဖက်ပုဒ်မ ၅၂(က)/၅၁(ဂ) တို့နဲ့ ၂၀၂၂ ခုနှစ်၊ နိုဝင်ဘာလက ထောင်ဒဏ် ၁၁ နှစ် ကျခံနေရတဲ့ အသက်(၃၉)နှစ်အရွယ် ကိုညီညီဖြစ်တယ်လို့ သိရပါတယ်။

 

၎င်းဟာ သွေးတိုးရောဂါဝေဒနာကို ခံစားခဲ့ရပြီး ကျဆုံးသွားခဲ့ရတယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက်(PPNM)က ဒီနေ့ အသိပေးထားပါတယ်။

 

ကိုညီညီ မသေဆုံးမီ ဇူလိုင် ၂၆ ရက် ညခင်းအချိန်က သွေးတိုးရောဂါခံစားရတာကြောင့် အရေးပေါ်ဆေးဝါးကုသပေးဖို့ ထောင်တာဝန်ခံ​တွေထံ နိုင်ငံရေးအကျဉ်းသား​တွေက အကူအညီ တောင်းခံခဲ့ကြတယ်လို့ ဆိုပါတယ်။

 

အကူအညီတောင်းခံပြီး တစ်နာရီကျော်အကြာမှသာ အကျဉ်းဦးစီးဝန်ထမ်း​တွေက အကျဉ်းသားဆေးမှူးတစ်ဦးကို လာရောက်ကြည့်ရှုစစ်ဆေးခိုင်းခဲ့ပါတယ်။

 

အဲဒီအချိန်မှာ ကိုညီညီရဲ့သွေးပေါင်ချိန်က အပေါ်သွေး ၂၄၀၊ အောက်သွေး ၁၄၀ အထိ ရှိခဲ့တယ်လို့ (PPNM)က အသိပေးထားပါတယ်။

 

သွေးပေါင်ချိန် တက်လာချိန်မှာ ၎င်းကို ပြင်ပဆေးရုံ အချိန်မီမပို့ဆောင်ခဲ့ဘူးလိုလည်း ဆိုပါတယ်။

 

ညအချိန် ဖြစ်တယ်ဆိုတဲ့ ​ထောင်အာဏာပိုင်​တွေရဲ့ အကြောင်းပြမှုနဲ့ အဆင့်ဆင့် သတင်းပေးပို့နေတာကြောင့် အချိန် တစ်နာရီခွဲကျော် ကြာခဲ့ကာ ကိုညီညီ ကျဆုံးခဲ့ရတယ်လို့ မြန်မာနိုင်ငံလုံး ဆိုင်ရာ နိုင်ငံရေးအကျဉ်းသားများကွန်ရက် (PPNM)က အသိပေးပါတယ်။

 

Burma Associated Press