ဧပြီ ၁၅။

 

ကချင်ပြည်နယ်၊ ပူတာအိုမြို့မှာ ဓာတ်ဆီ တစ်ပုလင်းကို တစ်သောင်းကျပ်ထိ ဈေးမြင့်တက်လာနေတယ် လို့ ဒေသခံ​တွေဆီက သိရပါတယ်။

 

“ဆီက သူဌေးတွေက ကြိုပြီးမှ ကိုယ့်အိမ်နဲ့ကိုယ် စုထားပြီးမှ အဲလိုလုပ်တာလေ၊ ဘာကျင့်ဝတ်မှ မရှိဘူး” လို့ ​ဒေသခံတစ်ဦးက BAP ကို ပြောပါတယ်။

 

ပူတာအိုမှာ စက်သုံးဆီဆိုင်အများစုကလည်း ပိတ်ထားတယ်လို့ သိရပါတယ်။

 

“ဒီဇယ်ဈေးက လွန်ခဲ့တဲ့ နှစ်ရက်က တစ်ပေပါကို သိန်း ၂၀ ကျော် ပေါက်တယ်၊ ဒါတောင်မှ သူစိမ်းတွေဆို မရဘူးပြောတယ်၊ သိတဲ့လူအချင်းချင်းတွေ၊ ကိုယ့်အမျိုးတွေကိုပဲ ရောင်းပေးတာတဲ့၊ ပေပါလိုက်က သိန်း ၂၀ ကျော် ရှိတယ်” ဆိုပြီး ပြောပါတယ်။

 

မြစ်ကြီးနား–ပူတာအို ကားလမ်းပိုင်းမှာ စစ်ကောင်စီတပ် နဲ့ KIA ပူးပေါင်းတပ်တွေ တိုက်ပွဲ ဖြစ်ပွားနေတာကြောင့် မတ်လ ၈ ရက်ကစပြီး ဒီနေ့ ဧပြီ ၁၅ ရက်အထိ အဲဒီလမ်းပိုင်းကို ပိတ်ထားဆဲ ဖြစ်ပါတယ်။

 

အဲဒီလို လမ်းပိတ်ထားတဲ့အတွက် ကုန်စည်ဈေးနှုန်းတွေ အဆမတန် မြင့်တက်လာနေပြီး သွားလာရေး အခက်ခဲတွေ ကြုံတွေ့နေရတယ်လို့ ပူတာအိုဒေသခံတွေက လူမှုကွန်ရက်မှာ မျှဝေထားကြပါတယ်။

 

စစ်တပ်က အာဏာသိမ်းပြီးနောက် ကချင်ပြည်နယ်၊ ပူတာအို​နဲ့ မချမ်း​ဘောဒေသမှာ တရားမဝင်သစ်ထုတ်တာ၊ တောရိုင်းတိရစ္ဆာန်ရောင်းဝယ် ဖောက်ကားတာ၊ ​​ရွှေကျင်တာ​တွေလည်း အများအပြားဖြစ်​ပေါ်​နေပါတယ်။

 

ပုံစာ- ပူတာအိုက ပိတ်ထားတဲ့ စက်သုံးဆီဆိုင်​တွေ (ဓါတ်ပုံ- လူမှုကွန်ရက်)

 

Burma Associated Press