မကွေး ၊ ဖေဖော်ဝါရီ - ၁၁

 

မကွေးတိုင်း၊ ပခုက္ကူမြို့နယ်၊ မြစ်ခြေမြို့အခြေစိုက် စစ်တပ်​၏ ဆေးဝါးနှင့် မွေးမြူရေးတပ်ကို PDFက ဝင်ရောက်တိုက်ခိုက်ခဲ့ပြီး စစ်တပ်ဘက်က ၁၀ ဦးခန့်သေဆုံးကာ ၃ ဦးအရှင် ဖမ်းဆီးရမိခဲ့ကြောင်း မြိုင်ပကဖနှင့် နီးစပ်သူတဦးကပြောသည်။

 

မြိုင်မြို့နယ် ပြည်သူ့ကာကွယ်ရေးတပ်ဖွဲ့၊ မြစ်ခြေMCKC ပြည်သူ့ကာကွယ်ရေးတပ်ဖွဲ့၊ Earthquake ပြည်သူ့ ကာကွယ်ရေးတပ်ဖွဲ့ တို့က ယနေ့ မနက် ၆ နာရီခွဲခန့်မှ စတင်ပြီး အဆိုပါတပ်ကို စတင်တိုက်ခိုက်ခဲ့ကြောင်း၊ တိုက်ပွဲဖြစ်ပြီး ၃ နာရီခန့်အကြာမှာ စခန်းကို သိမ်းနိုင်ခဲ့ကြောင်း ၎င်းကဆိုသည်။

 

" စခန်းကိုတော့ မီးရှို့ခဲ့ပါတယ်။ သူတို့ဘက်က ကျဆုံးမှုကတော့ ကျနော်တို့ မျက်မြင်ပါ။ အရာရှိတွေလည်း ကျတယ် " ဟု ၎င်းကပြောသည်။

 

အဆိုပါတိုက်ပွဲအတွင်း စစ်အုပ်စု​၏ သေနတ် ၃ လက်အပါအဝင် စစ်အသုံးအဆောင်ပစ္စည်းများကိုလည်း သိမ်းဆည်းရမိခဲ့ကြောင်း သိရသည်။

 

စစ်တပ်ဘက်ကတော့ ယင်းအကြောင်းအရာနှင့်ပတ်သက်ပြီး တစ်စုံတစ်ရာထုတ်ပြန်ထားခြင်းမရှိသေးပေ။

 

Photo - မူရင်းပိုင်ရှင်ကို ခရစ်ဒစ်ပေးပါသည်။

Burma Associated Press