သြဂုတ် ၁၅။

 

ရန်ကုန်မြို့က ဆေးနဲ့ဆေးပစ္စည်းအရောင်းဆိုင်တွေမှာ နာတာရှည်လူမမာတွေသုံးစွဲနေရတဲ့ ဆေးဝါးတွေ စျေးမြင့်တက်နေပြီး ပစ္စည်းအများအပြားပြတ်လပ်နေတယ်လို့ ဆေးဆိုင်အချို့ဆီက သိရပါတယ်။

 

"စျေးကမငြိမ်တော့ ကုမ္ပဏီတွေကလည်းလိုသ လောက် မချပေးဘူး၊ ဆယ်မျိုးရှိရင် ၈ မျိုးလောက်ကပြတ်နေတယ်၊ အားလုံးနီးပါးက နိုင်ငံခြားကသွင်းရတော့ ထိန်း​​နေရတဲ့သဘောမျိုး" လို့ ရန်ကုန်မြို့ ဗိုလ်ချုပ်စျေးက ဆေးဆိုင်ပိုင်ရှင်တဦးက ပြောပါတယ်။

 

နိုင်ငံခြားငွေဈေးမြင့်တက်လာမှုကြောင့် နိုင်ငံခြားကနေ အများဆုံးသွင်းနေရတဲ့ ဆေးဝါးဈေးနှုန်း​တွေမြင့်တက်နေပြီး၊ ဆေးကုမ္ပဏီအများစုက အရောင်းပိတ်ထားတာရှိနေတယ်လို့ အရောင်းဆို​င်အချို့ဆီက သိရပါတယ်။

 

နေ့စဥ်သုံးစွဲနေရတဲ့ နှလုံး၊ သွေးချို၊ ဆီးချို၊ သွေးတိုး ကျောက်ကပ် ကင်ဆာရောဂါအမျိုးမျိုးသောက်တဲ့ ဆေးဝါးတွေဈေးနှုန်းကြီးမြင့်လာတာအပြင် ဝယ်ယူရခက်ခဲနေတယ်လို့ ဆေးအသုံးပြုသောက်သုံးနေရသူတွေက ဆိုပါတယ်။

 

နှလုံး၊ အသည်း၊ ကျောက်ကပ်၊ ဆီးချို စတဲ့ဆေးသောက်သုံးနေရတဲ့ အခြေခံလူတန်းစားအချို့က ဆေးပြတ်လတ်မူဒဏ်၊စျေးနူန်းကြီးမြင့်ပြီးဝယ်သောက်နေရတာကြောင့် အချို့ဆေးမသောက်ပဲ နေနေကြရတယ်လို့ ပြောပါတယ်။

 

"နေ့စဉ်သောက်နေရတဲ့ ဆီးချို၊ နှလုံး၊ သွေးတိုး ကျောက်ကပ်ဆေးတွေ သောက်နေကျတံဆိပ်တွေမရှိတော့ဘူး၊ ပြတ်နေတာများတော့ ရတာပဲယူရတယ်၊ အချို့ဆိုင်ဆိုတန်းစီစနစ်နဲ့ဝယ်ခဲ့ရတယ်၊ မရတဲ့ဆေးများတယ် ​ဈေးက ၃ ဆ လောက်မြင့်သွားတာ၊ အချို့ဆေးတွေဆိုဝယ်မသောက်နိုင်တော့လို့ ဖြတ်ထားရတယ်"လို့ နှလုံးရောဂါအတွက် ဆေးသောက်နေရတဲ့ ရန်ကုန်မြို့ခံတဦးကပြောပါတယ်။

 

စစ်တပ်ကအာဏာသိမ်းယူပြီး ၃ နှစ် ကျော်ကာလအတွင်းမှာ မြန်မာကျပ်ငွေတန်ဖိုးစံချိန်တင်ကျဆင်းနေပြီး အခြေခံစားသောက်ကုန်ဈေးနှုန်းတွေဟာ အဆမတန်မြင့်တက်နေတာကြောင့် နာတာရှည်ဆေးသောက်နေရတဲ့သူတွေ ဒုက္ခရောက်နေကြရတယ်လို့ ဆိုပါတယ်။

 

"အရင်တလဆေးဖိုး ၄ သောင်းဝန်းကျင်ပဲကုန်တာ၊ ခုနောက်ပိုင်းတသိန်းကျပ်နားကပ်နေပြီ၊ ရေရှည်မသောက်နိုင်တော့ဘူး၊ အရေးကြီးတဲ့၂မျိုးလောက်ပဲသောက်တယ်၊ ဒီထက်စျေးကြီးလာရင် မသောက်တော့ဘူး၊ သေခါမှသေတော့"လို့ ရန်ကုန်မြို့က အငှားယာဥ်မောင်းတဦးက ပြောပါတယ်။

 

မြန်မာနိုင်ငံအတွင်းကို ပြည်ပကနေဆေးဝါးတင်သွင်းရာမှာ အိန္ဒိယ၊ ထိုင်း၊ ဗီယက်နမ်၊ ဘင်္ဂလာဒေ့ရှ်၊နဲ့ တရုတ်နိုင်ငံတို့ကနေ အများဆုံးတင်သွင်းနေတယ်လို့ သိရပါတယ်။

 

ဆေးတွေကစျေးကြီးပြီးပြတ်လပ်မူတွေကြောင့် ရပ်ကွက်အတွင်းဖွင့်ထားတဲ့ အထွေထွေရောဂါကုဆေးခန်းတွေလဲ စျေးမြင့်ကာ ကုသနေရတယ်လို့ ရန်ကုန်မြို့ခံဆရာဝန်တဦးက ပြောပါတယ်။

 

"အရင်ကတုပ်ကွေးဖျားတာမျိုးဆေးခန်းပြရင်တသောင်းကျပ်ပဲယူရတာ၊ ခုဒီလပိုင်းဆေးစျေးတက်တော့ တသောင်းခွဲယူရတယ်၊ သောက်ဆေးရော ထိုးဆေးပါစျေးအကုန်တက် ပစ္စည်းကပြတ်နဲ့တုပ်ကွေးရာသီဆိုတော့ အားလုံးခက်ခဲနေကြရတယ်" လို့ပြောပါတယ်။

 

ပြီးခဲ့တဲ့ ဇူလိုင်လအတွင်းကတော့ ဆေးကုမ္ပဏီတွေက ပြည်သူတွေ လိုအပ်နေတဲ့ ဆေးဝါးတွေကို တိုက်ရိုက်ရောင်းချပေးမယ်လို့ မြန်မာနိုင်ငံဆေးနှင့် ဆေးပစ္စည်းလုပ်ငန်းရှင်များအသင်း (MCCPMD) ကနေ ထုတ်ပြန်ထားပါတယ်။

 

Burma Associated Press