(BAP၊ ဘာသာပြန် ဆောင်းပါး)

 

 

မြန်မာ့နိုင်ငံရေးအကျပ်အတည်းအပေါ်  အနောက်အုပ်စုရဲ့ စိတ်ဝင်စားမှုက အကန့်အသတ်မျှသာ ရှိတဲ့အပေါ် အများက စိတ်ပျက်မှုတွေရှိနေချိန်မှာ မြန်မာ့ရဲ့အိမ်နီးချင်းနိုင်ငံတွေကတော့ မြန်မာ့ နိုင်ငံရေးကို စိတ်ဝင်စားမှု စိုးစဉ်းမျှမရှိတာကို အထူးတလည် အံ့အားသင့်ရပါတယ်။

 

 

တရုတ်နေ့စဉ်ထုတ်သတင်းစာတစ်စောင်ကို ဖတ်ရူကြည့်မယ်ဆိုရင် မြန်မာပြည်သူ‌တွေရဲ့ အာဏာ သိမ်းစစ်အုပ်စု အပေါ် စိတ်ပျက်မှုနဲ့ စစ်အာဏာသိမ်းမှုအပေါ်  လက်နက်စွဲကိုင်ခုခံမှုတွေကိုလည်း သာမန်ကာလျှံကာ မျှသာ ရေးသားထားတာတွေ့ရပါမယ်။

 

မြန်မာ့အရေးကို တရုတ်ပြည်မှာ ခေတ်ပြိုင် နှိုင်းယှဉ်မှုတစ်ခုလို ဖြစ်လာမှာကို တရုတ်အစိုးရက စိုးရိမ်ကြောင့်ကြပူပန်နေလို့သာ ဖြစ်ပါတယ်

 

တရုတ်မီဒီယာတွေရဲ့ မြန်မာ့အရေးအပေါ်  သတိမမှုမိတာက တိုက်ဆိုင်တာတော့မဟုတ်ပါဘူး။ နိုင်ငံရေးအရ ပြောရမယ်ဆိုရင်  မြန်မာပြည်သူတွေရဲ့ ဒီမိုကရေစီအရေးလှုပ်ရှားရုန်းကန်မှုတွေရဲ့ လွှမ်းမိုးမှုကို တရုတ်နိုင်ငံ သား‌တွေ ခံရမှာ၊ သို့မဟုတ်လည်း မြန်မာ့အရေးကို တရုတ်ပြည်မှာ ခေတ်ပြိုင်နှိုင်းယှဉ်မှုတစ်ခုလို ဖြစ်လာမှာကို တရုတ်အစိုးရက စိုးရိမ်ကြောင့်ကြပူပန်နေလို့သာ ဖြစ်ပါတယ်။

 

 

အထူးသဖြင့် ယနေ့လို ဒစ်ဂျစ်တယ်ပလက်ဖောင်းတွေကနေတဆင့် သတင်းအချက်အလက်တွေ အလျင်အမြန် ပြန့်နှံ့နေတဲ့ခေတ်မျိုးမှာ တရုတ်အစိုးရက ပိုပြီး ပူပန်မိမှာပါ။

 

 

 

ဆင်ဆာဖြတ်တောက်မှုတွေ များပြားလွန်းလှတဲ့ တရုတ်နိုင်ငံမှာ မြန်မာရဲ့ အာဏာသိမ်းစစ်အုပ်စုက ၎င်းရဲ့ပြည်သူတွေအပေါ် ကျူးလွန်တဲ့အကြမ်းဖက်မှုတွေအကြောင်း၊ တိုင်းရင်းသားလက်နက်ကိုင် တပ်ဖွဲ့တွေနဲ့ ပြည်သူ့ကာကွယ်ရေးတပ်ဖွဲ့တွေရဲ့ စစ်အာဏာသိမ်းပိုက်မှုကို လက်နက်စွဲကိုင် တော်လှန်‌မှုအကြောင်း သတင်းတွေကို တရုတ်နိုင်ငံရဲ့သတင်းစာမျက်နှာတွေမှာ နေရာပေးဖေါ်ပြဖို့ ကို တရုတ်အစိုးရက လုံးဝကို စိတ်ဝင်စားမှာမဟုတ်ပါဘူး။ သို့ပေမယ့်လည်း မြန်မာမှာဆက်လက် ဖြစ်ပွားဆဲ ပြည်တွင်းစစ်၊ အရှိန်အဟုန်မြင့်လာတဲ့ ခုခံစစ်တွေနဲ့အတူ တွဲဖက်ပါဝင်လာတဲ့ အကြမ်းဖက်မှုတွေကို သတိထားမိနေတဲ့ တရုတ်နိုင်ငံသားအနည်းငယ်တော့ ရှိပါတယ်။ 

 

တရုတ် အနေနဲ့  အရေးပါတဲ့စီးပွားရေးလုပ်ငန်းတွေနဲ့ မဟာဗျူဟာမြောက် အကျိုးစီးပွားတွေ မြန်မာမှာ ရှိနေတာမို့ မြန်မာရဲ့တည်ငြိမ်မှုကို လိုလားပေမယ့်လည်း ၂၀၂၁ ခုနှစ်၊ စစ်အာဏာသိမ်းမှု ကစပြီး တရုတ်ပြည်တွင်း သတင်းဌာနတွေကတော့ နှုတ်ဆိတ်နေခဲ့တာပါပဲ။

 

 

တရုတ်ပြည်သူအများစုက ၎င်းတို့အိမ်နီးချင်းနိုင်ငံတွေကို သိရှိဖို့ရာကို စိတ်မဝင်စားကြပါဘူး။ တရုတ်ရဲ့ ကမ္ဘာ့အင်အားကြီးနိုင်ငံအဖြစ်သို့ လျှင်မြန်စွာဖြစ်ထွန်းလာမှုရှိပေမယ့်လည်း မြန်မာနဲ့ နယ်နိမိတ်ခြင်းထိစပ်နေတဲ့ ယူနန်ပြည်နယ်မှာနေတဲ့ သူတွေကလွဲပြီး မြန်မာလို အရေးပါမှုနည်းတဲ့ နိုင်ငံ‌တစ်နိုင်ငံရဲ့အရေးကို စိတ်ဝင်စားမှုတော့ ကျန်တရုတ်ပြည်သူ‌တွေမှာ မရှိပါဘူး။ တရုတ် ပြည်သူ‌တွေရဲ့စိတ်ဝင်စားမှုက ၎င်းတို့ပြည်တွင်း ရေးရာ (သို့မဟုတ်) အနောက် နဲ့ အာရှအရှေ့ဖျားက ပိုပြီးဖွံ့ဖြိုးတိုးတက်တဲ့ နိုင်ငံတွေမှာပဲရှိပါတယ်။

 

 

တရုတ်ရဲ့အိမ်နီးချင်းနိုင်ငံတချို့ကတော့  တရုတ်နဲ့ပထဝီနယ်မြေအရထိစပ်နေပြီး သမိုင်းကြောင်းအရ လည်း ဆက်စပ်မှုရှိနေ‌သော်လည်းပဲ ယင်းနိုင်ငံတွေ ရင်ဆိုင်ရတဲ့ စိန်ခေါ်မှုအခက်အခဲတွေနဲ့ အောင်မြင်မှုတွေဟာ အများပြည်သူဆိုင်ရာ‌ ဟောပြောချက်တွေနဲ့ ရေးသားထုတ်ပြန်မှုတွေမှာ လောင်းရိပ်မိနေတတ်ပြီး တရုတ်နိုင်ငံသားတွေရဲ့စိတ်ဝင်စားမှုကလည်းနည်းပါးတတ်ပါတယ်။ ဒီအချက်ကို မြန်မာ့အရေးမှာကြည့်ရင် ထင်ထင်ရှားရှားမြင်နိုင်ပါတယ်။ 

 

 

မြန်မာ့ရဲ့တည်ငြိမ်မှုနဲ့ နိုင်ငံရေးအပြောင်းအလဲတွေဟာ တရုတ်လိုနိုင်ငံအတွက် သိပ်အရေး ပါနေတာမို့ မြန်မာ့အရေးကို စိတ်ဝင်စားဟန်မပြတာဟာ တရုတ်ရဲ့ရွဲ့တဲ့တဲ့ အနေအထား ဖြစ်နေပါတယ်။ မြန်မာ့နိုင်ငံရေး ကသောင်းကနင်းဖြစ်မှုမှသည် မြန်မာပြည်သူတွေရဲ့ ဒီမိုကရေစီ အရေးတိုက်ပွဲဝင်ရုန်းကန်မှုအထိ မြန်မာရဲ့ ပူဆွေးသောကတွေဟာ တရုတ်ပြည်သူတွေကြားကို ကန့်သတ်တည်းဖြတ်မှုတွေနဲ့သာ ပြန်ရောက်တတ်ပါတယ်။

 

 တရုတ်ပြည်သူတွေ အဓိက စိတ်ဝင်စားတဲ့ မြန်မာ အကြောင်းကတော့ မြန်မာကအဓိကပါဝင်‌‌နေတဲ့ အွန်လိုင်းအခြေပြုလိမ်လည်ခြင်းဆိုင်ရာ ပြစ်မှု တွေပါပဲ

 

သို့ပေမယ့်လည်း မြန်မာနိုင်ငံအကြောင်း အချက်အလက်တွေက တရုတ်မီဒီယာစာမျက်နှာတွေကနေ လုံးဝ ပျောက်ကွယ်နေတာတော့မဟုတ်ပါဘူး။ တရုတ်ပြည်သူတွေ အဓိက စိတ်ဝင်စားတဲ့ မြန်မာ အကြောင်းကတော့ မြန်မာကအဓိကပါဝင်‌‌နေတဲ့ အွန်လိုင်းအခြေပြုလိမ်လည်ခြင်းဆိုင်ရာ ပြစ်မှု တွေပါပဲ။

 

 

ဒီလိမ်လည်တဲ့လုပ်ငန်းတွေဟာ တရုတ်၊ ထိုင်းနဲ့ မြန်မာတို့ ထိစပ်နေတဲ့ နယ်စပ်တွေမှာ အဖြစ်များပါတယ်။ ဒီနယ်စပ်ဒေသတွေကို တိုင်းရင်းသားလက်နက်ကိုင်တပ်ဖွဲ့တွေ၊ ပြည်သူ့စစ် အဖွဲ့တွေနဲ့ နယ်ခြားစောင့်အဖွဲ့‌တွေက အပိုင်းပိုင်းစိတ်ကာ အုပ်စိုးနေကြပြီး အွန်လိုင်းက‌နေ လိမ်လည်တဲ့ပြစ်မှုကွန်ယက်ကြီးတစ်ခုက ဝါးမြိုထားပါတယ်။ ဒီလိမ်လည်မှုတွေဟာ အဓိက အားဖြင့် တရုတ်နိုင်ငံသားတွေကိုသာ ရည်ရွယ်လေ့ရှိပေမယ့် တစ်ခါတစ်ရံမှာလည်း အနီးအနား နိုင်ငံကလူတွေပါ ထိခိုက်နစ်နာကြပြီး လိမ်လည်ခံရသူ‌တွေဟာ ငွေကြေး အကျပ်အတည်းကို ကြုံဆုံရကာ၊ ယင်းရဲ့နောက်ဆက်တွဲအနေနဲ့ တချို့ဆိုရင် ရာဇဝတ်မှုကျူးလွန် တာမျိုး‌တွေပါ ရှိလာပါတယ်။ 

 

 

ဒီပြဿနာတွေကို တုန့်ပြန်တဲ့အနေနဲ့ တရုတ်အစိုးရက  ဒေသဆိုင်ရာအာဏာပိုင်အဖွဲ့တွေနဲ့ ပူးပေါင်း ဆောင်ရွက်တာမျိုး (သို့) နယ်စပ်ဖြတ်ကျော်စစ်ဆင်ရေးတွေမှာ တိုက်ရိုက်ပါဝင်ဆောင်ရွက်တာမျိုး တွေ‌ကို ဆောင်ရွက်ရင်း ၎င်းရဲ့ဥပဒေပိုင်းဆိုင်ရာ အရေးယူမှုတွေကို အရှိန်အဟုန်မြင့် အားထုတ်ကြိုးပမ်း ခဲ့ပါတယ်။

 

ယင်း အွန်လိုင်းလိမ်လည်မှုဖြစ်စဉ်‌တွေကြောင့် တရုတ်ပြည်တွင်းသတင်းစာမျက်နှာတွေမှာဆိုရင် မြန်မာဆိုတာ "သက်ရှိ ငရဲ" လို့ တင်စားခံရလောက်တဲ့အထိ ဂုဏ်အသရေကျဆင်းအောင် ဖေါ်ပြခံရပါတယ်။

 

 

မြန်မာအကြောင်းဆိုရင် တရုတ်၊ မြန်မာ နယ်စပ်မှာဖြစ်ပွားနေတဲ့ တရုတ်နိုင်ငံသားတွေကို အထိနာစေတဲ့ အွန်လိုင်းကလိမ်လည်မှုဖြစ်စဉ်တွေ၊ မူးယစ်ဆေးဝါးထုတ်လုပ်မှုတွေ၊ ဆိုးဆိုးဝါးဝါး ဖြစ်ပေါ်နေတဲ့ လူမှောင်ခို ကူးမှုတွေအကြောင်းကိုပဲ တရုတ်မီဒီယာတွေက ‌အလေးပေး‌ရေးသား‌ ဖေါ်ပြလေ့ ရှိပါတယ်။  တချို့သတင်း တွေမှာဆိုရင် ထိုင်းနိုင်ငံကနေ ပြန်ပေးဆွဲခံရတဲ့ ကမ္ဘာလှည့်ခရီးသွားတွေကို ကရင်ပြည်နယ်ကိုဖြတ်ပြီး မြန်မာကို လူမှောင်ခို ဘယ်လိုကူးတယ်ဆိုတာမျိုးကို တမင်တကာရေးသားဖေါ်ပြပြီး သတင်းတွေကို ဖောင်းပွစေတာမျိုး တောင်ရှိပါတယ်။ 

 

 

ဒီလိုဖေါ်ပြမှုတွေကြောင့် မြန်မာ့ပြည်တွင်းရေးကိစ္စတွေမှာ တရုတ်အစိုးရအနေနဲ့ ပိုပြီးတင်းကျပ်စွာ ရပ်တည်ဖို့ကို တရုတ်ပြည်သူတွေက ဖိအားပေးတာမျိုးတွေရှိခဲ့ပါတယ်။ တရုတ်အစိုးရကလည်း အွန်လိုင်းလိမ်လည်မှုတွေနဲ့ ပတ်သက်ပြီး အရေးယူဆောင်ရွက်မှုတွေမှာ ၎င်းတို့နဲ့ပူးပေါင်း လုပ်ဆောင်ဖို့အတွက် မြန်မာအာဏာသိမ်း စစ်အုပ်စုကို ဖိအားပေးတာမျိုးရှိခဲ့ပေမယ့်လည်း ဒီလိမ်လည်မှုတွေအခြေပြုရာ နယ်မြေတွေဟာ မြန်မာစစ်တပ်ရဲ့ ထိန်းချုပ်မှုအောက်မှာ ရှိမနေတာကို တရုတ်အစိုးရက သိထားပြီးသားဖြစ်ပါတယ်။

 

 

အဲ့အတွက် တရုတ်အစိုးရက  မြန်မာရဲ့ တိုင်းရင်းသားလက်နက်ကိုင် တပ်ဖွဲ့တချို့ကို  ၎င်းတို့နဲ့ ပူးပေါင်းဆောင်ရွက်မှု‌တွေကို လုပ်ဆောင်ဖို့အတွက် အထူးသလည် ဖိအားပေးခဲ့ပါတယ်။ ၂၀၂၃ ခုနှစ်၊ စက်တင်ဘာလမှာဆိုရင် ဝ ပြည်နယ်ကနေ တရုတ်ကို မူလနေရပ်ပြန်ပို့ကာ လက်လွှဲအပ်နှံပေးခဲ့တဲ့ ပြစ်မှုကျူးလွန် သူတွေဟာ ထောင်‌ကျော်ရှိခဲ့ပါတယ်။ တချိန်တည်းမှာပဲ  တရုတ်နိုင်ငံက တရားရုံး နှစ်ရုံးဟာ ဝ ပြည်နယ်က ခေါင်းဆောင်နှစ်ဦးကို  အွန်လိုင်းလိမ်လည်မှုတွေမှာပါဝင်တယ်ဆိုတဲ့ စွဲချက်နဲ့ ပြစ်ဒဏ်ချမှတ်ခဲ့ပါတယ်။ သတင်းတွေကတော့ နေရပ်ပြန်ပို့ခံရတဲ့ ပြစ်မှုကျူးလွန်သူ တွေဟာ ယခုပမာဏထက်ပိုများနိုင်တယ်လို့ ဆိုကြပါတယ်။

 

မြန်မာမှာ ခုလက်ရှိဖြစ်နေကြတဲ့အရေးကိစ္စတွေမှာဆိုရင် တရုတ်ဟာ သူ့အကျိုးစီးပွားကို တိုက်ရိုက် ထိခိုက်နေတဲ့ အကြောင်းအရာတွေအပေါ်မှာသာ အထူးတလည်အာရုံတစိုက်ရှိတယ် ဆိုတာ အထင်အရှားပါပဲ

 

မြန်မာမှာ ခုလက်ရှိဖြစ်နေကြတဲ့အရေးကိစ္စတွေမှာဆိုရင် တရုတ်ဟာ သူ့အကျိုးစီးပွားကို တိုက်ရိုက် ထိခိုက်နေတဲ့ အကြောင်းအရာတွေအပေါ်မှာသာ အထူးတလည်အာရုံတစိုက်ရှိတယ် ဆိုတာ အထင်အရှားပါပဲ။ မြန်မာပြည်သူ တွေနဲ့ မြန်မာ့အရေးကို တရုတ်ပြည်သူ‌အများက သတိမမှုသလို၊ စိတ်ဝင်တစားလည်း မရှိကြပါဘူး။ 

 

 

ယခုလို တရုတ်က မြန်မာအပေါ် အချိုးမညီ၊ တန်းတူမကျတဲ့ အာရုံစိုက်မှုဟာ တရုတ်၊ မြန်မာ နှစ်နိုင်ငံအကြား အပြန်အလှန်ဆက်ဆံရေးနဲ့ အရှေ့တောင်အာရှမှာ တရုတ်ရဲ့လွှမ်းမိုးမှုအနာဂတ်ကို အကဲဖြတ်ကြည့်နိုင်ဖို့အတွက် အကြောင်းခိုင်လုံတဲ့ ထည့်သွင်းသုံးသပ်မှုတွေပါပဲ။

 

 

(East Asia Forum ၏ "China's media misses the mark on Myanmar" ကို ဆီလျှော်အောင် ဘာသာပြန်သည်။)

 

 

ပုံစာ - ၂၀၂၃ ခုနှစ်၊ စက်တင်ဘာ ၆ တွင် ဝ ပြည်နယ်မှ တရုတ်နိုင်ငံသို့ လက်ပြောင်းပေးခဲ့တဲ့ အွန်လိုင်းလိမ်လည်မှုကျူးလွန်သူ တရုတ်နိုင်ငံသား ၁၂၀၇ ဦးကို နယ်စပ်ဖြတ်ကျော်၍ တရုတ် ရဲတပ်ဖွဲ့ဝင်များက ဖမ်းဆီးခေါ်ဆောင်စဉ်

 

ပုံ - Xinhua

 

Burma Associated Press