ဇူလိုင် ၃။

 

ရှမ်းပြည်နယ်မြောက်ပိုင်း၊ လားရှိုးမြို့မှာ ဒီနေ့ ဇူလိုင်လ ၃ ရက် မနက် ၄ နာရီ အချိန်က မြို့တွင်း လက်နက်ကြီး ကျည်ကျရောက်ပေါက်ကွဲတာကြောင့် မိသားစုဝင် ၅ ဦး သေဆုံးခဲ့တယ်လို့ မြို့ခံအချို့ဆီက သိရပါတယ်။

 

ဒီနေ့မနက်ပိုင်းက လားရှိုးတက္ကသိုလ်အနီး ရပ်ကွက်(၁)က လူ နေအိမ်တစ်လုံးထဲကို လက်နက်ကြီးကျည် ကျရောက်ပေါက်ကွဲခဲ့တာကြောင့်မိသားစု ၅ ဦးသေဆုံးခဲ့တာလို့ ဒေသခံအချို့က အသိပေးပြောကြားကြပါတယ်။

 

“တမိသားစုလုံး ၆ ယောက်စလုံး သေတယ်လည်းပြောကြတယ်၊ အပြင်မထွက်ရကြသေးဘူး၊ ညကထဲက တအားပစ်နေကြတာ၊ ဒီမနက်လည်း သံတွေကြားနေရတယ်၊ ဒီမနက်စစ်ရှောင်နေသူ အများကြီးဖြစ်နေတယ်"လို့ မြို့ခံတဦးက ပြောပါတယ်။

 

လားရှိုးမြို့နယ်က စဉ့်အင်ဖောင်ဆိပ်မှာ ကားတွေတန်းစီစောင့်ဆိုင်းနေကြရပြီး လားရှိုး-စဉ့်အင်ကြား နောင်မွန်ရွာ ဘက်မှာပစ်ခတ်မှုတွေရှိနေတယ်လို့သိရပါတယ်။

 

လားရှိုးမြို့အနီး မြောက်ပိုင်းမဟာမိတ်တပ်ဖွဲ့တွေ ဇူလိုင်လ ၂ ရက် ညပိုင်းက စတင်တိုက်ခိုက်ရာ တိုက်ပွဲ ပြင်းထန်နေတယ်လို့ ဒေသခံတွေက ပြောပါတယ်။

 

လတ်တလောမှာ လားရှိုး-နမ့်ပေါင်ဘက်လမ်းပိုင်းတွေ ပိတ်ထားသလို လားရှိုးမြို့အဝင်အထွက် ယာယီပိတ်ထားတယ်လို့ သိရပါတယ်။

 

စစ်ဆင်ရေးအမှတ် - ၁၀၂၇ ရဲ့ ဒုတိယအကြိမ် တိုက်ပွဲတွေဟာ ရှမ်းပြည်နယ်မြောက်ပိုင်းက လားရှိုး၊ နောင်ချို၊ ကျောက်မဲနဲ့ မန္တလေးတိုင်းထဲက မိုးကုတ်၊ မတ္တရာမြို့နယ်တွေမှာ ဖြစ်နေတာပါ။

 

ဓာတ်ပုံ - လူမှုကွန်ရက်

 

Burma Associated Press