BAP၊ ဘာသာပြန်။

 

ကမ္ဘာလုံးဆိုင်ရာ ငွေကြေးဆိုင်ရာ ရာဇဝတ်မှုများကို စောင့်ကြည့်သည့် အဖွဲ့အစည်း၏ အကြီးအကဲက အယောင်ပြကုမ္ပဏီများကို ရာဇဝတ်မှုကျူးလွန်သူများအတွက် “ထွက်ပြေးလွတ်မြောက်ရန် ကား” ဟု ခေါ်ဆိုခဲ့ပြီး ၎င်းတို့၏ သတင်းအချက်အလက်များကို ပွင့်လင်းမြင်သာစွာ ထုတ်ဖော်ရန် နိုင်ငံများကို တောင်းဆိုခဲ့ကာ ဤပြဿနာသည် နောက်လာမည့် နိုင်ငံအလိုက် အကဲဖြတ်မှုအသစ်၏ အဓိက အစိတ်အပိုင်း ဖြစ်လာမည်ဖြစ်ကြောင်း ပြောကြားခဲ့သည်။

 

သမ္မတ ဒေါ်နယ် ထရန့်အုပ်ချုပ်နေသည့် အမေရိကန်ပြည်ထောင်စုနှင့် ဆွစ်ဇာလန်တို့က အကျိုးခံစားခွင့် ရှိသည့် ပိုင်ဆိုင်သူများဆိုင်ရာ ပွင့်လင်းမြင်သာမှု စည်းမျဉ်းများကို ယခုနှစ်တွင် ပြန်လည်ရုပ်သိမ်းခဲ့ ပြီးနောက် ငွေကြေးဆိုင်ရာ လုပ်ငန်းဆောင်ရွက်မှုများ အဖွဲ့ (Financial Action Task Force - FATF) ၏ အယောင်ပြကုမ္ပဏီများကို အဓိကထား အာရုံစိုက်မှု စတင်လာခဲ့သည်။

 

အစိုးရများအချင်းချင်းကြား ဖွဲ့စည်းထားသည့် ပဲရစ်အခြေစိုက် FATF သည် ငွေကြေးခဝါချမှု တိုက်ဖျက် ရေး အဖွဲ့ဖြစ်ပြီး ငွေကြေးဆိုင်ရာ ရာဇဝတ်မှုများကို လျှော့ချရန် ရည်ရွယ်သည့် အကြံပြုချက်များ အကောင်အထည်ဖော်မှုအတွက် နိုင်ငံများကို ခြောက်နှစ်တစ်ကြိမ် အကဲဖြတ်လေ့ရှိသည်။

 

ယင်းအကြံပြုချက်များတွင် ကုမ္ပဏီများ၊ အစုအဖွဲ့များ၏ နောက်ကွယ်မှလူများ (အကျိုးခံစားခွင့်ရှိသည့် ပိုင်ဆိုင်သူများဟုလည်း ခေါ်ဆိုသိရှိကြသည်) နှင့်ပတ်သက်သည့် တိကျမှန်ကန်ပြီး နောက်ဆုံး သတင်း အချက်အလက်များကို မှတ်တမ်းတင်ထားရန် လိုအပ်ချက်လည်း ပါဝင်သည်။

 

ရာဇဝတ်မှုတိုက်ဖျက်ရေးအတွက် အားနည်းသော အစီအမံများရှိသည့် နိုင်ငံများကို FATF က ၎င်း၏ “မီးခိုးရောင်စာရင်း” ထဲသို့ ထည့်သွင်းနိုင်ပြီး၊ ယင်းသို့ စာရင်းသွင်းခံရပါက စောင့်ကြည့်မှုများ ပိုမို လုပ်ဆောင်ခံရကာ ရင်းနှီးမြှုပ်နှံသူများအပေါ် ၎င်းတို့၏ ဆွဲဆောင်နိုင်မှု ထိခိုက်နိုင်သည်

 

 

နောက်အကြိမ် အကဲဖြတ်မှုတွင် "ဒီစနစ်တွေရဲ့ ထိရောက်မှုကို ကျွန်မတို့ အလေးအနက်ထား စစ်ဆေးသွားမှာပါ" ဟု FATF ဥက္ကဋ္ဌ Elisa de Anda Madrazo က ရိုက်တာနှင့် တွေ့ဆုံမေးမြန်းခန်းတွင် ပြောခဲ့သည်။ အယောင်ပြကုမ္ပဏီများကို ရာဇဝတ်မှုကျူးလွန်သူများအတွက် “ထွက်ပြေးလွတ်မြောက်ရန် ကား” ဟုလည်း ဖော်ပြခဲ့သည်။

 

၎င်းက “နိုင်ငံတွေအနေနဲ့ သတင်းအချက်အလက်တွေက နောက်ဆုံးရ၊ ပြည့်စုံ၊ မှန်ကန်ပြီး ဥပဒေစိုးမိုးရေး အာဏာပိုင်တွေအတွက် အလွယ်တကူ အဆင်သင့်ရရှိနိုင်ဖို့ သေချာအောင် လုပ်ဆောင်ရပါမယ်” ဟု ဆိုသည်။

 

“ဒီစံနှုန်းတွေကို အကောင်အထည်ဖော်နေပြီး ဒီဦးတည်ချက်ကို သွားနေတဲ့ နိုင်ငံတွေလည်း ရှိနေတာကို ကျွန်မတို့ တွေ့ရပါတယ်” ဟုလည်း ၎င်းက ဖြည့်စွက်ပြောသည်။

 

ရာဇဝတ်မှုတိုက်ဖျက်ရေးအတွက် အားနည်းသော အစီအမံများရှိသည့် နိုင်ငံများကို FATF က ၎င်း၏ “မီးခိုးရောင်စာရင်း” ထဲသို့ ထည့်သွင်းနိုင်ပြီး၊ ယင်းသို့ စာရင်းသွင်းခံရပါက စောင့်ကြည့်မှုများ ပိုမို လုပ်ဆောင်ခံရကာ ရင်းနှီးမြှုပ်နှံသူများအပေါ် ၎င်းတို့၏ ဆွဲဆောင်နိုင်မှု ထိခိုက်နိုင်သည်။ လက်ရှိ မီးခိုးရောင်စာရင်းတွင် မိုနာကိုနှင့် ဗြိတိသျှ ဗာဂျင်းကျွန်းစုတို့ ပါဝင်သည်။ မြောက်ကိုရီးယား၊ အီရန်နှင့် မြန်မာနိုင်ငံတို့မှာ အနက်ရောင်စာရင်းတွင် ပါဝင်သည်။

 

ယခုနှစ် အစောပိုင်းတွင် အမေရိကန်အစိုးရက တရားမဝင်ငွေကြေးများကို တိုက်ဖျက်ရန် ရည်ရွယ်သည့် အစီအမံအချို့ကို ရုပ်သိမ်းခဲ့သည်။ အမေရိကန်ဘဏ္ဍာရေးဝန်ကြီးဌာန၏ ငွေကြေးဆိုင်ရာ ရာဇဝတ်မှု ဌာနသည် မတ်လတွင် ပြည်တွင်းကုမ္ပဏီများကို ၎င်းတို့၏ အကျိုးခံစားခွင့်ရှိသော ပိုင်ဆိုင်မှုဆိုင်ရာ အချက်အလက်များကို အစိုးရသို့ ပေးပို့ရန် လိုအပ်ချက်ကို ရပ်ဆိုင်းခဲ့သော်လည်း နိုင်ငံခြား ကုမ္ပဏီများ အတွက်မူ လိုအပ်ချက်မှာ ဆက်လက်ရှိနေဆဲဖြစ်သည်။

 

ဇွန်လတွင် ဆွစ်ဇာလန်လွှတ်တော်သည် အကျိုးခံစားခွင့်ရှိသော ပိုင်ဆိုင်သူများအတွက် စီစဥ်ထားသော နိုင်ငံပိုင် ပွင့်လင်းမြင်သာမှု မှတ်ပုံတင်စာရင်းမှ ဖောင်ဒေးရှင်းများနှင့် အသင်းအဖွဲ့များကို ဖယ်ထုတ် ခဲ့သည်။ ဤလုပ်ရပ်သည် ဆွစ်ဇာလန်၏ ငွေကြေးခဝါချမှုနှင့် အကြမ်းဖက်မှုအတွက် ငွေကြေး ထောက်ပံ့မှုကို တိုက်ဖျက်ရန် ကတိကဝတ်ကို ထိခိုက်စေမည်ဖြစ်ကြောင်း အစိုးရက ယခင်က သတိပေး ခဲ့သည်။

 

Moody's က ၂၀၂၃ ခုနှစ်တွင် ကမ္ဘာတစ်ဝန်းရှိ မှတ်ပုံတင်ထားသော ကုမ္ပဏီ ၄၇၂ သန်းကို ပြုလုပ်ခဲ့သည့် လေ့လာမှုတစ်ခုအရ ကုမ္ပဏီ သန်း ၂၀ နီးပါးသည် အယောင်ပြကုမ္ပဏီ ဖြစ်နိုင်သည်ဟု ညွှန်ပြသည့် လက္ခဏာရပ် အနည်းဆုံးတစ်ခု ရှိနေကြောင်းတွေ့ရှိရသည်။ ဗြိတိန်နိုင်ငံသည် အလားအလာရှိသည့် အချက်ပြမှုများ အများဆုံး တွေ့ရှိခဲ့ရသည်။

 

နိုင်ငံများအကြား သဘောထားကွဲပြားမှု ပိုမိုများပြားလာခြင်းက ရာဇဝတ်မှုတိုက်ဖျက်ရေးကို ပိုမိုခက်ခဲ စေခြင်း ရှိမရှိ မေးမြန်းခဲ့ရာ de Anda Madrazo က "နိုင်ငံတကာပူးပေါင်းဆောင်ရွက်မှုနဲ့ ဆက်သွယ် ရေးမှာ ဘယ်လိုကွဲပြားမှုပဲဖြစ်ဖြစ် လုပ်ငန်းစဥ်တစ်ခုကို ထိခိုက်စေပါတယ်" ဟု ပြောကြားခဲ့သည်။

 

“FATF အဆင့်မှာဆိုရင် ဒီနှစ်မှာ အဖွဲ့ဝင်တွေရဲ့ ကတိကဝတ်တွေ လျော့ကျသွားတာကို ကျွန်မတို့ မတွေ့ရ သေးပါဘူးဆိုတာ ကျွန်မပြောနိုင်ပါတယ်။” ဟု de Anda Madrazo က ပြောကြားခဲ့ပြီး ယင်းအခြေအနေ သည် ကမ္ဘာလုံးဆိုင်ရာ ကွန်ရက်တစ်ခုလုံးနှင့်လည်း သက်ဆိုင်ကြောင်း ပြောဆိုခဲ့သည်။

 

အွန်လိုင်းရာဇဝတ်မှုသည် FATF အတွက် အဓိကစိန်ခေါ်မှုတစ်ခုဖြစ်ပြီး၊ ၎င်းသည် အမြဲတမ်း ပြောင်းလဲ တိုးတက်နေသောကြောင့် အာဏာပိုင်များသည် ဦးနင်းပဲ့ထောင်၊ ပဲ့နင်းဦးထောင်ဖြစ်နေသည်ဟု de Anda Madrazo က ပြောကြားခဲ့သည်။

 

ရာဇဝတ်မှုကျူးလွန်သူများက ငွေကြေးများကို နိုင်ငံဖြတ်ကျော်ကာ ဖမ်းမမိအောင် ရွှေ့ပြောင်းရန်အတွက် virtual assets (ဒီဂျစ်တယ်ပိုင်ဆိုင်မှုများ) ဖြစ်သည့် cryptocurrencies များကို ပိုမိုအသုံးပြု လာကြသောကြောင့် ၎င်းတို့သည် FATF ၏ လုပ်ငန်းစဉ်တွင် ထိပ်တန်းဦးစားပေးအဖြစ် ဆက်လက် ရှိနေဆဲဖြစ်ကြောင်း ၎င်းက ဆိုသည်။

 

ကိုးကား - Reuters

 

ပုံစာ -OECD ဌာနချုပ်၊ ပဲရစ်၊ ပြင်သစ်နိုင်ငံတွင် ၂၀၁၉ ခုနှစ်၊ အောက်တိုဘာလ ၁၈ ရက်နေ့က ပြုလုပ်ခဲ့သည့် မျက်နှာစုံညီအစည်းအဝေးအပြီး သတင်းစာရှင်းလင်းပွဲတွင် တွေ့မြင်ရသည့် FATF (Financial Action Task Force) ၏ အမှတ်တံဆိပ်။ REUTERS/Charles Platiau/File Photo