စက်တင်ဘာ ၁၃။

 

ကရင်အမျိုးသားအစည်းအရုံး၊ ဒူးပလာယာခရိုင် တပ်မဟာ (၆)၊ ဝင်းရေးမြို့နယ် ၊လွတ်ရှမ်းကျေးရွာ၌ အထိုင်ချတပ်စွဲထားသော စစ်ကောင်စီတပ်မှ စစ်သားများသည် ယမန်​နေ့ စက်တင်ဘာ ၁၂ ရက် နံနက်အစောပိုင်းတွင် စခန်းစွန့်ခွာထွက်ပြေးခဲ့သည်။

 

အဆိုပါ လွတ်ရှမ်းကျေးရွာရှိစစ်ကောင်စီစခန်းသည် အာဏာသိမ်းပြီးကာလမှသာ KNLA တပ်ရင်း (၁၆) နယ်မြေတွင် ဝင်ရောက်အခြေပြုတပ်စွဲထားသည့် စခန်းဖြစ်သည်။

 

စစ်ကောင်စီတပ်သား အင်အား (၃၀) ခန့်အထိုင်ချထားသော စခန်းဖြစ်​ကြောင်း သိရသည်။

 

အနန်းကွင်းစစ်ဗျူဟာကို KNLA တပ်ရင်းများနှင့်တော်လှန်ရေးပူးပေါင်းတပ်ဖွဲ့များ ထိုးစစ်ဆင်တိုက်ခိုက်သည့်အချိန်တွင် လွတ်ရှမ်းစခန်းသို့ စစ်ကူအင်အား(၆၀) ဝန်းကျင်ခန့် ထပ်မံစဝင်ရောက်အင်အားဖြည့်ခဲ့သည်။

 

အဆိုပါ စခန်းရှိ တပ်ဖွဲ့ဝင်များသည် ​ပြည်သူများအား ဖမ်းဆီးနှိပ်စက်ခြင်း၊ သတ်ဖြတ်ခြင်းများ ပြုလုပ်ခဲ့သည်ဟု ​ဒေသခံများကဆိုသည်။

 

လွတ်ရှမ်းစစ်ကောင်စီတပ်စခန်းအား KNLA တပ်ရင်းများနှင့် တော်လှန်ရေးပူးပေါင်းတပ်ဖွဲ့များမှ အချိန်အတော်ကြာ ဝိုင်းဝန်းပိတ်ဆို့ တိုက်ခိုက်ခဲ့ပြီး ဒရုန်းအဖွဲ့များဖြင့် နေ့စဉ်ဗုံးကျဲခဲ့သည်ဟု စစ်​ရေးသတင်းရင်းမြစ်များက ဆိုသည်။

 

ယင်းစခန်းရှိ စစ်ကောင်စီတပ်သားများ ထိခိုက် ကျဆုံးမှုများပြီး​နောက် စခန်းစွန့်ခွာထွက်ပြေးခဲ့သည်ဟုလည်း စစ်​ရေးရင်းမြစ်များက ​ပြောသည်။

 

စစ်ကောင်စီတပ်သည် အဆိုပါစစ်စခန်းမကျရှိရေးအတွက် လေယာဉ်ပစ်ကူများ၊ လက်နက်ကြီး ပစ်ကူများဖြင့် ခုခံခဲ့ရာ ကျေးရွာများအတွင်းကျရောက်၍ စာသင်ကျောင်းများ၊ လူနေအိမ်များနှင့် ဘုန်းကြီး ကျောင်းများလည်း ထိခိုက်ပျက်စီးမှုများရှိခဲ့သည်။

 

လွတ်ရှမ်းစစ်ကောင်စီစခန်းသည် ဘုရားသုံးဆူနှင့် သံဖြူဇရပ်လမ်းမကြီးပေါ်၌ တည်ရှိပြီး စစ်ကောင်စီအတွက် အရေးပါသော စစ်စခန်းများအနက် တစ်ခုအပါဝင်ဖြစ်သည်။

 

စစ်ကောင်စီသည် ဗုံးကျဲမှုများ၊ လက်နက်ကြီးပစ်ခတ်မှုများပြုလုပ်နေသည့်အတွက်ကြောင့် စစ်ဘေးရှောင်များ ကျေးရွာများသို့ ပြန်လည်ဝင်ရောက်နေထိုင်ရန် စိုးရိမ်မှုများဖြစ်နေသေး​ကြောင်း ​မြေပြင်သတင်းရင်းမြစ်များကဆိုသည်။

 

Burma Associated Press