စက်တင်ဘာ ၁၅။

 

ယင်းမာပင်ခရိုင်၊ ပုလဲမြို့နယ်တွင် အခြေစိုက်သည့် မြန်မာ့တော်ဝင်နဂါးတပ်တော်- MRDA အတွက် အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန- MODက ထောက်ပံ့ထားမှုများကို ယမန်နေ့ က ရှင်းလင်းတင်ပြလာခဲ့သည်။

 

MRDAက MOD၏ စစ်ရေးကွပ်ကဲမှုအောက် ရယူပြီးနောက် ၂၀၂၂ ခုနှစ်၊ မေလမှစ၍ မြန်မာငွေ ကျပ်သိန်းပေါင်း သုံးထောင်ကျော် (၃၁၈,၀၀၀,၀၀၀ ကျပ် တိတိ) ထောက်ပံ့ပြီးဖြစ်သည်ဟု ဆိုသည်။

 

မြန်မာ့တော်ဝင်နဂါးတပ်တော်- MRDA၏ တပ်ဖွဲ့များကို MOD၏ ယင်းမာပင်ခရိုင် တပ်ရင်းအမှတ် (၃)၊ (၄)၊ (၅)၊ (၆) အဖြစ် ၂၀၂၂ ခုနှစ်၊ မတ်လ (၁၄) ရက်တွင် အသိအမှတ်ပြုကွပ်ကဲမှု ရယူခဲ့ခြင်း ဖြစ်သည်။

 

ထိုကဲ့သို့ ကွပ်ကဲမှုမရယူမီကာလကလည်း MRDA ၏ ထုတ်လုပ်ရေးလုပ်ငန်းများအတွက် အမေရိကန် ဒေါ်လာ နှစ်သောင်းကျော်၊ ပြည်သူ့တော်လှန်ရေးထောက်ပို့တပ် (PRF)နှင့် ပြည်တွင်း၊ ပြည်ပ အလှူရှင်များ၏ အလှူငွေမှ အမေရိကန်ဒေါ်လာ သုံးသောင်းနီးပါးကိုလည်း ဆက်သွယ်ပေးပို့ခဲ့သည်ဟု ဆိုသည်။

 

၂၀၂၂ ခုနှစ်၊ မတ်လက MRDA အနေဖြင့် လက်နက်ပစ္စည်းဝယ်ယူနိုင်ရန်အတွက် မဟာမိတ်များနှင့် ချိတ်ဆက်ဆောင်ရွက်ပေးခဲ့ရုံသာမက MOD က အမေရိကန်ဒေါ်လာ ကိုးသောင်း ထောက်ပံ့ပေးခဲ့ သေးသည်ဟု ပြောသည်။

 

ဒါ့အပြင် ဗုံးပစ်လောင်ချာ ၁၅ လက်နှင့် မောင်းပြန်အပါအဝင် လက်နက်ခဲယမ်းများကိုလည်း ထောက်ပံ့ခဲ့ သေးသည်ဟု ဆိုသည်။

 

မြန်မာ့တော်ဝင်နဂါးတပ်တော်- MRDA အစား  ဗမာအမျိုးသားတော်လှန်ရေးတပ်မတော်- BNRAကို စက်တင်ဘာ ၉ ရက်တွင် ဗိုလ်နဂါးက ဦးဆောင်ပြီး MOD၏ အမိန့်ပေးကွပ်ကဲမှုစနစ် (CoC) အောက်တွင် မပါဝင်သည့် လက်နက်ကိုင်အင်အားစုများ၊ ဒေသခံ ကာကွယ်ရေးအဖွဲ့ (LDF တို့ဖြင့် ဖွဲ့စည်းခဲ့သည်။

 

BNRA ဖွဲ့စည်းမှုသည် ယာယီသမ္မတ၊ ကာကွယ်ရေးဝန်ကြီးတို့နှင့် ဆွေးနွေးကတိပြုခဲ့ခြင်း မရှိခဲ့ဘဲ ဗိုလ်နဂါး၏ တစ်ကိုယ်တည်း လုပ်ဆောင်ချက်များသာ ဖြစ်သည်ဟုလည်း NUG သမ္မတရုံးက ရှင်းလင်းထားသည်။

 

Burma Associated Press