မတ် ၃၀

သံလွင်မြစ်ကမ်းနားတွင်တည်ရှိသည့် မယ်တရိထာ(ခေါ်) မယ်ခါးထာစခန်းကို KNLA-ကရင်အမျိုးသား လွတ်မြောက်ရေးတပ်မတော်နှင့် ပူးပေါင်းတပ်က သိမ်းယူစဉ်ဒဏ်ရာရထွက်ပြေးသည့် စစ်ကောင်စီ တပ်သား အချို့ကို ထိုင်းတော်ဝင်တပ်မတော်က ဆေးကုသပေးနေသည်ဟု ကရင်အမျိုးသား အစည်းအရုံးတပ်မဟာ (၅) က သတင်းထုတ်ပြန်သည်။

 

မယ်တရိထာ(ခေါ်)မယ်ခါးထာစခန်းသည် ယခင် KNLA-ကရင်အမျိုးသား လွတ်မြောက်ရေးတပ်မတော်၊ တပ်ရင်း(၂၀)အခြေစိုက်ရာဒေသဖြစ်ကာ ၁၉၉၅ ခုနှစ် KNUဗဟိုဌာနချုပ်-မာနယ်ပလောကျဆုံးအပြီး စစ်ကောင်စီတပ်က အလုံးအရင်းဖြင့်ထိုးစစ်ဆင်သိမ်းယူထားသည့် KNLA စခန်းဟောင်း ဖြစ်သည်ဟု KNU ကဆိုသည်။

 

အဆိုပါ စခန်းကို KNLA-ကရင်အမျိုးသားလွတ်မြောက်ရေးတပ်မတော်နှင့် ပူးပေါင်းတပ်က မတ်လ ၂၈ ရက် မနက် ၅ နာရီအချိန်တွင် ပြန်လည် တိုက်ခိုက်သိမ်းယူလိုက်သည်။ အဆိုပါ စခန်းသိမ်းတိုက်ပွဲသည် ၄၅ မိနစ်သာ ကြာမြင့်သည်ဟုလည်း သိရသည်။

 

တိုက်ပွဲအပြီး စစ်ကောင်စီတပ်ဖွဲ့ ၁၆ ဦး သေဆုံးကာ ၇ ဦး ဒဏ်ရာရရှိခဲ့သည်ဟု KNU ကဆိုသည်။

 

ဒဏ်ရာရသူများအနက် ၅ ဦးသည် ထိုင်းနိုင်ငံဖက်ခြမ်းသို့ ကူးခတ် လွတ်မြောက်သွားပြီး ယခုအချိန်တွင် ထိုင်း တော်ဝင်တပ်မတော်က နီးစပ်ရာ ထိုင်းပြည်သူ့ဆေးရုံတွင် ဆေးကုသမှုပေးလျှက်ရှိနေသည်ဟုလည်း ဖော်ပြထား သည်။

 

စခန်းပြန်လည်သိမ်းယူအပြီး စစ်ကောင်စီ၏လက်နက်မျိုးစုံဖြစ်သည့် MA-1, MA-2, MA-4, RPG-7, ၆၀ မမ စိန်ပြောင်း၊ စက်လတ်နှင့် စနိုက်ပါ စုစုပေါင်း ၂၃ လက်နှင့် ကျည် ၃,၃၆၀ တောင့်အပြင် ဆက်သွယ်ရေးစက်(၂)လုံး၊ စကားပြောစက်(၂)လုံး၊ ဖုန်း(၂)လုံး၊ ဓာတ်ခဲဗူး(၄)ဗူးနှင့် စစ်ဘောင်းဘီ(၂)ထည် သိမ်းဆည်းရမိသည်ဟု KNU ထံမှ သိရသည်။

 

တိုက်ပွဲအတွင်း မိမိတို့ KNLA-ကရင်အမျိုးသားလွတ်မြောက်ရေးတပ်မတော်နှင့် FFD ပူးပေါင်းတပ်မှ တစ်ဦး ကျဆုံးပြီး ရှစ်ဦး ဒဏ်ရာရရှိခဲ့ကြောင်း သိရသည်။

 

BAP သတင်းဌာနက စုစည်းထားသည့် အချက်အလက်များအရ အာဏာသိမ်းပြီးနောက် စစ်ကောင်စီသည် ကရင် ပြည်နယ်အတွင်းရှိ ခြေကုပ်စခန်း ၁၁ ခု ထက်မနည်းကို လက်လွှတ်ခဲ့ရပြီး ဖြစ်သည်။

 

ပုံစာ - စစ်ကောင်စီလက်လွှတ်ခဲ့ရသည့် သံလွင်မြစ်ကမ်းပေါ်ရှိ မယ်တရိထာစခန်း( ဓာတ်ပုံ - KNU တပ်မဟာ (၅) )

Burma Associated Press