ကန့်ဘလူ၊ ဇန်နဝါရီ ၁၈။

စစ်ကိုင်းတိုင်း၊ ကန့်ဘလူခရိုင်၊ ထန်းကုန်းတိုက်နယ်ညောင်ဇင်လေး (အနောက်)နှင့် ယောရွာတွင် အထိုင်ချ နေသည့် စစ်ကောင်စီတပ်နှင့် ပျူစောထီးများအား ကန့်ဘလူခရိုင်မဟာမိတ်အဖွဲ့များက သွားရောက်တိုက်ခိုက် ခဲ့ရာ ၈ဦးထက်မနည်း သေဆုံးခဲ့ကြောင်းသိရသည်။

ယမန်နေ့ ၁၇ ရက် နေ့လယ်ပိုင်းက အထက်ပါနယ်မြေတွင်အထိုင်ချထားသည့်အင်အား ၂၀ ကျော်ပါ စစ်ကောင်စီ တပ်နှင့် ပျူစောထီးအဖွဲ့ဝင်များအား Kanbalu Underground Warriors ၊ MPF U.18 ၊ ကန့်ဘလူ မြို့နယ် ပြည်သူ့ကာကွယ်ရေး အဖွဲ့-ပကဖ ၊ မြေပြင်လှုပ်ရှားညီနောင်များနှင့် ကန့်ဘလူ မြို့နယ် L-PDF အဖွဲ့များ က ၆၀ မမ လက်နက်ကြီး ၈လုံးဖြင့် ပစ်ခတ်တိုက်ခိုက်ခဲ့ခြင်းဖြစ်သည်။

"အဲ့ဒါအပြင် ထန်းကုန်းဘက်မှစစ်ကူလာတဲ့စစ်ကောင်စီတပ်နဲ့ပျူစောထီး အဖွဲ့ဝင်များကိုလည်း ဘိုတဲကုန်းနဲ့ ဆူးပုတ်ကုန်းရွာအကြား မူးဘောင်လမ်းမှာမိုင်းနှစ်လုံး ဆွဲပြီးထပ်မံတိုက်ခိုက်ခဲ့တယ်" ဟု ကျွန်းလှ ကန့်ဘလူ တက်ကြွလှုပ်ရှားသူများအဖွဲ့-ကန့်ဘလူခရိုင် မှဆိုသည်။

 

အဆိုပါမဟာမိတ်အဖွဲ့များ၏ ပစ်ခတ်တိုက်ခိုက်ခြင်းကိုခံခဲ့ရသည့် ယင်းစစ်ကောင်စီတပ်နှင့်ပျူစောထီး စစ်ကြောင်းမှာ အဆိုပါနေ့ ညနေပိုင်းမှာယောရွာထိပ်တွင်အင်အားထပ်တိုးဖြည့်နေစဉ် မဟာမိတ် အဖွဲ့များက Drone ဗုံးသီး ၁ လုံး၊ လက်နက်ကြီး၊ လက်နက်ငယ်များဖြင့်ထပ်မံသွားရောက် တိုက်ခိုက်ခဲ့သည်။

 

ယင်းတိုက်ခိုက်မှုတွင်မိနစ် ၃၀ ခန့်အပြန်အလှန်ပစ်ခတ်မှုများဖြစ်ခဲ့ပြီး၊ စစ်ကောင်စီနှင့် ပျူစောထီး အဖွဲ့ဝင်ဘက် မှ ၈ ဦးထက်မနည်း သေဆုံးကာ၊ အပြင်းအထန်ဒဏ်ရာရရှိမှုများရှိခဲ့ကြောင်းသိရသည်။

 

 
ပုံစာ - မဟာမိတ်များတိုက်ခိုက်မှုအတွင်း သေဆုံးသွားသည့်အကြမ်းဖက်စစ်ကောင်စီနှင့် ပျူစောထီး တပ်ဖွဲ့ဝင်များ

Photo Credit- ကျွန်းလှ ကန့်ဘလူ တက်ကြွလှုပ်ရှားသူများအဖွဲ့ - ကန့်ဘလူခရိုင်