မတ် ၁၄။

ဖယ်ခုံမြို့နယ်၊ ကုရင်ကျေးရွာအုပ်စုတောင်ကြား၌ ခိုးဝင်ရောက်ရှိနေသော စစ်ကောင်စီတပ်ကို PKPDF-2 နှင့် မဟာမိတ်အင်အားစုများက မတ်လ ၁၁ ရက်တွင် စီးနင်းခဲ့ရာ စစ်ကောင်စီတပ်သား ၆ ဦး အရှင်မိခဲ့သည်ဟု ဖယ်ခုံပြည်သူ့ကာကွယ်ရေးတပ်ဖွဲ့-PKPDFက ထုတ်ပြန် ထားသည်။

 

တိုက်ပွဲအတွင်း စစ်ကောင်စီတပ်သား ၁၉ ဦး သေဆုံးခဲ့ကာ ပြည်သူ့ကာကွယ် ရေး ဖယ်ခုံ PDF တပ်ရင်း-၂ မှ ရဲဘော်တစ်ဦး နှင့် KNDF B-03 မှ ရဲဘော် ၂ ဦး(စုစုပေါင်း ၃ ဦး) မြင့်မြတ်စွာကျဆုံးခဲ့ရပြီး ပူးပေါင်းအဖွဲ့မှ ၆ ဦးဒဏ်ရာရရှိခဲ့ သည်ဟုဆိုသည်။

 

ဖယ်ခုံမြို့ အထိုင်တပ်က လက်နက်ကြီးပစ်ကူမှုရှိခဲ့သော်လည်း ပူးပေါင်း တပ်ဖွဲ့က တိုက်စစ်ဆင်နိုင်ခဲ့ပြီး လက်နက်ခဲယမ်းအများအပြား သိမ်းဆည်းရမိခဲ့သည်ဟုလည်း ထုတ်ပြန်ချက်တွင် ဆိုထားသည်။

 

ထို့အပြင် ရှမ်း-ကယားနယ်စပ် မိုးဗြဲအရှေ့ဘက်ကမ်းရှိတောင်ပေါ် စစ်ဘေးရှောင်တစ်နေရာတွင် စကစတပ်မ ၆၆ က စစ်ရှောင်စခန်းသို့ စစ်ကြောင်းထိုးရောက်ရှိလာပြီး သက်ကြီးရွယ်အိုနှင့် ကလေးအချို့ကို ဖမ်းဆီးထားခဲ့သည် ဟုလည်း ဖယ်ခုံပြည်သူ့ကာကွယ်ရေးတပ်ဖွဲ့ထံမှသိရသည်။

 

စကစသည် ဖမ်းဆီးထားသော စစ်ဘေးရှောင်ပြည်သူအချို့ကို လူသားဒိုင်းအသုံးပြုသည့်အပြင် ၇ တန်းကျောင်းသားတစ်ဦး၊ အသက် ၈၁ နှစ်နှင့် ၇၈ နှစ် အရွယ် သက်ကြီးရွယ်အို ၂ ဦးတို့ကို သတ်ဖြတ်ခဲ့သည်ဟု ဆိုသည်။

 

လွတ်မြောက်လာသူအချို့လည်းရှိကြောင်းသိရသည်။

 

မြေပြင်စစ်ရေးတင်းမာနေသည့်အတွက် မိဘပြည်သူများအသွားအလာ သတိရှိရန် ဖယ်ခုံ ပြည်သူ့ကာကွယ်ရေး တပ်ဖွဲ့က အသိပေးထားသည်။

 

စစ်ကောင်စီတပ်သည် ယခုနှစ် ဖေဖော်ဝါရီလမှစ၍ ကရင်နီပြည်အတွင်း ပင်လောင်း၊ ရှားတော၊ ဒီးမော့ဆိုနှင့် ဘောလခဲမြို့နယ်အသီးသီးတွင် စစ်မျက်နှာ ၄ ခုဖွင့်ကာ စုစုပေါင်း စစ်ကြောင်း ၁၂ ကြောင်း ဖြင့် အပြင်းအထန် ထိုးစစ်ဆင်လျက်ရှိသည်။

 

ပုံစာ - ဖမ်းဆီးရမိသည့် စစ်ကောင်စီတပ်သားများနှင့် သတ်ဖြတ်ခံရသည့် ပြည်သူနှစ်ဦး(ဓာတ်ပုံ-PKPDF-2)

Burma Associated Press