ဖေဖော်ဝါရီ ၇

 

မကွေးတိုင်းဒေသကြီးအတွင်းရှိ ပခုက္ကူ - ရေစကြို ကားလမ်းတစ်နေရာတွင် စစ်ကောင်စီ တပ်ဖွဲ့ဝင်များနှင့် ပြည်သူ့စစ် (ဒေသအခေါ် ပျူစောထီး) အဖွဲ့တို့လိုက်ပါလာသည့် ကားနှစ်စီးကို ပစ်ခတ်တိုက်ခိုက်ခဲ့ပြီး ၁၀ ဦး သေဆုံးသွားကြောင်း ပြည်သူ့ကာကွယ်ရေးတပ်မတော် ပခုက္ကူခရိုင်တပ်ရင်း(၃) က ထုတ်ပြန်ထားသည်။

 

ယခုလ ဖေဖော်ဝါရီလ ၄ ရက် ညနေ ၄ နာရီခွဲ အချိန်ခန့်တွင် ပခုက္ကူ - ရေစကြို ကားလမ်းပေါ်ရှိ ကိုရှိန်း ဆီဆိုင်ရှေ့၌ အင်အား ၁၄ ဦးခန့်ပါ စစ်ကောင်စီ ကားနှစ်စီးကို ပြည်သူ့ကာကွယ်ရေးတပ်မတော် ပခုက္ကူခရိုင် တပ်ရင်း (၃) မှ ပစ်ခတ်ရှင်းလင်းခဲ့ကြောင်း ထုတ်ပြန်ထားသည်။

 

ယင်းပစ်ခတ်မှုအတွင်း စစ်ကောင်စီတပ်ဖွဲ့ဝင် ၇ ဦး နေရာမှာပင် သေဆုံးသွားပြီး အခြား ၃ ဦးမှာလည်း ပစ်ခတ်မှုမှ ထွက်ပြေးလွတ်မြောက်သွားသည့် ကားပေါ်တွင်ပါသွားခဲ့ပြီး ဆေးရုံတွင် ထပ်မံ သေဆုံးသွားကြောင်း ဆိုထားသည်။

 

အဆိုပါ ပစ်ခတ်မှုမှာ ၅ မိနစ်ခန့်သာကြာမြင့်ပြီး စစ်အုပ်စုဖက်မှ ဟင်္သာကျေးရွာ ပျူစောထီးခေါင်းဆောင် တစ်ဦး အပါအဝင် ၁၀ ဦး သေဆုံးခဲ့ပြီး ပြည်သူ့ကာကွယ်ရေးအဖွဲ့ဝင်များ အထိခိုက်မရှိခဲ့ကြောင်း ဆိုထားသည်။

 

ထို့အပြင် စစ်သားများထံမှ သေနတ် ၇ လက် အပါအဝင် ကျည်ဆန်၊ လက်ပစ်ဗုံးနှင့် စစ်အသုံးအဆောင် ပစ္စည်းများ သိမ်းဆည်းရမိခဲ့ကြောင်း ဆိုထားသည်။

 

Photos - ပခုက္ကူခရိုင် အမှတ် (၃) တပ်ရင်း၊

 

Burma Associated Press