ဘီအေပီ၊ ဇန်နဝါရီ ၁၂

 

နွေဦးတော်လှန်ရေး၏ ကြားကာလပညာရေးအစီအစဉ်တစ်ခုဖြစ်သည့် နွေဦးတက္ကသိုလ်တွင် ၂၀၂၂ ခုနှစ်အတွင်း ကျောင်းသား၊ ကျောင်းသူပေါင်း ၁၄၀၀၀ နီးပါး တက်ရောက်ခဲ့ကြောင်းသိရသည်။

 

အဆိုပါတက္ကသိုလ်တွင်နာယကအဖွဲ့ဝင်များအဖြစ် ဆရာစောကပီ၊ ဒေါက်တာမီမီဝင်းဘတ်နှင့် ဒေါက်တာ ထွန်းမြင့် တို့က ပါဝင်ကူညီအားဖြည့်ပေးခဲ့ကြပြီး၊ သင်ကြားရေးတွင်လည်း CDM ဆရာ၊မ များနှင့် ပညာရှင် ပေါင်း အယောက်(၂၀၀) ကျော်ကအားဖြည့်ကူညီပေးခဲ့ကြသည်။

 

နွေဦးတက္ကသိုလ်တွင် မြန်မာနိုင်ငံတစ်ဝှမ်းမှကျောင်းသားလူငယ်စုစုပေါင်းအရေအတွက်မှာ (၁၃,၆၉၃) ဦး တက်ရောက်ခဲ့ပြီး၊ တိုင်းနှင့် ပြည်နယ်အသီးသီးအပြင် ပြည်ပနိုင်ငံများမှလူငယ်များလည်းပါဝင် အားဖြည့် လျက်ရှိကာ၊ ၂၀၂၂ ခုနှစ်အတွင်းပို့ချခဲ့သည့်သင်တန်းအရေ အတွက် ၅၀၇ တန်းကျော်ရှိခဲ့ ကြောင်း နွေဦး တက္ကသိုလ်မှသိရသည်။

 

ထို့အပြင် နွေဦးတက္ကသိုလ်အနေဖြင့် "Mizzima Radio” ပူးပေါင်းကာပညာရပ်သင်ခန်းစာပေါင်း (၆၄) ခု၊ Learning Management System (LMS) ဖြင့် အချိန်၊နေရာမရွေးလေ့လာနိုင်သည့် ပညာဒါန အတန်း(၁၄) တန်းနှင့် မြန်မာနိုင်ငံတစ်ဝှမ်းမှ အဖွဲ့အစည်းပေါင်း (၃၀)၊ ပြည် ပနိုင်ငံများဖြစ်သည့် အမေရိကန်၊ ကိုးရီးယား၊ နယူးဇီလန်၊ ဖိလစ်ပိုင်၊ ဆွစ်ဇာလန်၊ သြစတြေးလျ၊ အင်ဒိုနီးရှား၊ ထိုင်းနိုင်ငံ များမှ နိုင်ငံတကာအဖွဲ့အစည်းများနှင့်လည်း ချိတ်ဆက်ပူးပေါင်းလုပ်ဆောင်နိုင်ခဲ့‌ကြောင်းဆိုသည်။

 

"အမေရိကန် နိုင်ငံခြားရေးဝန်ကြီး Mr. Antony Blinken နဲ့လည်း တွေ့ဆုံမှုရှိခဲ့ပြီးအနာဂတ်ပညာ ရေးဆိုင်ရာအစီအစဉ်များပြုလုပ်ဖို့အတွက်ဆွေး နွေးခဲ့ကြပါတယ်။ ၂၀၂၂ ခုနှစ်မှာ ပထမဆုံး Arizona State University နဲ့ ပူးပေါင်းဖွင့် လှစ်မယ့်ရက်တိုသင်တန်းများအတွက်လျှောက်လွှာခေါ်ယူမှုများ ရှိခဲ့ပါတယ်။ ဒါတင်မကပဲ Victoria University of Wellington နဲ့လည်းတရားဝင်လက်တွဲကြောင်း ထုတ်ပြန်မှုကို ပြုလုပ်နိုင်ခဲ့ပါတယ်" ဟု နွေဦးတက္ကသိုလ်အဖွဲ့အစည်းက ပြောသည်။

 

ယခုနှစ်တွင်လည်း နိုင်ငံတကာအဖွဲ့အစည်းများနှင့်ပူး ပေါင်းပြီး မြေပြင်ပညာရေးကိုအရှိန်မြှင့်တင်ခြင်း၊ ရက်တိုရက်ရှည် ခရက်ဒစ်ရယူနိုင်သောသင်တန်းများတိုးချဲ့ဖွင့်လှစ်ခြင်းများ ပြုလုပ်သွားမည် ဖြစ်ကြောင်း၊ အင်တာနက် မရရှိနိုင်သောဒေသများတွင် ကြားကာလပညာသင်ကြားမှုများကို အင်တိုက်အားတိုက် ဆောင်ရွက် သွားမည်ဖြစ်ကြောင်း နွေဦးတက္ကသိုလ်အဖွဲ့ အစည်းကအသိပေး ပြောကြားထားသည်။

 

 

Burma Associated Press