ဇွန် ၂၆။

 

စစ်ကောင်စီလက်အောက်ခံပအိုဝ်းပြည်သူ့စစ်တွေကရှမ်းပြည်နယ်တောင်ပိုင်း ဆီဆိုင်မြို့နယ် လွယ်မောဒေသက ရဟန်းသံဃာတော်​တွေ သတိထားသွားလာဆင်ခြင်ကြရန်နဲ့ စစ်ဆေးတဲ့အချိန်အစစ်ဆေးမခံပါက PNO ရဲဘော်​တွေရဲ့အမှား မဟုတ်လို့ဆိုပြီးပြောဆို ခြိမ်းခြောက်နေတယ်လို့ သိရပါတယ်။

​

ရဟန်းသံဃာတွေရဲ့ သင်္ကန်းကိုရိုသေပေမယ့် လူကိုမရိုသေနိုင်လို့ပြောဆိုနေပြီး လွယ်မောဒေသရှိ ရဟန်းသံဃာ​တွေကို ပြည်သူ့စစ်က ပြောဆိုခြိမ်းခြောက်သွားခဲ့တယ်လို့ ​ပအိုဝ်းအမျိုးသားလွတ်မြောက်ရေးတပ်မတော်က အသိပေးထားပါတယ်။

 

ဇွန်လ ၁၉ ရက်နေ့က စစ်ကောင်စီနဲ့လက်အောက်ခံ PNO ပြည်သူ့စစ်က ပင်လောင်းမြို့နယ် နမ့်တုတ်ကျေးရွာအုပ်စု လွယ်ကျိုင်းကျေးရွာ ဘုန်းတော်ကြီးကျောင်းကို လက်နက်ကြီး​တွေ ဒရုန်း​တွေနဲ့တိုက်ခိုက်ခဲ့တာကြောင့် ကျောင်းထိုင်ဆရာတော် ဦးနေမိန္ဒ သက်တော် ၃၉ နှစ် ပျံလွန်တော်မူခဲ့တဲ့ ဖြစ်စဥ်တခုဖြစ်ပွားခဲ့ပါတယ်။

 

ဒီဖြစ်စဥ်ဖြစ်ပွားခဲ့တဲ့အပြီး ဇွန်လ ၂၄ ရက်က သံဃာတော်တွေ အသွားအလာဆင်ခြင်ဖို့ သတိပေးခဲ့တာလို့ မြို့ခံအချို့က ပြောပါတယ်။

 

"ဆီဆိုင်မြို့မဝင်ခင်ဟိုပုံးမြို့ထွက်ကတည်းက တလမ်းလုံးမှန်ချမောင်းရတယ်၊ နေပူပူ မိုးရွာရွာတံခါးဖွင့်ထားရတယ်၊ ပအိုဝ်းပြည်သူ့စစ်တွေထဲမှာ သေနတ်ကိုင်ထားတဲ့စစ်သားတွေက အရက်မူးနေတာများတယ်၊ သူတို့တားလို့မရပ်ရင်ပစ်ဖို့အဆင်သင့်မောင်းတင်ထားကြတာ၊ ဦးနှောက်မရှိသူတွေလက်ထဲ သေနတ်ရှိ​နေတော့ ပြည်သူ့အသက်က အလကားတန်ဖိုးမရှိဘူးလို့"ဆီဆိုင်မြို့ခံတဦးကပြောပါတယ်။

 

ဒီရက်ပိုင်းအတွင်း ဆီဆိုင်မြို့နယ် လွယ်မောတောင်ဒေသမှာတိုက်ပွဲများဖြစ်ပွားခြင်းမရှိပေမယ့် စစ်ကောင်စီနဲ့စစ်ကောင်စီလက်အောက်ခံ PNO ပြည်သူ့စစ်​တွေက လက်နက်ကြီး​တွေနဲ့ ရမ်းသမ်းပစ်ခတ်မှုပြုလုပ်နေတယ်လို့ ဆိုပါတယ်။

 

စစ်ကောင်စီနဲ့ လက်အောက်ခံ ပြည်သူ့စစ်​တွေဟာ ဇွန်လ ၂၁ ရက်က ရွာတွေကို အစည်းအဝေးခေါ်ယူပြီး ဒေသခံ​တွေ ရွာအပြင်ကို ထွက်ခွင့်မပြုဘူးလို့ ခြိမ်းခြောက်ပြောဆိုခဲ့တဲ့အပြင် ပင်အွန်းရွာသူကြီးကို ရိုက်နှက်နှိပ်စက်မှုပြုလုပ်ခဲ့တယ်လို့ မြို့ခံတွေဆီက သိရပါတယ်။

 

ဒါ့အပြင် ရွာအပြင်ထွက်ပါက တော်လှန်ရေးတပ်ဖွဲ့​တွေလို့ သတ်မှတ်ကာ ပစ်ခတ်မယ်လို့ စစ်ကောင်စီနဲ့ PNO ပြည်သူ့စစ်က အစည်းအဝေးခေါ်ယူ ခြိမ်းခြောက်ပြောဆိုခဲ့တာလို့ ဆိုပါတယ်။

 

ဆီဆိုင်မြို့နယ် လွယ်ထွဲကျေးရွာမှာ ပုံမှန်စျေးလာရောင်းနေတဲ့ ညောင်ရွှေမြို့နယ် ကျားတွန်ကျေးရွာက လူငယ် နှစ်ဦးကို စစ်ကောင်စီနဲ့ PNO ပြည်သူ့စစ်က ဇွန်လ ၂၀ ရက်နေ့မှာ ဖမ်းဆီးသတ်ဖြတ်ခဲ့တယ်လို့ သိရပါတယ်။

 

Burma Associated Press