ဇန်နဝါရီ ၃၁။

 

မကွေးတိုင်း၊ နတ်မောက်မြို့မှာ ဖေဖော်ဝါရီ ၁ ရက်အသံတိတ်သပိတ်လုပ်ရင် အရေးယူမယ်လို့ အာဏာသိမ်းစစ်တပ်က လိုက်လံကြေညာနေတယ်လို့ နတ်မောက်မြို့ခံအချို့ဆီက သိရပါတယ်။

 

"ဘယ်လိုအရေးယူမယ်လို့တော့မပြောဘူး၊ အရေးယူမယ်လို့ မနေ့ညက အော်သံပဲကြားလိုက်တာ၊ ကားပေါ်ကနေအမြန်အော်သွားတာသူတို့လုပ်မှ အသံတိတ်သပိတ်ကို လူတွေပိုသိသွားတော့တယ်" လို့ နတ်မောက်မြို့နေသူတဦးက ပြောပါတယ်။

 

စစ်တပ်အာဏာသိမ်းမှု ၃ နှစ်ပြည့်တဲ့ ဖေဖော်ဝါရီ ၁ ရက်နေ့မှာ အသံတိတ်သပိတ်နဲ့ အဖြူရောင် လှုပ်ရှားမှု ပြုလုပ်သွားမယ်လို့ အထွေထွေသပိတ် ပေါင်းစပ်ညှိနှိုင်းရေးအင်အားစု (GSCB) က ဇန်နဝါရီ ၃၀ ရက်က ကြေညာထားပါတယ်။

 

ဖေဖော်ဝါရီ ၁ ရက် မနက် ၁၀ နာရီကနေ ညနေ ၄ နာရီအတွင်း လမ်းမတွေနဲ့ အများပြည်သူဆိုင်ရာ နေရာတွေကိုမထွက်ဘဲ ကိုယ့်အိမ်၊ ကိုယ့် ဈေးဆိုင်၊ ကိုယ့်ရုံး၊ ကိုယ့်အမိုးအကာအောက်နေထိုင်ပြီး အသံတိတ်သပိတ်မှာ ပါဝင်ဖို့ GSCB က တောင်းဆိုထားပါတယ်။

 

မကွေးမြို့မှာလဲ စည်ပင်သာယာရေးအဖွဲ့က ဖေဖော်ဝါရီ ၁ ရက်နေ့မှာ စျေးဆိုင်များမပိတ်ဖို့ အသံတိတ်သပိတ် မှာမပါဝင်ဖို့ စျေးဆိုင်ပိုင်ရှင်များကို အသိပေးနေတယ်လို့မကွေးမြို့ခံအချို့ဆီက သိရပါတယ်။

 

ဦးမင်းကိုနိုင်အပါဝင် ဒေါက်တာတေဇာစန်းနဲ့တော်လှန်ရေး သပိတ်ခေါင်းဆောင်​တွေက ဖေဖော်ဝါရီလ ၁ ရက် နွေဦးတော်လှန်ရေး ၃ နှစ်ပြည့်အဖြစ် အသံတိတ်သပိတ်မှာ ပါဝင်ကြဖို့တိုက်တွန်းထားတာပါ။

 

ဓါတ်ပုံ-လူမှုကွန်ရက်

 

Burma Associated Press