ဇူလိုင် ၂၁။

 

ဒေါပုံမြို့နယ်ကျောင်းသားများသမဂ္ဂ (ဗကသများအဖွဲ့ချုပ်) ဥက္ကဌဟောင်း ကိုဉာဏ်ဝင်းထက်ကို စစ်အုပ်စုက ဇူလိုင် ၂၀ ရက်တွင် ထောင်ဒဏ် ၅ နှစ် ထပ်မံချမှတ်ခဲ့သည်ဟု ဗမာနိုင်ငံလုံးဆိုင်ရာ ကျောင်းသားသမဂ္ဂများ အဖွဲ့ချုပ်ထံက သိရသည်။

 

စစ်တပ်က စွဲဆိုထားသော အကြမ်းဖက်တိုက်ဖျက်ရေး ဥပဒေပုဒ်မ (၃) ဖြင့် ရန်ကုန်အရှေ့ပိုင်းခရိုင် တရားရုံးက ထောင်ဒဏ် ၅ နှစ် ချမှတ်လိုက်ခြင်းဖြစ်သည်။

 

ကိုဉာဏ်ဝင်းထက်ကို စစ်တပ်က ၂၀၂၂ ခုနှစ် ဇွန်လ ၃၀ ရက်တွင် ဖမ်းဆီးခဲ့ခြင်း ဖြစ်သည်။

 

ထို့နောက် ၂၀၂၂ ခုနှစ် ဒီဇင်ဘာလ ၂၇ ရက်တွင် အကြမ်းဖက်တိုက်ဖျက်ရေး ဥပဒေပုဒ်မ ၅၁(ဂ) ဖြင့် ထောင်ဒဏ် ၈ နှစ်၊ အကြမ်းဖက်တိုက်ဖျက်ရေး ဥပဒေပုဒ်မ (၃) ဖြင့် ထောင်ဒဏ် ၇ နှစ် ချမှတ်ထားခဲ့ပြီး ယခုတစ်ကြိမ် ထောင်ဒဏ် ၅ နှစ် ချမှတ်ခံရခြင်းဖြစ်ကာ စုစုပေါင်း ထောင်ဒဏ် ၂၀ နှစ် ရှိလာပြီ ဖြစ်သည်။

 

ပြီးခဲ့သည့် ဇွန်လတွင်လည်း စစ်တပ်က ရန်ကုန်စီးပွားရေးတက္ကသိုလ်ကျောင်းသားများသမဂ္ဂ ဒုတိယဥက္ကဋ္ဌ ကိုထက်ပိုင်စိုးကို ထောင်ဒဏ် ၁၀ နှစ်၊ ဒဂုံတက္ကသိုလ်ကျောင်းသူ မဝတ်ရည်အောင်ကို ထောင်ဒဏ် သုံးနှစ် ထပ်မံ ချမှတ်ခဲ့သည်။

 

စစ်တပ်အာဏာသိမ်းပြီးနောက်ပိုင်း အကျဉ်းထောင်များတွင် ဖမ်းဆီးထိန်းသိမ်းခံထားရသည့် ကျောင်းသား/သူ ပေါင်း ၁၃၈ ဦး ရှိသည်ဟု နိုင်ငံရေးအကျဉ်းသားများကူညီစောင့်ရှောက်ရေးအသင်း-AAPPက ဇူလိုင် ၄ ရက်က ထုတ်ပြန်ထားသည်။

 

ဓာတ်ပုံ- ဗမာနိုင်ငံလုံးဆိုင်ရာ ကျောင်းသားသမဂ္ဂများအဖွဲ့ချုပ်

ပုံစာ- ဒေါပုံဗကသ ဥက္ကဌဟောင်း ကိုဉာဏ်ဝင်းထက်

 

 Burma Associated Press