BAP၊ စက်တင်ဘာ ၂၀။

ရန်ကုန်မြို့လယ်မှာ တိုက်ပွဲဝင်အလံ၊ မီးတုတ်​တွေနဲ့ စစ်အာဏာရှင်ဆန့်ကျင်ရေးသပိတ်ပြုလုပ်ခဲ့တဲ့လူငယ်တွေကို စစ်ကောင်စီက မြေလှန်ရှာနေတယ်လို့ သိရပါတယ်။

 

သပိတ်ပြုလုပ်တဲ့ဓာတ်ပုံတွေကို မ​နေ့က စက်တင်ဘာ ၁၉ ရက် က ဆိုရှယ်မီဒီယာ​တွေကတဆင့် သပိတ်အင်အားစုတွေက ဖြန့်ဝေခဲ့ကြတာပါ။

"မနေ့ညက စဖမ်းခံရတယ်လို့ကြားတယ်၊ သပိတ်လုပ်တာမနေ့ကမဟုတ်ဘူး၊ အရင်နေ့ကလုပ်ကြတာ၊ လုပ်တဲ့နေ့ကတည်းက အရပ်ဝတ်နဲ့ စစ်ကောင်စီတွေကလိုက်နေကြ တာ၊ ပုံတွေတက်ပြီးမှဖမ်းခံနေကြတာ"လို့ သပိတ်အင်းအားစုနဲ့ နီးစပ်သူတဦးက ပြောပါတယ်။

အဆိုပါသပိတ်တိုက်ပွဲကို လူငယ်သပိတ်ကော်မတီ (YSC)၊ ရွှေပြည်သာ သပိတ်ကော်မတီ (SPTSC) နဲ့စစ်အာဏာရှင်ဆန့်ကျင်ရေး ရန်ကုန်အင်အားစု (AJAY) တို့ နဲ့အတူ ကျောင်းသား ပြည်သူ​တွေ ပူးပေါင်း တိုက်ပွဲဝင်ခဲ့ကြတယ်လို့ သိရပါတယ်။

သပိတ်အင်အားစုမှာပါဝင်ခဲ့တဲ့ လူငယ်တွေဟာ လုံခြုံ​ရေးတင်းကြပ်​နေတဲ့ကြားက ရန်ကုန်မြို့၊ အဓိကကားလမ်းမကြီးတခုပေါ်မှာ တိုက်ပွဲဝင်အလံ၊ မီးတုတ်​တွေကိုင်စွဲပြီး ပြောက်ကျားသပိတ်တိုက်ပွဲ ပြုလုပ်ခဲ့ကြတာဖြစ်ပါတယ်။

"လက်ရှိအချိန်မြေပြင်မှာ ဆန္ဒပြတာဟာ အင်မတန်အန္တရယ်ကြီးတယ်၊ ဒီလိုတွေမလုပ်စေချင်ဘူး၊ ရန်ကုန်မှာ CCTV တွေက နေရာတိုင်းရှိနေတာ၊ လိုက်ရလွယ်တယ်"လို့ ရန်ကုန်မှာ ​နေသူတဦးက ပြောပါတယ်။

လက်ရှိမြန်မာနိုင်ငံတွင် ကြုံတွေ့နေရတဲ့ ကုန်စျေးနှုန်းကျဆင်းရေးနဲ့ စစ်မှုထမ်းဥပဒေ အလိုမရှိကြောင်း၊ အထွေထွေကျပ်တည်းမှုများနဲ့တပြည်လုံး ရေဘေး ကူညီကယ်ဆယ်ရေး​တွေမှာ တာဝန်မဲ့ ပျက်ကွက်နေတဲ့ ပြဿနာ​တွေရဲ့ လက်သည်တရားခံ စစ်အာဏာရှင်စနစ်၊ စစ်အုပ်စုကို အမြစ်ဖြတ်ရေးကို ရည်ရွယ်ကြောင်း သပိတ်အင်အားစု​တွေက ကြွေးကြော်ချီတက်ခဲ့ကြတာ​ဖြစ်ပါတယ်။

ဓါတ်ပုံ- AJAY

Burma Associated Press