ဒီဇင်ဘာ ၂၈

 

စစ်ကောင်စီလက်အောက်ခံ ပညာရေးစနစ်အား ဆန့်ကျင်နေသည့် ကျောင်းသား/သူများအတွက် Burma Academy တွင် Google Professional Certificates Program များကို အခမဲ့သင်ယူနိုင်ခွင့် Scholarship များ စတင်လျှောက်ထားနိုင်ပြီ ဖြစ်ကြောင်းသိရသည်။

 

Coursera နဲ့ Burma Academy တို့ တွေ့ဆုံဆွေးနွေးပြီးနောက် သဘောတူညီမှုရရှိခဲ့သည့် အဆိုပါ Program များကို ကြိုတင်ကြေညာထား‌သော်လည်း လျှောက်ထားကြသည့် ကျောင်းသား/သူများ၏ အချက်အလက်များ လုံခြုံစေရန် စီစဉ်နေရသည့်အတွက် ကြန့်ကြာနေခဲ့ရကြောင်း Burma Academy က ရှင်းပြပြောဆိုထားသည်။

 

Scholarship Programs များအဖြစ် Google Data analytics၊ Google Digital marketing & e-commerce၊ Google IT support၊ Google IT automation with Python၊ Google Project management နှင့် Google UX design တို့အား ပေးအပ်သွားမည်ဖြစ်သည်။

 

အဆိုပါ Programs များ၏ Scholarship ကို ကျောင်းသူ၊ကျောင်းသား ၅၀၀ ဦးအတွက် ပေးအပ်မည် ဖြစ်ကာ၊ အယောက် ၅၀၀ မပြည့်မချင်း လစဉ် လတစ်လ၏ အစတွင် Burma Academy Facebook Page တွင် လျှောက်ထားနိုင်ကြောင်းသိရသည်။

 

ယင်း Programs ကို လျှောက်ထားရာတွင် Burma Academy Facebook Page မှ ကြေညာထားသော https://tinyurl.com/BA-CourseraScholarship ဆိုသည့် Link သို့ ဝင်ရောက်ပြီး Burma Academy Webpage မှတဆင့် Scholarship Form ကို ဖြည့်သွင်းလျှောက်ထားရမည်ဖြစ်သည်။

 

" Form ဖြည့်သွင်းရာမှာ ဖြေဆိုရမယ့် မေးခွန်းတွေကို သေချာလေးဖြေပေးကြဖို့ တိုက်တွန်းချင်ပါတယ်" ဟု Burma Academy က ဆိုသည်။

 

လျှောက်ထားပြီးနောက် တစ်ပတ်အကြာတွင် Shortlisted Students များကို studentaffairs@burma.ac ဆိုသည့် Email မှတဆင့် Interviewအတွက် Schedule ပေးပို့သွားမည်ဖြစ်ပြီး၊ စစ်ကျွန်ပညာရေးကို ဆန့်ကျင်နေသည့် အဖွဲ့အစည်း ဖြစ်သည့်အတွက် Interview Process ကို မဖြစ်မနေ ထည့်သွင်းရခြင်း ဖြစ်ကြောင်းကိုလည်း Burma Academy က ရှင်းပြထားသည်။

 

တက်ရောက်ခွင့် ရရှိသူများအနေဖြင့် ပုံမှန် Coursera တွင် လေ့လာသလို Video Lectures များနှင့် Self-Paced လေ့လာရမှာဖြစ်ပြီး၊ ဘာသာရပ်တစ်ခုချင်းစီအတွက် အဆုံးထိတက်ရောက်ပြီး သတ်မှတ်ထားသည့် Assignment၊ Grading များ ပြည့်မီမှသာ Google မှ တရားဝင်ပေးအပ်သည့် Google Professional Certificate ကို ရရှိမည်ဖြစ်ကြောင်း သိရသည်။

 

"ရွေးချယ်ခံရတဲ့ ကျောင်းသား/သူတွေအနေနဲ့လည်း Course တွေကို တက်ရောက်တဲ့အခါမှာ ပြီးမြောက်တဲ့အထိ တက်ရောက်ပေးဖို့ အထူးမေတ္တာရပ်ခံလိုပါတယ်။ ဒါမှသာ ရွေးချယ်မခံရတဲ့သူတွေ အတွက်လည်း မျှတမှာ ဖြစ်ပါတယ်" ဟု Burma Academy က ထပ်မံတိုက်တွန်း ပြောကြားထားသည်။

 

Burma Associated Press