BAP၊ စက်တင်ဘာ ၂၇။

 

ရှမ်းပြည်နယ်မြောက်ပိုင်း၊ လားရှိုးမြို့ခံတွေကို အခု စက်တင်ဘာလကုန်မှာ မြို့ကနေထွက်ခွာကြဖို့ စစ်ကောင်စီ အဖွဲ့တွေက ပြောဆိုနေတယ်ဆိုတဲ့ ​ကောလာဟ​တွေ ကျယ်ကျယ်ပြန့်ပြန့် ထွက်​နေပြီး မြို့ခံ​အချို့ နေရပ်စွန့်ခွာဖို့ ပြင်နေကြတယ်လို့ ​ဒေသခံအချို့က ပြောပါတယ်။

 

"သူတို့က မြို့​ပြန်သိမ်းဖို့ လေကြောင်းကနေတိုက်တော့မှာ သူတို့အတွက်မြေကျန်ရင်ပြီးပြီ ဆိုပြီး​ပြောလာကြတယ်၊ အခုပြန်ပြေးကြရတော့မယ်"လို့ လားရှိုးမြို့ခံတဦးက ပြောပါ။

 

ရှမ်းပြည်နယ်မြောက်ပိုင်း လားရှိုးမြို့ကို စက်တင်ဘာလ၂၅ ရက် မနက် ၁ နာရီခွဲအချိန်က စစ်ကောင်စီက ပေါင် ၅၀၀ ဗုံး ၄ လုံး ကြဲချခဲ့တာ​​ကြောင့် တစ်ဦးသေဆုံးပြီး ၁၅ ဦးဒဏ်ရာရရှိခဲ့ပါတယ်။

 

စက်တင်ဘာလလ၂၇ရက်နေ့ ဒီနေ့မှာလည်း လားရှိုးစျေးကိုဗုံးကြဲချခဲ့တာကြောင့် ပျက်စီးဆုံးရှုံးမူ​တွေရှိခဲ့ပြီး ပြည်သူတွေအထိတ်တလန့်ဖြစ်ခဲ့ရတယ်လို့ မြို့ခံတွေက ပြောပါတယ်။​

 

စက်တင်ဘာလ၂၅ ရက် မနက်က လားရှိုးမြို့ ရပ်ကွက် (၂)က ရထိုက်နဲ့ Golden Sunflower ဟိုတယ်မှာ ဗုံး ၂လုံးကျရောက်ပေါက်ကွဲခဲ့ရာက ပြည်သူ ၉ ဦး ဒဏ်ရာရပြီး အဆောက်အဦနဲ့ နေအိမ်အများအပြား ထိခိုက်ပျက်စီးခဲ့တယ်လို့ မြို့ခံအချို့က ပြောပါတယ်။

 

"နောက်ရက်တွေဆက်တိုက်လေယာဥ်နဲ့မြို့ပြန်သိမ်းတော့မယ့်သဘော၊ နေအိမ်ပြန်လာနေသူတွေလည်း စစ်ထပ် ရှောင်ရပြန်ပြီ၊ ခုအထုပ်တွေသိမ်းပြီးပြေးရတော့မယ်၊ ဘာပစ္စည်းမှာမကျန်တဲ့ထိသူတို့က မြို့ကို ပြာဖြစ်အောင် ကြဲမှာ၊ ဒါကြောင့် ခုမနေရဲကြဘူး၊ ထပ်ပြေးရတော့မယ်"လို့ မြို့ခံတဦးက ပြောပါတယ်။

 

လားရှိုးမြို့ခံအများအပြားဟာ ရှမ်းတောင်ပိုင်းနဲ့ မန္တလေးမြို့တွေမှာ ရှောင်ပြေးခဲ့နေရတာပါ။

 

ဒီရက်ပိုင်းအတွင်းစစ်ကောင်စီက ဗုံး ကြဲချခဲ့ရာကနေ နေအိမ် ၊အဆောက်အဦးအများအပြား မီးလောင်ပျက်စီး ခဲ့တယ်လို့ လားရှိုးမြို့ပြန်လည်ထူထောင်ရေးအဖွဲ့က သတင်းထုတ်ပြန်ထားပါတယ် ။

 

ရှမ်းပြည်နယ်မြောက်ပိုင်း လားရှိုးကို ကိုးကန့်တပ် (MNDAA) ထိန်းချုပ်ထားတာဖြစ်ပါတယ်။

 

လားရှိုးမြို့က အများပြည်သူပိုင် နေရာတွေကို စစ်ကောင်စီတပ်ကအကြိမ်ပေါင်းများစွာ လေကြောင်းဗုံးကြဲ တိုက်ခိုက်မှု ပြုလုပ်ခဲ့တာကြောင့် ထိခိုက်မူတွေကြုံနေရတယ်လို့ ဒေသခံတွေက ပြောပါ။

 

MNDAAဟာ ပြီးခဲ့တဲ့စက်တင်ဘာ ၁၈ ရက်က အမျိုးသားညီညွတ်ရေးအစိုးရ (NUG)နဲ့စစ်ရေး၊ နိုင်ငံရေ းအရ ပူးပေါင်းခြင်း၊ စစ်မြေပြင်ချဲ့ထွင်ခြင်း၊ မန္တလေးနဲ့တောင်ကြီးကို ထိုးစစ်ဆင် တိုက်ခိုက်တာ​တွေ လုံးဝပြုလုပ်မှာ မဟုတ်ဘူးဆိုပြီးထုတ်ပြန်ထားပါတယ်။

 

မြောက်ပိုင်းမဟာမိတ် ညီနောင်သုံးဖွဲ့ဟာ ပြီးခဲ့သည့် ၂၀၂၃ ခုနှစ်၊ အောက်တိုဘာ ၂၇ ရက်မှ စတင်ပြီး ရှမ်းပြည်နယ်မြောပိုင်းမှာ “၁၀၂၇” စစ်ဆင်ရေး ဖော်ဆောင်ခဲ့တာပါ။

 

ပုံစာ- လားရှိုးမြို့ကို စစ်တပွက ဗုံးကြဲထားမှုမြင်ကွင်းများ (ဓါတ်ပုံ- လူမှုကွန်ရက်)

 

Burma Associated Press