Data

ကျောက်မဲတိုက်ပွဲ ၃ ရက် အတွင်း အရပ်သား ၂၀ ကျော်သေဆုံး

လွန်ခဲ့သော ၃ လ က

ဇွန် ၂၇။

ရှမ်းပြည်နယ်မြောက်ပိုင်း၊ ကျောက်မဲမြို့ မှာ နှစ်ဖက်တိုက်ပွဲအတွင်းပစ်ခတ်လိုက်တဲ့ လက်နက်ကြီးကျည်ထိပြီး ပြည်သူ ၂၃ ဦး သေဆုံးခဲ့တယ်လို့ ကူညီပေးခဲ့တဲ့လူမူကူညီရေးအသင်းတွေဆီက သိရပါတယ်။

"တိုက်ပွဲရက် (၃)ရက် အတွင်းက အလောင်းတွေပါ၊ မြို့ပေါ်အချို့နေရာတွေလည်း ဒဏ်ရာရသေဆုံးသူတွေ မကောက်နိုင်တဲ့ အလောင်းတွေရှိနေကြသေးတယ်၊ တနေ့လုံးတိုက်ပွဲပြင်းထန်နေတယ်၊ ပြေးနေရင်းလက်နက်ကြီး ထိသူတွေလည်းရှိနေတယ်"လို့ ကျောက်မဲမြို့ခံတဦးက ပြောပါတယ်။

သေဆုံးသူတွေဟာ လက်နက်ကြီးမှန်လို့ရရှိတဲ့ ဒဏ်ရာတွေနဲ့ သေဆုံးနေကြတာဖြစ်ပြီး သေဆုံးနေတဲ့ ၂၃ ဦးရုပ်အလောင်းကို နမ့်ခုံး ရှမ်းများ ပရဟိတအသင်း ကျောက်မဲအသင်းခွဲနဲ့ နာရေးကူညီမှုအသင်း - ကျောက်မဲ တို့ပူးပေါင်းကာ အေးချမ်းသာသုသာန်သို့ ပို့ဆောင် သင်္ဂြိုဟ် ကူညီပေးခဲ့ကြတာလို့ ဆိုပါတယ်။

ကျောက်မဲမြို့တွင်းမှာ စစ်ကောင်စီတပ်နဲ့ တအောဝ်းပလောင်အမျိုးသားတပ်မတော်နဲ့ ပူးပေါင်း တပ်ဖွဲ့တို့ကြား တိုက်ပွဲပြင်းထန်နေပြီး ပြည်သူတွေရှောင်ပြေးနေကြရတာဖြစ်ပါတယ်။

"ကျည်ဆန် ထိမှန်သေတာတွေပါ၊ လမ်းမတွေပေါ်မှာ တွေ့တဲ့အလောင်းကို ကောက်ယူပြီး တစ်ခါတည်း သင်္ဂြိုလ် ပေးခဲ့လိုက်တာ။ ဘယ်သူတွေလည်းမသိရဘူး အချို့ကလဲအိမ်စောင့်အဖြစ်ကျန်နေရင်းနဲ့ထိမှန်သေဆုံးကြတာ"လို့ပရဟိတအသင်းတခုက ပြောပါတယ်။