ဇူလိုင် ၁၁။

 

အပြည်ပြည်ဆိုင်ရာ မြန်မာ့လေကြောင်း - MAI ၏ နိုင်ငံခြားဘဏ် စာရင်းများကို စင်ကာပူအခြေစိုက် UOB ဘဏ်က ပိတ်သိမ်းမည့်အပေါ် ထောက်ခံကြိုဆိုသည်ဟု မြန်မာနိုင်ငံ အလုပ်သမား တပ်ပေါင်းစုက ယမန်နေ့ ဇူလိုင် ၁၀ ရက်တွင် ထုတ်ပြန်သည်။

 

စင်ကာပူအခြေစိုက်ဘဏ် United Oversea Bank-UOB က မြန်မာ စစ်ကောင်စီနှင့် ပတ်သတ်သည့် Myanmar Airways International – MAI လေကြောင်းလိုင်းကို ယခုနှစ် ဇူလိုင်လ ၁ ရက်မှ စတင်ကာ UOB ကို အသုံးပြု ငွေပေးချေမှုများ ဆောင်ရွက်ခွင့်ပြုမည်မဟုတ်ဟု ဆိုထားသည်။

 

ထို့အပြင် ဘဏ်ရှိ MAI ၏ ဘဏ်စာရင်များကို သြဂုတ်လ ၁၅ ရက်တွင် ဖျက်သိမ်းမည်ဖြစ်ပြီး ကျန်ငွေ အားလုံးကို ငွေလွှဲထုတ်ပေးမည်ဖြစ်သည်။

 

ထိုသို့ UOB ၏ ဆုံးဖြတ်ချက်အပေါ် မြန်မာနိုင်ငံအလုပ်သမားတပ်ပေါင်းစုက ကြိုဆိုထောက်ခံသည်ဟု ထုတ်ပြန်ခဲ့ခြင်းဖြစ်သည်။

 

အရပ်သားများကို ထိခိုက်ဒဏ်ရာရစေမည့် လက်နက်များသာမက နှစ်မျိုးသုံး ပစ္စည်းများကို သတ်မှတ်ပြီး နိုင်ငံတွင်း ကုမ္ပဏီများကို မူဝါဒနှင့်အညီ အကောင်းဆုံး ကြပ်မတ်ပေးသည့် စင်ကာပူအစိုးရကိုလည်း ကျေးဇူးတင် သည်ဟု အဆိုပါ ထုတ်ပြန်ချက်တွင် ဖော်ပြထားသည်။

 

Burma Associated Press