နိုဝင်ဘာ ၇။

 

ရှမ်းပြည်နယ်မြောက်ပိုင်းတွင် စစ်ဆင်ရေးအမှတ် - ၁၀၂၇ ဆင်နွှဲနေသည့် ကိုးကန့်တပ် MNDAA နှင့် မဟာမိတ် တို့သည် ယနေ့ နိုဝင်ဘာလ ၇ ရက်တွင် ၇ စီးမြောက် သံချပ်ကာယာဉ်တစ်စီး၊ တပ်မမှူး တစ်ယောက်၊ တပ်စခန်း ၃ ခု ကို တိုက်ခိုက်သိမ်းယူနိုင်ခဲ့ကြောင်းသတင်းထုတ်ပြန်လာသည်။

 

ယနေ့နံနက်ပိုင်းတွင် မြန်မာအမျိုးသား ဒီမိုကရက်တစ်မဟာမိတ်တပ်မတော် (MNDAA)သည် ကိုးကန့် ခရိုင်၊ ရှီးရှမ်းဒေသ နှင့် တုန်းရှမ်းဒေသတွင် ရှိသော စစ်ကောင်စီတပ်စခန်း(၂)ခု ထပ်မံသိမ်းပိုက် နိုင်ခဲ့သည်ဟုဆိုသည်။

 

ယနေ့အချိန်ထိဆိုလျှင် ရှမ်းမြောက်ဒေသတစ်ခွင်တွင် စစ်ကောင်စီ စခန်းကြီး/ ငယ် ၁၁၉ ခုကို သိမ်းယူ နိုင်ခဲ့ပြီး ဖြစ်သည်ဟုလည်း ကိုးကန့်တပ်က ထုတ်ပြန် ထားသည်။

 

စစ်ကောင်စီ၏ မုံးကိုးဗျူဟာကိုလည်း ယနေ့ နေ့လယ်ပိုင်းတွင် ရရှိခဲ့ပြီး သံချပ်ကာယာဉ်တစ်စီးကို ထပ်မံရခဲ့ သည်ဟုဆိုသည်။

 

ထို့ကြောင့် ၁၂ ရက်တာ တိုက်ပွဲအတွင်း ပူးပေါင်းတပ်များက သံချပ်ကာယာဉ် ၇ စီးကို ရရှိခဲ့ပြီးဖြစ်သည်။

 

အဆိုပါ တိုက်ပွဲများအတွင်း စစ်ကောင်စီ တပ်မမှူးတစ်ယောက်လည်း လက်နက်ကြီး ပေါက်ကွဲမှုကြောင့် သေဆုံးခဲ့ရသည်ဟု သိရှိရသည်ဟု ဆိုသည်။

 

CDM အရာရှိများ၏ ပြောဆိုချက်များအရ မုံးကိုးတိုက်ပွဲတွင် စစ်ကောင်စီ တပ်မ ၉၉ ၏ တပ်မမှူး ဗိုလ်မှူးကြီး အောင်ကျော်လွင် ကျဆုံးခဲ့ကြောင်း သိရသည်။

 

ဓာတ်ပုံ - The Kokang

 

Burma Associated Press