နယူးယောက် - မတ် ၉

 
ကမ္ဘာတဝှမ်းက အစိုးရအဖွဲ့အစည်းများတွင် အမျိုးသမီးခေါင်းဆောင်မှု တိုးပွားလာသော်လည်း အမျိုးသမီးများ အပေါ် အကြမ်းဖက်မှုနှင့် ခြိမ်းခြောက်မှုများမှာ ၎င်းတို့၏ နိုင်ငံရေး ပါဝင်ပတ်သက်မှုအတွက် အဟန့်အတား အဖြစ်နေဆဲဖြစ်ကြောင်း ကုလသမဂ္ဂ ကျားမ တန်းတူညီမျှရေးအဖွဲ့အစည်းက ပြောကြားလိုက်သည်။

 
အစိုးရနှင့် လွှတ်တော်တွင်း နိုင်ငံရေးခေါင်းဆောင်ရာထူးများတွင်ပါဝင်သည့် အမျိုးသမီး အရေအတွက် တိုးပွားလာသည့်တိုင် အရှေ့အလယ်ပိုင်းနှင့် မြောက်အာဖရိကကဲ့သို့သော ဒေသ အချို့တွင် နောက်ကျကျန်နေသေးကြောင်း အချက်အလက်များအရ သိရသည်။

 
အဆိုပါကိစ္စနှင့်ပတ်သက်၍ - "အင်တာနက်ပေါ်မှာရော ပြင်ပမှာပါ အမျိုးသမီးခေါင်းဆောင်တွေ၊ ဝင်ရောက် ယှဉ်ပြိုင်သူတွေ၊ မဲဆန္ဒရှင်တွေအပေါ်  ဆက်လက်အကြမ်း ဖက်ခြိမ်းမှုတွေ ရှိနေတာဟာ စီးပွားရေးနှင့် လူမှု့ရေး ပြန်လည်ဦးမော့ ပြောင်းလဲလာရေးအတွက် အရေးတကြီးလိုအပ်နေတဲ့ အမျိုးသမီးများရဲ့ လွတ်လပ်စွာ ပြောဆိုခွင့်၊ အသိပညာဆည်းပူးခွင့်တွေကို အဟန့်အတားဖြစ် စေပါတယ်" ဟု ကုလသမဂ္ဂ အမျိုးသမီး အမှုဆောင် ဒါရိုက်တာ ဆီမာ ဘားဟာ့စ် (Sima Bahous) က ထုတ်ပြန်ချက်တွင် ဖော်ပြထားသည်။

 
"ဒီမိုကရေစီကို အပြည့်အဝကျင့်သုံးဖို့ဆိုရင် ဒီမိုကရက်တစ်လုပ်ငန်းစဉ်အားလုံးမှာ အမျိုးသမီးတွေ တန်းတူ ပါဝင်ခွင့် ရရှိဖို့ လိုအပ်ပါတယ်" ဟု ကုလအဖွဲ့အစည်းက အပြည်ပြည်ဆိုင်ရာ အမျိုးသမီးများနေ့မတိုင်မီ ထုတ်ပြန် သည့် အစီရင်ခံစာတွင် ပြောဆိုခဲ့ခြင်းဖြစ်သည်။

 
ကမ္ဘာ့ဒေသများအနက် ဥရောပတွင် အမျိုးသမီးဦးဆောင်သည့် နိုင်ငံ ၁၆ နိုင်ငံရှိပြီး အများဆုံး ဖြစ်သည်။ ပြီးခဲ့သည့် ဇန်နဝါရီ ၁ ရက်နေ့အထိ ကမ္ဘာတဝှမ်း ဝန်ကြီးအဖွဲ့များတွင် အမျိုးသမီးပါဝင်မှု ၂၂ ဒဿမ ၈ ရာခိုင်နှုန်းရှိကို တွေ့ရသည်။

 
အမျိုးသမီးပါဝင်မှု အများဆုံးမှာ ဥရောပနှင့် မြောက်အမေရိကနိုင်ငံများဖြစ်ပြီး ၎င်းတို့နောက်တွင် တောင်အမေရိကနှင့် ကာရေဘီယံနိုင်ငံများ ရပ်တည်လျှက်ရှိသည်။

 

အမျိုးသမီးကိုယ်စားပြုမှုသည် ဗဟို-တောင်အာရှနှင့် ဩစတေးလျနှင့် နယူးဇီလန်မှအပ ပစိဖိတ်ကျွန်းနိုင်ငံများတွင် အနိမ့်ဆုံးဖြစ်ပြီး နိုင်ငံပေါင်းကိုးနိုင်ငံ၏ ဝန်ကြီးများအဖွဲ့တွင် အမျိုးသမီး ပါဝင်ခြင်းမရှိပေ။

 
ဥရောပသမဂ္ဂ စာရင်းအင်းရုံးက ဗုဒ္ဓဟူးနေ့ ထုတ်ပြန်သည့် အချက်အလက်များအရ ဥရောပသမဂ္ဂတစ်ဝှမ်းရှိ အမျိုးသမီးများသည် ၂၀၂၂ ခုနှစ် ဇူလိုင်လတွင် ပါလီမန် အမတ်နေရာအားလုံး၏ ၃၂ ဒဿမ ၇ ရာခိုင်နှုန်းကို ရယူထားပြီး ကျန်ကမ္ဘာ့ဒေသများရှိ ရဝမ်ဒါ၊ ကျူးဘား၊ နီကာရာဂွာ ပါလီမန်များတွင် အမျိုးသားများထက် အမျိုးသမီးပါဝင်မှု ပိုများသည်။

 
နေရာဒေသအလိုက်ထုတ်ပြန်ချက်တွင် အရှေ့အလယ်ပိုင်းနှင့် မြောက်အာဖရိကတွင် အမျိုးသမီး ပါလီမန်အမတ် ၁၈ ရာခိုင်နှုန်းအောက်သာရှိသဖြင့် ဒေသတွင်းအဆင့်တွင် အောက်ဆုံးတွင် ရှိနေ သည်ဟု ကုလသမဂ္ဂ အမျိုးသမီးရေးရာ အချက်အလက်များတွင် ဖော်ပြထားသည်။

 
 
Source – CAN

 
ပုံ - ကုလသမဂ္ဂ အမျိုးသမီး အမှုဆောင် ဒါရိုက်တာ ဆီမာဘားဟာ့စ်