ဇူလိုင် ၉။

 

တရုတ်သံအမတ်ကတောင်းဆိုသည့်အတွက် တရုတ်နှစ်သစ်ကူးနေ့ကို စစ်ကောင်စီက ရုံးပိတ်ရက် အဖြစ် လာမည့်နှစ်မှ စတင်ကာ သတ်မှတ်ပေးခဲ့သည်။

 

လာမည့် ၂၀၂၅ ခုနှစ် ပြက္ခဒိန်နှစ် အများပြည်သူအလုပ်ပိတ်ရက်များတွင် တရုတ်နှစ်သစ်ကူးနေ့ ပထမဆုံးအကြိမ်ပါဝင်လာခြင်းဖြစ်သည်။

 

ပြီးခဲ့သည့် ၂၀၂၃ နှင့် ၂၀၂၄ ခုနှစ်များတွင်ပြုလုပ်ခဲ့သည့် နှစ်သစ်ကူးနေ့အခမ်းအနားတွင် တရုတ်သံအမတ် Mr. Chen Hai က ဗိုလ်ချုပ်မှူးကြီး မင်းအောင်လှိုင်နှင့် တရုတ်နှစ်သစ်ကူးနေ့အား မြန်မာနိုင်ငံ အများပြည်သူအလုပ်ပိတ်ရက်အဖြစ် သတ်မှတ်ရန် ကိစ္စရပ်များနှင့်စပ်လျဉ်း၍ ဆွေးနွေးခဲ့ခြင်းဖြစ်သည်ဟု တရုတ်သံရုံးက ထုတ်ပြန်ထားသည်။

 

လာမည့်နှစ် ဇန်နဝါရီလ ၁ ရက် နိုင်ငံတကာနှစ်သစ်ကူးနေ့နှင့်အတူ တရုတ်နှစ်သစ်ကူးနေ့ကိုပါ အလုပ် ပိတ်ရက် သတ်မှတ်လိုက်သည့်အကြောင်း စစ်ကောင်စီက ဇူလိုင် ၈ ရက်တွင် ထုတ်ပြန်ခဲ့ခြင်း ဖြစ်သည်။

 

ယခုကဲ့သို့ တရုတ်နှစ်သစ်ကူးကို ပြက္ခဒိန်တွင်ထည့်သွင်းကာ ရုံးပိတ်ရက်အဖြစ် သတ်မှတ်ပေးသည့် အပေါ် တရုတ်သံရုံးကလည်း ကြိုဆိုခဲ့သည်။

 

ဓာတ်ပုံ- တရုတ်သံရုံးစာမျက်နှာ

 

Burma Associated Press