ဇူလိူင် ၂၇။

 

ရန်ကုန်မြို့၊ အင်းစိန်ဗဟိုအကျဉ်းထောင်တွင်းမှာ နိုင်ငံရေးအကျဥ်းသား အကျဥ်းသူအပါဝင် အကျဥ်း သား ၁၀၀ ကျော် ဝမ်းပျက် ဝမ်းလျှောရောဂါ ခံစားနေရတယ်လို့ ထောင်နဲ့နီးစပ်သူအချို့ဆီက သိရပါတယ်။

 

ဝမ်းပျက်ဝမ်းလျောရောဂါခံစားရသူ​တွေကိုလည်း လုံလောက်တဲ့ ဆေးဝါးများ ပေးနိုင်ခြင်းမရှိခဲ့တဲ့အတွက် ဇူလိုင်လ ၂၀ ရက်အထိ နေ့စဉ် အကျဉ်းသား ၅ ဦးကနေ ၁၀ ဦး အထိ ကူးစက်ခံစားခဲ့ရပြီး အနည်းဆုံး ၁၅၀ ဝန်းကျင်ခန့် ရှိနေတယ်လို့​ မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက် (PPNM)က ထုတ်ပြန်ထားပါတယ်။

 

"ထောင်ဆေးရုံမှာ တက်ကြရသူတွေ ရှိခဲ့ပါတယ်၊ ဆေးရုံတက်ရောက် ကုသနေရသူတွေ ကျန်ရှိနေပါသေးတယ်၊ လက်ရှိ ဝမ်းပျက်ဝမ်းလျှောရောဂါ ခံစားနေရသူ ၃၀ လောက် ကျန်ရှိနေသေးတာ သိရှိထားရပါတယ်"လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် ဦးဆောင်ကော်မတီဝင်တဦးက ပြောပါတယ်။

 

ဒီလိုဝမ်းလျှောတာဟာ ဇူလိုင်လ ၃ ရက်က စစ်ကောင်စီစစ်ခေါင်းဆောင် မွေးနေ့အဖြစ် ထောင်အာဏာပိုင်​တွေက ကျွေးတဲ့ ကြက်သားနဲ့ ပဲဟင်းကို စားခဲ့တာကြောင့်လို့ ဆိုပါတယ်။

 

မွေးနေ့ရှိတာကြောင့် အကျဥ်းသားတွေအိမ်ကပို့တဲ့ အစားအသောက်​တွေကို စားသုံးခွင့်မပြုကြောင်း ဖိအားပေးပြီး ထောင်တွင်းအမိန့် ထုတ်ပြန်ခဲ့တာကြောင့်လို့ သိရပါတယ်။

 

မွေးနေ့​မှာကျွေးတဲ့ ပဲဟင်းနဲ့ကြက်သားမှာ လတ်ဆတ်ခြင်းမရှိဘဲ သိုးနံ့ထွက်နေခဲ့တာ အကျဉ်းဦးစီးဝန်ထမ်း​တွေကို နိုင်ငံရေးအကျဉ်းသား​တွေက တင်ပြပြောဆိုခဲ့ပေမယ့် လက်မခံဘဲ ထောင်ကကျွေးတဲ့ အစားအသောက်ကိုသာ စားသောက်ရမယ်လို့ ဖိအား​ပေးတာရှိခဲ့တယ်လို့ PPNM ကအသိပေးထားပါတယ်။

 

ထောင်ကကျွေးတာစားပြီး၊ ဇူလိုင်လ ၄ ရက်မှစကာ ထောင်တွင်း ဝမ်းပျက်ဝမ်းလျှောရောဂါ ကူးဆက်မှု ဖြစ်ပေါ်ခဲ့တယ်လို့ ဆိုပါတယ်။

 

ဒီသတင်းကို အင်းစိန်ထောင်အာဏာပိုင်​တွေက ဖုံးထားတဲ့အပြင် မိသားစုဝင်​တွေပို့တဲ့ အစား အသောက်​တွေကြောင့် ဝမ်းပျက်ဝမ်းလျှောရောဂါ ဖြစ်တယ်ဆိုပြီး ထောင်ဝင်စာ​တွေကို ကန့်သတ်တာ​တွေ ပြုလုပ်ထားတယ်လို့​ သိရပါတယ်။

 

Burma Associated Press