ကရင်၊ မတ် ၂၁။

 

ကေအန်ယူထိန်းချုပ်ရာ နယ်မြေများဖြစ်သည့် ခလယ်လွီထူခရိုင် တပ်မဟာ ၃၊ ဆောထိမြို့နယ်၊ လယ်ဒို မြို့နယ်နှင့် မူးမြို့နယ်တို့တွင် မတ်လ ၁ ရက်မှ ၂၀ ရက်အထိ စစ်ကောင်စီ၏ စစ်ကြောင်းထိုးမှုနှင့် လူ့အခွင့်ရေး ချိုးဖောက်မှုများကြောင့် ကျေးရွာပေါင်း ၄၆ ရွာမှ ဒေသခံပြည်သူများ ရွာလုံးကျွတ် ထွက်ပြေးတိမ်းရှောင် နေရသည်ဟု KNUက ယနေ့ ထုတ်ပြန်သည်။

 

ဆောထိမြို့နယ်ရှိ ကျေးရွာများအတွင်းသို့ စစ်ကောင်စီတပ်က မတ်လ ၁ ရက်မှ ၁၉ ရက်ထိ လက်နက် ကြီး ၂၆၁ လုံးထက်မနည်း ပစ်ခတ်ခဲ့သဖြင့် ဒေသခံပြည်သူ ၃ ဦး ထိခိုက်ဒဏ်ရာရပြီး ကျေးရွာပေါင်း ၂၇ ရွာမှ ပြည်သူများ ရွာလုံးကျွတ် ထွက်ပြေးတိမ်းရှောင်နေရသည်ဟု KNUက ဆိုသည်။

 

ထိုနည်းတူ မတ်လ ၁ ရက်မှ ၁၉ ရက်ထိ လယ်ဒိုမြို့နယ်ရှိ ကျေးရွာများအတွင်းသို့ စစ်ကောင်စီတပ်က လက်နက်ကြီး ၁၈၁ လုံးထက်မနည်း ပစ်ခတ်ခဲ့သဖြင့် ဒေသခံပြည်သူ ၆ ဦး ထိခိုက်ဒဏ်ရာရပြီး ကျေးရွာပေါင်း ၁၂ ရွာမှ ပြည်သူ ၁၀,၂၂၁ ဦးမှာ ရွာလုံးကျွတ် ထွက်ပြေးတိမ်းရှောင်နေရသည်။

 

ထို့ပြင် မတ်လ ၁ ရက်မှ ၂၀ ရက်ထိ မုန်းမြို့နယ်အတွင်း စစ်ကောင်စီတပ်၏ လက်နက်ကြီးအပြင် လက်နက်ကြီး တပ်ဆင်ထားသော ဒရုန်းများဖြင့် နေ့စဉ်ပစ်ခတ်မှုကြောင့် ကျေးရွာပေါင်း ၇ ရွာမှ ပြည်သူပေါင်း ၄,၁၅၂ ဦး ထွက်ပြေးတိမ်းရှောင်နေရသည်ဟုဆိုသည်။

 

စစ်ကြောင်းထိုး ဝင်ရောက်လာသော စစ်ကောင်စီတပ်များနှင့် ကရင်အမျိုးသားလွတ်မြောက်ရေး တပ်မတော် (K.N.L.A) တပ်မဟာ (၃) လက်အောက်ရှိ တပ်ရင်း(၇)၊ တပ်ရင်း(၉)၊ ကရင်အမျိုးသား ကာကွယ်ရေးတပ်ဖွဲ့ (K.N.D.O) တပ်ရင်း(၃)၊ Drone တပ်ဖွဲ့များ၊ ပူးပေါင်းတပ်များအကြား ထိပ်တိုက်ရင်ဆိုင်တိုက်ပွဲများ ဖြစ်ပွား လျက်ရှိသည်ဟု KNU၏ ထုတ်ပြန်ချက်တွင် ဆိုထားသည်။

 

ပုံစာ - မူးမြို့နယ်အတွင်းရှိ ကျေးရွာများအတွင်းသို့ စစ်ကောင်စီတပ်က လက်နက်ကြီးများဖြင့် ပစ်ခတ်မှုကြောင့် ထိမှန်ခဲ့သည့်အဆောက်အဦတစ်ခု

 

Burma Associated Press