Politics

ရန်ကုန်မြို့မှာ စက်သုံးဆီရဖို့ ညအိပ်တန်းစီရတဲ့အထိအခြေအနေဆိုးနေ

လွန်ခဲ့သော တစ်နှစ် က

ဒီဇင်ဘာ ၇။

ရန်ကုန်မြို့မှာ စက်သုံးဆီရဖို့ ညအိပ်တန်းစီရတဲ့အထိအခြေအနေဆိုးနေပြီး မှောင်ခိုစျေးကွက်မှာ ဓာတ်ဆီ တစ်လီတာကို ၇,၀၀၀ ကျပ်ကျော် အထိပေးဝယ်နေကြရပါတယ်။

စက်သုံးဆီရဖို့ မနက် ၃ နာရီကတည်းက ဆီဆိုင်ကြီးတွေမှာ ပေးနိုင်မယ်လို့ ယူဆရတဲ့ စက်သုံးဆီဆိုင်ကြီးတွေမှာ ကားအစီးရေ ၂၀၀ ကျော် တန်းစီနေကြရပါတယ်။

"ဆီရှားပါး၊ ဝယ်ရခက်မှန်းသိသိကြီးနဲ့ တစ်လီတာကို ၅ ထောင်ကျပ်လောက် ပြန်ရောင်းနေတာတွေက ရုပ်ပေါက်လွန်းပါတယ်၊ အမြတ်မယူပါနဲ့လို့လည်း မပြောဘူး၊ ဈေးမှန် အမြတ်မှန်ရောင်းတဲ့လူကို မပြောပါ လိပ်ပြာလုံကြပါစေ။"လို့ တောင်ဒဂုံမြို့နေသူတစ်ဦးက ပြောပါတယ်။

ဆီဆိုင်တွေရှေ့မှာ တန်းစီထားတဲ့ကားက ကိုယ်ထည့်မဲ့အလှည့်ရောက်ရင် စက်သုံးဆီကုန်သွားတာနဲ့ ကြုံရလို့ ရပ်ကွက်အတွင်းက ဆီဆိုင်အချို့မှာ ဆီတစ်လီတာကို ၆ ထောင်ထိ ပေးဝယ်နေကြရတယ်လို့ ရန်ကုန်မြို့ နေထိုင်သူတွေက ပြောပါတယ်။

ဒီဇင်ဘာ ၅ ရက်မှာ တစ်နိုင်ငံလုံးက စက်သုံးဆီ အရောင်းဆိုင် သုံးသောင်းကျော်မှာ ဆီသယ်ယာဉ် ၁,၇၂၉ စီးနဲ့ 92 ဂါလန် ၉ သိန်း ၇ သောင်းကျော်၊ 95 ဂါလန် ၂ သိန်း ၅ သောင်းကျော်၊ ဒီဇယ်ဂါလန် ၆ သိန်း ၅ သောင်းကျော်၊ ပရီမီယံ ဒီဇယ်ဆီ ၈ သိန်း ၃ သောင်းကျော် ဖြန့်ဖြူးပေးပြီး ဆီတင်သင်္ဘောများလည်း ရန်ကုန်ပင်လယ်၀ ရောက်ရှိနေကြောင်း စစ်ကောင်စီက ပြောဆိုထုတ်ပြန်ထားပါတယ်။

ဒီလိုပြောဆိုနေပေမယ့်လည်း ဒီဇင်ဘာ ၆ ရက် မနက်ကနေ ည ၁၁ နာရီထိ ဆီဆိုင်တွေမှာ တန်းစီသူ များပြားနေပြီး ဆီဆိုင်ကြီးအချို့ ဆီပြတ်လပ်လို့ရောင်းရင်းပိတ်သွားတာ၊ အချို့ဆိုင်တွေ မနက်ကတည်းက ပိတ်ထားတယ်လို့ ရန်ကုန်မြို့နေသူတွေက ပြောပါတယ်။

"မနေ့ညက တန်းစီနေရင်း ကိုယ့်အလှည့် မရောက်ခင် ၂ စီး အလိုမှာ ဆီကုန်သွားတယ်တဲ့၊ ၄ နာရီ ဆီတန်းစီထားရတာ ဆီပြတ်သွားလို့ မနက် ၄ နာရီမှ ပြန်လာခဲ့ပါတဲ့၊ ထည့်လာတဲ့ ဆီလက်ကျန်က ကားတန်း စီတာနဲ့ ကုန်တော့မယ်၊ အိမ်ပြန်ဖို့ ဆီကို ရပ်ကွက်ထဲက ဆိုင်တစ်ခုမှာ တစ်လီတာကို ၆ ထောင်ပေးဝယ်ခဲ့ ရတယ်"လို့ ရန်ကုန်မြို့ နေထိုင်သူတစ်ဦးက ပြောပါတယ်။

ဒီဇင်ဘာ ၇ ရက်နေ့ထုတ် စစ်ကောင်စီဝါဒဖြန့်သတင်းစာမှာတော့ ပြည်သူများအနေနဲ့ ဆီကို လိုအပ်တာထက် ပိုမို ဝယ်ယူခြင်းများ မပြုလုပ်ကြရန်နဲ့ လတ်တလော စက်သုံးဆီ ပြတ်လပ်မှု မရှိကြောင်းအသိပေးထားပါတယ်။

ဒီဇင်ဘာ ၇ ရက်နေ့မနက်အထိ ဆီတန်းစီသူတွေ ရာနဲ့ချီ ရှိနေပြီး၊ အခြေခံလူတန်းစားတွေ နေတဲ့ရပ်ကွက် အချို့မှာတော့ မနက်ဆီဆိုင်က ဆီပေးရင်ရဖို့ ကားတွေကို ညစောင့်ခပေးပြိး ညအိပ်ရပ်ထားရတယ်လို့ စက်သုံးဆီတန်းစီသူတွေက ပြောပါတယ်။

" ကားတစ်စီး ၅၀၀ ပေးရတယ်၊ ညစောင့်ပေးတယ်၊ မနက် ၄ နာရီရဖို့ ကားထားခဲ့လ်ို့ရတယ်၊ မြောက်ဒဂုံ ၄၄ ထိပ်က ဆီဆိုင်မှာ အစီး ၂၀ တစ်ယောက်နှုန်းနဲ့ ညစောင့်ခေါ်လ်ို့ရတယ်"လို့ မြောက်ဒဂုံနေသူတစ်ဦးက ပြောပါတယ်။

စက်သုံးဆီပြတ်သွားလို့ ဘေးတွဲဆိုင်ကယ်တွေလည်း ပုံမှန်မထွက်နိုင်ပဲ ၄ နာရီဝန်းကျင်ထိ တန်းစီ နေကြရတယ်လို့ သိရပါတယ်။

"ဆီတန်းစီနေရလို့ ဂိတ်တွေမှာ ဘေးတွဲမရှိလို့ ဆိုက်ကားတွေ ပြန်စီးလာကြပြီ၊ တန်းမစီဘဲ မှောင်ခိုဝယ်ရင် ဆွဲရတာ မကိုက်တော့ ဘေးတွဲသမားတွေဆီပေးတဲ့ဆိုင်လိုက်ရှာရင်း ဆီကုန်ကြတယ် "လို့ သာကေတ မြို့နေသူတစ်ဦးက ပြောပါတယ်။