ဧပြီ - ၃

စစ်ကိုင်းတိုင်း၊ ဒီပဲယင်းမြို့နယ်တွင် လက်ရှိစစ်ကြောင်းထိုးနေသည့် စစ်အုပ်စုက ကျေးရွာတချို့၏ ရွာအဝင်လမ်း များကို ဘူဒိုဇာနှင့် ထိုးကာဖျက်ဆီးသွားကြောင်း ဒေသခံများကပြောသည်။

 

ယမန်နေ့ ဧပြီလ ၂ ရက်က ဒီပဲယင်းမြို့အနောက်ဖက်ခြမ်းရှိ ကြည်ရွာအဝင် လမ်းပိုင်းများနှင့် မူးမြစ်ဘောင်များကို ဘူဒိုဇာနှင့် ဖျက်ဆီးသွားကြောင်း၊ တစ်ရွာနှင့်တစ်ရွာ သွားလာမှု ခက်စေရန် ရည်ရွယ်လုပ်ဆောင်ခြင်းဖြစ်ကြောင်း ဒေသခံများကပြောသည်။

 

" တကယ်တမ်းက သူတို့ကြောက်ပြီး ရည်ရွယ်ချက်နဲ့လုပ်သွားတာပါ။ သွားမရအောင် လုပ်သွားတယ်။ နောက်ပြီး ဆိုင်ကယ်တွေကိုလည်း ဘာမှာမဟုတ်ဘဲနဲ့ မြစ်ထဲကန်ချသွားတယ်ဗျ။ စစ်ရှောင်တွေကတော့ အလွယ်တကူ ထွက်မရဘူးပေါ့ဗျ " ဟု ဒေသခံတဦးက ပြောသည်။

 

မတ်လ ၂၇ ရက်နေ့မှာ စတင်ပြီး ဘုတလင်မြို့က ထွက်လာသည့် စစ်ကောင်စီ စစ်ကြောင်းသည့် စိုင်ပြင် - ဒီပဲယင်း လမ်းတစ်လျှောက်ရှိ ကျေးရွာများကို စစ်ကြောင်းထိုးဝင်ရောက်နေကြောင်း၊ ယင်းကြောင့် ဒေသခံ ထောင်ချီပြီး စစ်ရှောင်နေကြရကြောင်း သိရသည်။

 

ထို့အပြင် ယင်းစစ်ကြောင်းနှင့် ဒေသကာကွယ်ရေးအဖွဲ့များ နေ့စဉ်ဆိုသလို တိုက်ပွဲဖြစ်နေကြောင်း၊ စစ်အုပ်စုက အဆိုပါတိုက်ပွဲများတွင် လေယာဉ်ဖြင့် ၃ ရက် ဆက်တိုက် ပစ်ခတ်မှုများ လုပ်ခဲ့ကြောင်း ဒေသခံများက ပြောသည်။

 

Burma Associated Press