BAP၊ ​ဖေ​​ဖော်ဝါရီ ၇။

 

ရန်ကုန်မြို့မှာ လာမဲ့မတ်လ တက္ကသိုလ်ဝင်တန်းစာမေးပွဲဖြေမယ့် ကျောင်းသားတွေပါမကျန် စစ်မူထမ်း ဆင့်ခေါ်စာတွေ ရောက်လာလို့ မိဘတွေရတက်မ​အေး ဖြစ်​နေရပါတယ်။

 

ဒီလိုဆင့်ခေါ်စာတွေရောက်လာလို့ လာမယ့်မတ်လအတွင်း စာမေးပွဲဖြေဖို့ရှိ​နေတဲ့ ကျောင်းသားတွေဟာ ကျောင်းသားဖြစ်ကြောင်း ထောက်ခံစာယူနေရတယ်လို့ မိဘတွေက ပြောပါတယ်။

 

"စစ်မူထမ်းဆင့်ခေါ်စာရောက်တယ်ဆိုပြီးအိမ်အောက်ကို ရပ်ကွက်ရုံးကလာ​ပြောတာ၊ ကျောင်းသားပဲရှိတဲ့အိမ် ဘယ်ကနေဘယ်လိုစားရင်းပါလာလဲဆိုပြီး ရင်တုန်ပန်းတုန်ဖြစ်သွားတယ်၊ သားဆိုရင်ကြောင်တောင်တောင်နဲ့ အမေသားတို့ဘယ်ပြေးရမလဲ၊ ပြီးတော့သေလိုက်ချင်တယ်ဆိုပြီးပြောနေတယ်၊ သူတို့ကျောင်းကလည်း အများကြီးပါကြတယ်"လို့ဒေါပုံမြို့နယ်နေသူ ကျောင်းသားမိဘတဦးက ပြောပါတယ်။

 

လက်ရှိကျောင်းတက်နေတဲ့ တက္ကသိုလ်ဝင်စာမေးပွဲ ဖြေကြမယ့် ကျောင်းသားတွေထဲမှာ အသက်၁၈နှစ် ပြည့်ပြီးသူတွေ အများအပြားရှိနေတာ​ကြောင့် စစ်မူထမ်းစာရင်းတွေပါနေတယ်လို့ မိဘတွေက ပြောပါတယ်။

 

သာကေတ၊ ဒေါပုံ၊ မြောက်ဒဂုံ၊ အရှေ့ဒဂုံမြို့နယ်က တက္ကသိုလ်ဝင်ခွင့်ဖြေမယ့် ကျောင်းသားတွေ စစ်မူထမ်းစာရင်းထဲပါနေကြလို့ မိဘတွေ ကျောင်းသားဖြစ်ကြောင်း ကျောင်းထောက်​ခံချက်တွေယူနေကြတာပါ။

 

အခုလို စစ်မူထမ်းစာရင်းနာမည်ပါလာလို့ ကျောင်းသားတွေစာကျက်မရဘဲ စိုးရိမ်ထိတ်လန့်မူတွေနဲ့ ကြူံနေရတယ်လို့ မိဘတွေက ပြောပါတယ်။

 

"ရပ်ကွက်တာဝန်ရှိသူတွေက ပြောရမှာလေ၊ ဒီကလေးတွေက ကျောင်းတက်နေသူတွေဆိုတာ သူတို့ကမသိပဲမရှ်ိဘူး၊ ခုလိုကျောင်းသားအရွယ်တွေအတွက် ဆင့်ခေါ်စာရောက်လာတော့ သူ့အဖွားဆို သတိလစ်သွားတယ် "လို့ စစ်မူထမ်းဆင့်ခေါ်စာရောက်လာသူ ကျောင်းသားမိဘတဦးက ပြောပါတယ်။

စစ်မူထမ်းဆင့်ခေါ်စာ​တွေကို ဖေဖော်ဝါရီလအတွင်း မြို့နယ်ထွေအုပ်ရုံးနဲ့ ရပ်ကွက်ရုံး​တွေကို ပို့ထားကြပြီး အမိန့်ဆင့်ခေါ်စာ ရရှိထားပြီးသူ​တွေဟာ ချက်ချင်း စစ်မှုထမ်းရမယ်လို့ ရပ်ကွက်တာဝန်ရှိသူတွေက ​ပြောဆို​နေကြတာလည်း ရှိပါတယ်။

 

ဒါ့အပြင် အသက် ၁၈ နှစ်ကနေ အသက် ၃၅ နှစ်အတွင်း အမျိုးသား​တွေကို ရေရှည် ရဟန်းဝတ်ခွင့်မပေးဘဲ ရေတိုဒုလ္လဘရဟန်းအဖြစ် ရက်ပိုင်းသာ ခွင့်ပြုပေးဖို့ အသိပေးလာကြတယ်လို့ ဘုန်းကြီးကျောင်းတွေက သံဃာအချို့ထံက သိရပါတယ်။

 

လတ်တလောကာလ ရပ်ကွက်ရုံးတွေမှာလည်း ဧည့်စာရင်းစာအုပ်နဲ့နေထိုင်သူတွေကို အရင်ကတစ်လတစ်ကြိမ် ခွင့်ပြုပေးရာကနေ အခု ၁၅ ရက်သာ ခွင့်ပြုထားပြီး နေထိုင်သူတွေကို စိစစ်နေတယ်လို့ ရပ်ကွက် အုပ်ချုပ်ရေးအဖွဲ့ဝင်တွေက​​ပြောပါတယ်။

 

"ဒီလ ၃၀ ရက်ကမှ အသစ်ပြဌာန်းလိုက်တာ၊ ရပ်ကွက်ထဲ နေထိုင်သူတွေ ဧည့်စာရင်းတိုင်ဖို့ သေချာစိစစ်ဖို့ လက်ရှိလိပ်စာမှာ နေသူတွေထဲက အသက်ပြည့်ပြီးသူတွေ ရပ်ကွက်ထဲမှာရှိမရှိ ဘာအလုပ်လုပ်နေတယ်ကအစ စောင့်ကြည့်ခိုင်းထားတာ"လို့ ရပ်ကွက်အုပ်ချုပ်ရေးအဖွဲ့ဝင်တဦးက ပြောပါတယ်။

 

စစ်မူထမ်းဖို့ ကင်းလွတ်ခွင့်ရသူတွေထဲမှာ နိုင်ငံ့ဝန်ထမ်း​တွေ၊ပညာသင်ကြားနေသူ​တွေ၊ အခြားပြုစုစောင့်ရှောက် မယ့်သူမရှိတဲ့ မိအိုဖအိုကို ပြုစုလုပ်ကျွေးနေသူ​တွေ၊ ၊မူးယစ်ဆေးဝါးဖြတ်ရန် ဆေးကုသမှုခံယူနေသူ​တွေ၊ ထောင်ဒဏ် ကျခံနေသူတွေဟာ လတ်တလော ကင်းလွတ်ခွင့်ရမယ်လို့ ပြဌန်းထားတာဖြစ်ပါတယ်။

 

Burma Associated Press