ဧပြီ ၂။

 

ကရင်အမျိုးသားအစည်းအရုံး-KNU၊ တပ်မဟာ ၆ နယ်မြေအတွင်း မတ်လ ၂၅ မှ ၃၁ ရက်ထိ တိုက်ပွဲများတွင် စစ်ကောင်စီဘက်က ၂၃ ဦး သေဆုံး၊ ၈ ဦး ဒဏ်ရာရ၊ ၁၁ ဦး အရှင်ဖမ်းမိခဲ့သည်ဟု ကော်ဘရာစစ်ကြောင်းက ယမန်နေ့က ထုတ်ပြန်သည်။

 

မြဝတီကုန်သွယ်ရေးဇုန်အနီးရှိ စစ်ကောင်စီတပ်ရင်းတို့အား တပ်မဟာ(၆) KNU/KNLA၊ ကော်ဘရာ စစ်ကြောင်း၊ ကျားသစ်နက်စစ်ကြောင်း၊ Federal Wings၊ Golden Eagle၊ ရောင်နီ စသည့် ပူးပေါင်းတပ်ဖွဲ့တို့က မတ်လ ၂၅ ရက်၌ စီးနင်းခဲ့သည့် တိုက်ပွဲတွင် ဗိုလ်ကြီး ၁ ဦး အပါအဝင် ၁၁ ဦး သေဆုံးခဲ့ပြီး ၃ ဦး ဒဏ်ရာရရှိခဲ့သည်။

 

ထို့အပြင် ဒုရဲမှူး ၁ ဦး၊ တပ်ကြပ်ကြီး ၁ ဦး၊ တပ်ကြပ် ၂ ဦး၊ ဒုတပ်ကြပ် ၂ ဦး၊ တပ်သား ၁ ဦးနှင့် ဒုတပ်ကြပ် ဇနီး ၁ ဦးအပါအဝင် ၈ ဦး အရှင်ဖမ်းဆီးနိုင်ခဲ့ပြီး လက်နက်ခဲယမ်းနှင့် စစ်အသုံးအဆောင်ပစ္စည်းများ သိမ်းဆည်းရ မိခဲ့သည်ဟု ထုတ်ပြန်ချက်တွင် ဆိုထားသည်။

 

အဆိုပါတိုက်ပွဲတွင် ကော်ဘရာစစ်ကြောင်းမှ ရဲဘော် ၁ ဦး ကျဆုံးခဲ့ပြီး ၂ ဦး ဒဏ်ရာရခဲ့သည်။

 

ရွှေမြစန္ဒီမြို့သစ်အား မတ်လ ၂၈ နှင့် ၂၉ ရက်တွင် စစ်ကောင်စီတပ်က လက်နက်ကြီးဖြင့် အကြိမ်ရေ ၆၈ ကြိမ် ထက်မနည်း ပစ်ခတ်ခဲ့ရာ နေအိမ် ၁၃ လုံးထိမှန်ပြီး ၁ လုံး မီးလောင်ပြာကျခဲ့သည်။

 

ပူးပေါင်းတပ်ဖွဲ့ဘက်မှ ဒရုန်းနှင့် စနိုက်ပါ အသုံးပြုပြီး ပြန်လည်ပစ်ခတ်ခဲ့သည့်အတွက် BGF ၁ ဦး၊ ဗိုလ်ကြီး ၁ ဦးနှင့် IO ၁ ဦး သေဆုံးပြီး ၃ ဦး ဒဏ်ရာရခဲ့သည်။

 

မြဝတီကုန်သွယ်ရေးဇုန်အနီး သင်္ကန်းညီနောင်ရဲစခန်းအား မတ်လ ၃၀ ရက်တွင် Sniper ဖြင့် ပစ်ခတ်ခဲ့ရာ စစ်ကောင်စီဘက်က ၃ ဦး သေဆုံးခဲ့သည့်အပြင် နယ်ကျွံလာသည့် BGF ဗိုလ်ကြီး ၁ ဦးအပါအဝင် ၃ ဦး အရှင်ဖမ်းဆီးရမိခဲ့သည်ဟု ထုတ်ပြန်ချက်တွင် ဆိုသည်။

 

မတ်လ ၃၁ ရက်တွင် စစ်ကောင်စီဘက်က လက်နက်ကြီး ၁၃၅ ကြိမ် ပစ်ခတ်ခဲ့ပြီး လူနေအိမ် အများအပြား မီးလောင်ခဲ့သည်။ ပူးပေါင်းတပ်ဖွဲ့ဘက်က ပြန်လည်တိုက်ခိုက်ရာတွင် BGF ၆ ဦး သေဆုံးပြီး ၂ ဦး ဒဏ်ရာ ရခဲ့သည်ဟု ဆိုထားသည်။

 

Burma Associated Press