မတ်လ ၁၈

 

စစ်ကောင်စီမှ ကေအဲန်ယူ-ကရင်အမျိုးသားအစည်းအရုံး ကော်သူးလေအုပ်ချုပ်နယ်မြေ၊ ခလယ်လွီထူခရိုင် တပ်မဟာ(၃)၊ မူးမြို့နယ်အတွင်းရှိ ကျေးရွာများအတွင်းသို့ လက်နက်ကြီး ၄၂ လုံးပစ်ခတ်ခဲ့ရာ ကျေးရွာ နှစ်ရွာမှ ဒေသခံပြည်သူ ၁၁၆၂ ဦးထွက်ပြေးတိမ်းရှောင်နေရကြောင်း KNU ထံမှသိရသည်။

 

ယမန်နေ့ မတ်လ ၁၇ ရက်မနက်ပိုင်းက စစ်ကောင်စီတပ်နှင့် ကရင်အမျိုးသားလွတ်မြောက်ရေးတပ်မတော် (K.N.L.A) တပ်မဟာ (၃)၊ တပ်ရင်း (၈) ပူးပေါင်းတပ်များထိတွေ့တိုက်ပွဲဖြစ်ပွားခဲ့ခြင်းဖြစ်သည်။

 

ထိတွေ့တိုက်ပွဲဖြစ်ပွားသည်နေရာမှာ ထွနီကုန်းကျေးရွာနှင့် ဆေးပုလဲကျေးရွာအကြားဖြစ်ပြီး၊ စစ်ကောင်စီတပ်မှ လက်နက်ကြီး ၄၂ လုံးပစ်ခတ်ခဲ့ရာ၊ ထွနီကုန်းကျေးရွာမှ ဘိုးပိုက်ဆံ(ဗြမ္မာရ်စို) ဘာသာရေး အဆောက်အအုံတခု ထိခိုက်ပျက်စီးခဲ့ကြောင်း KNU ကထုတ်ပြန်သည်။

 

ထို့ပြင် ဒရုန်းဖြင့်လက်နက်ကြီး (၄)လုံးကိုလည်း ရေလဲ(ဗမာ) ဘုန်းကြီးကျောင်းပေါ်သို့ ထပ်မံပစ်ချခဲ့ရာ ဘုန်းကြီးကျောင်းဆွမ်းစားဆောင် နှင့်ဓမ္မာရုံ အမိုးများပျက်စီးခဲ့သည်ဟုသိရသည်။

 

စစ်ကောင်စီတပ်မှ လက်နက်ကြီးများပစ်ခတ်မှုကြောင့် ဒေသခံပြည်သူအချို့မှာ နီးစပ်ရာဗုံးခိုကျင်းအတွင်း ပုန်းခိုခဲ့ကြရပြီး၊ ထွနီကုန်းကျေးရွာနှင့် ဆေးပုလဲကျေးရွာ ၂ ရွာမှပြည်သူ ၁,၁၆၂ ဦးမှာအသက် ဘေးလွတ်ရာသို့ ထွက်ပြေးတိမ်းရှောင်ခဲ့ရကြောင်း KNU ကဆိုသည်။

 

Photo Crd KNU