ဇန်နဝါရီလ ၂၁

 

စစ်ကိုင်းတိုင်း ကသာခရိုင်၊ အင်းတော်မြို့၊ ကြိမ်ချောင်းရွာနှင့် သစ်ပုံလွင်ရွာကြားတွင် စစ်ကောင်စီတပ်နှင့် KIA၊ PDF၊ ပကဖ ပူးပေါင်းတပ်ဖွဲ့တို့ ယမန်နေ့က တိုက်ပွဲဖြစ်ပွားပြီး အသက် ၂၀ အရွယ် ပကဖ ရဲဘော်တစ်ဦး ကျဆုံးခဲ့ကြောင်း အင်းတော်-တော်လှန်ရေးအဖွဲ့က ထုတ်ပြန်ခဲ့သည်။

 

ထီးချိုင့်ဘက်မှ တက်လာသည့် အင်အား ၁၃၀ ခန့်ပါ စစ်ကောင်စီစစ်ကြောင်းနှင့် တိုက်ပွဲဖြစ်ပွားခဲ့ကာ စစ်ကောင်စီဘက်မှ တစ်ဦးသေဆုံးပြီး လေးဦးထိခိုက်ဒဏ်ရာရရှိခဲ့ကြောင်း ပြည်သူ့ကာကွယ်ရေးဘက်မှ PDF ရဲဘော်နှစ်ဦး ထိခိုက်ဒဏ်ရာရရှိခဲ့ပြီး ပကဖ တစ်ဦးကျဆုံးခဲ့ကြောင်း ဆိုသည်။

 

ထိုသို့ တိုက်ပွဲဖြစ်ပွားရာ စစ်ကောင်စီတပ်သည် ထီးချိုင့်မြို့ လယ်မှီးရွာမှ ဓားစာခံအဖြစ် ဖမ်းဆီးခေါ်ဆောင်လာ သည့် အပြစ်မဲ့ပြည်သူ ၃ ဦးကို သတ်ဖြတ်ခဲ့ပြီးနောက် ဦးသျှစ်ကုန်းရွာ တောထဲတွင် ပစ်ထားခဲ့သည်ဟုလည်း အင်းတော်- တော်လှန်ရေး အဖွဲ့က ဆိုသည်။

 

သတ်ဖြတ်ခံရသူ ၃ ဦးမှာ အသက် ၃၅ နှစ်အရွယ် ဦးရဲဝင်းအောင်၊ ဦးညိုအေးနှင့် အသက် ၄၀ အရွယ် ဦးစန်းဝေတို့ဖြစ်ကြောင်း အဆိုပါ စစ်ကြောင်းသည် စစ်ကောင်စီတပ် တပ်မ ၈၈လက်အောက်ခံ ခမရ ၃၀၁ နှင့် ခလရ ၄၁၆ တပ်ရင်းတို့ ဖြစ်ကြောင်း အင်းတော်အဖွဲ့က ဆိုသည်။

 

ဓာတ်ပုံ Indaw- Revolution

 

Burma Associated Press