ဇူလိုင် ၂၉။

ကေအဲန်ယူ−ကရင်အမျိုးသားအစည်းရုံးအမည်ကို ဆင်တူယိုးမှားပြုလုပ်ပြီး သတင်းအမှားများ ဖြန့်ဝေခြင်းနှင့် ပြည်လူထုထံမှ အလှူငွေများလိမ်လည် ရယူနေသည့် Fackbook Page များပေါ်ပေါက် လျက်ရှိနေသည်ဟု KNU (ဗဟို) က ယနေ့ သတိပေးလာသည်။

 

ဖော်ပြပါ KNU Brigade 3 - Army 9 -1035 နှင့် KNLA - PDF Kyaukkyi News facebook Page နှစ်ခုသည် ကေအဲန်ယူ−လယ်ဒိုမြို့နယ်၏ တရားဝင် Facebook Page သဖွယ်ဆင်တူယိုးမှား ပြုလုပ်ကာ သတင်းမှားများ ဖြန့်ဝေလျှက်ရှိသည်ဟု ကေအဲန်ယူကဆိုသည်။

 

ထို Facebook Page များသည် ကေအဲန်ယူ−လယ်ဒို မြို့နယ်ထံမှ ခွင့်ပြုချက် တစ်စုံတစ်ရာမျှရယူခြင်းမရှိဘဲ ဖွင့်လှစ်ထားသော ကေအဲန်ယူ−လယ်ဒိုမြို့နယ် နှင့်မသက်ဆိုင်သည့် Facebook Page များသာဖြစ်သည် ဟုလည်း ဖော်ပြထားသည်။

 

ကေအဲန်ယူ−ခလယ်လွီထူခရိုင်သည် တရားဝင် Facebook Page ဖွင့်လှစ် ထားခြင်းမရှိဘဲ ခလယ်လွီထူခရိုင်၏ သတင်းများကို ကေအဲန်ယူ−ကရင် အမျိုးသားအစည်းအရုံး၏ တရားဝင် Facebook Page ဖြစ်သည့် blue mark အမှတ်အသားပါ Karen National Union မှတဆင့် လူထုအားအသိပေး ချပြလျက်ရှိသည်ဟုဆိုသည်။

 

ထို့အပြင် KNU Brigade 3 - Army 9 -1035 နှင့် KNLA - PDF Kyaukkyi News facebook Page များမှ ပြည်သူလူထုများ ထည့်ဝင်သော အလှူငွေများကိုလိမ်လည် လက်ခံလျက်ရှိနေသည်ကိုလည်း စုံစမ်းသိ ရှိရသည်ဟု ကေအဲန်ယူကဆိုသည်။

 

အလားတူပြဿများကို ယခင်ကလည်းစုံစမ်းဖော်ထုတ်ထားပြီးဖြစ်သော်လည်း လိမ်လည်သူများနေဖြင့် နည်းလမ်းတစ်ခုတည်းကိုဘဲ ထပ်ခါထပ်ခါ အသုံးပြုပြီး ထပ်မံကျူးလွန်လျက်ရှိနေသည်ကို တွေ့ရှိရ ပါသည်ဟုဆိုသည်။

 

မိဘပြည်သူများအနေနှင့် ကေအဲန်ယူ−ကရင်အမျိုးသားအစည်းအရုံး ကော်သူးလေအုပ်ချုပ် နယ်မြေများအတွင်း လူသားချင်း စာနာထောက်ထားမှု ဆိုင်ရာ အကူအညီများနှင့် အခြားသောအကူအညီများကို ပေးအပ်လိုသည့်အခါ သက်ဆိုင်ရာခရိုင်မြို့နယ်များ၏ တရားဝင်ခွင့်ပြုချက်ရှိမရှိ သေချာစွာ မေးမြန်းမှုများ ပြုလုပ်ပြီးသည့်အခါမှသာ ကူညီထောက်ပံ့မှုများကို ပေးစေလိုသည်ဟု ကေအဲန်ယူက အသိပေးထားသည်။

 

ပုံစာ− သတင်းအမှားများနှင့် အလှူငွေများလိမ်လည်လက်ခံလျှက်ရှိသည်ဟု KUU ဗဟိုက ကြေညာသည့် KNU Brigade 3 - Army 9 -1035 နှင့် KNLA - PDF Kyaukkyi News facebook Page များ။

( ဓာတ်ပုံ- ကေအဲန်ယူ(ဗဟို)

 

Burma Associated Press