BAP၊ ဘာသာပြန်။

 

ဟာဆီနာ ထွက်ခွာသွားပြီးနောက် လူထု၏ စိတ်လှုပ်ရှားမှုနှင့် မျှော်လင့်ချက် မြင့်မားနေသည့်အတွက် ကြားဖြတ်အစိုးရက မျှော်လင့်ချက်၏ ဖိစီးမှုမှာ အလွန်ကြီးမားသည်ဟု ဝန်ခံလိုက်သည်။

 

ရှိတ်ဟာဆီနာ ဘင်္ဂလားဒေ့ရှ်နိုင်ငံမှ ထွက်ခွာသွားချိန်တွင် သူမ၏ နိုင်ငံရေးပြိုင်ဘက်များစွာကဲ့သို့ပင် Amir Chowdhury မှာလည်း ထောင်ကျနေခဲ့သည်။

 

အတိုက်အခံ ဘင်္ဂလားဒေ့ရှ်အမျိုးသားပါတီ (BNP) မှ အကြီးတန်းခေါင်းဆောင် Chowhury ကို ယင်းအဖြစ်အပျက်မတိုင်မီ သုံးပတ်အလို ဂျူလိုင်လတွင် ရဲများက ခေါ်ဆောင်သွားခဲ့ခြင်းဖြစ်သည်။ ထိုအချိန်တွင် နိုင်ငံ၌ ကြီးမားကျယ်ပြန့်သော ဆန္ဒဖော်ထုတ်မှုများဖြစ်ပေါ်နေပြီး ၎င်းဆန္ဒပြပွဲများကို အကြမ်းဖက်ဖြိုခွင်းနေကြချိန်ဖြစ်သည်။ လွန်ခဲ့သည့် ၁၅ နှစ် ဟာဆီနာ အာဏာရလာချိန်မှစ၍ Chowdhury ၏ ပါတီကို ဖျက်ဆီးရန် လုပ်ဆောင်မှုများအဖြစ် သုံးကြိမ်မြောက် ထောင်သို့ ဝင်ရခြင်းဖြစ်သည်။

 

ယခုအခါ ဆန္ဒပြပွဲများ စတင်ခဲ့သူတို့မှာ အတိုက်အခံပါတီများမဟုတ်ဘဲ တက္ကသိုလ်ကျောင်းသူ၊ ကျောင်းသားများဖြစ်သည်။ ၎င်းတို့၏ လှုပ်ရှားမှု အရှိန်ရလာပြီး ဟာဆီနာကို လူထုက ဒေါသထွက်လာကြကာ BNP နှင့် အခြားပါတီများပါ အထည်ချုပ်လုပ်သားများ၊ လယ်သမားများ၊ ဥပဒေသမားများ၊ ပညာရှင်များနှင့်အတူ လမ်းပေါ်ရောက်လာကြသည်။

 

ဆန္ဒပြသူများကို ရိုက်နှက်ခြင်း၊ မျက်ရည်ယိုဗုံးများဖြင့် ပစ်ခတ်ခြင်း၊ ရာဘာကျည်များဖြင့် ပစ်ခတ်ခြင်း၊ ကျည်အစစ်များဖြင့် ပစ်ခတ်ခြင်းတို့ဖြင့် နိုင်ငံတော်က တုန့်ပြန်ခဲ့သော်လည်း ဆန္ဒပြမှုများ ပိုမိုတိုးမြင့်လာပြီး ဟာဆီနာ၏ တစ်ဦးတည်း မင်းလုပ်နေမှုကို အဆုံးသတ်ရေးတောင်းဆိုသည့် တော်လှန်ရေးဖြစ်လာသည်။ ထောင်ပေါင်းများစွာ ဖမ်းဆီးခံခဲ့ရပြီး သုံးပတ်အတွင်း လူပေါင်း ၁၀၀၀ ကျော် သေဆုံးခဲ့သည့်အတွက် ဘင်္ဂလားဒေ့ရှ်နိုင်ငံသမိုင်းတွင် သွေးစွန်းမှုအများဆုံး အခန်းကဏ္ဍများအနက် တစ်ခုဖြစ်ခဲ့သည်။

 

ဩဂုတ်လ ၅ ရက်နေ့တွင် Chowdhury က အကျဉ်းခန်းဝန်းကျင်တွင် ပြည့်နှက်နေသော အဖမ်းဆီးခံ ကျောင်းသားများ၊ BNP ပါတီဝင်များ စိတ်လှုပ်ရှားစွာ စကားပြောဆိုနေကြသည်ကို တွေ့ရသည်။ အချို့က ရေဒီယိုများ ခိုးသွင်းလာပြီး သတင်းများ နားထောင်နေကြသည်။ ဟာဆီနာ ဟယ်လီကော်ပတာဖြင့် နိုင်ငံမှ ထွက်ပြေးသွားကြောင်း၊ လူပေါင်း သန်းချီ၍ သူမ၏ အိမ်တော်သို့ ချီတက်သွားကြောင်း သတင်းများတွင် ကြားလိုက်ရသည်။

 

“ကျွန်တော်တို့ သူမ မရှိတော့ဘူးဆိုတာကြားလိုက်ရတဲ့အချိန် ထောင်ထဲမှာ ဗုံးတစ်လုံး ပေါက်ကွဲသွားသလိုပဲ” ဟု Chowdhury က ပြောသည်။ နောက်တစ်ရက် မနက်ပိုင်းတွင် Chowdhury နှင့် အခြားအကျဉ်းသား အများအပြား လွတ်မြောက်လာခဲ့သည်။

 

ကျွန်တော်တို့ သူမ မရှိတော့ဘူးဆိုတာကြားလိုက်ရတဲ့အချိန် ထောင်ထဲမှာ ဗုံးတစ်လုံး ပေါက်ကွဲသွားသလိုပဲ

 

ဟာဆီနာ၏ အုပ်ချုပ်မှု ပြိုကျပြီး တစ်လအကြာ ယခုအချိန်တွင် ဘင်္ဂလားဒေ့ရှ်သည် လမ်းဆုံတစ်ခုသို့ ရောက်ရှိနေပြီဖြစ်သည်။ အောင်ပွဲရ ကျောင်းသား၊ ကျောင်းသူခေါင်းဆောင်များ၏ တောင်းဆိုမှုအရ ဟာဆီနာ၏ ယခင် နိုင်ငံရေးပြိုင်ဘက်၊ နိုဘယ်ဆုရှင် မိုဟာမက် ယူနွတ်က အမေရိကန်ပြည်ထောင်စုမှ ပြန်လာပြီး ဒီမိုကရေစီ ပြန်လည်တည်ဆောက်ရေး ကြားဖြတ်အစိုးရကို ဦးဆောင်ရန် သဘောတူခဲ့သည်။ ယူနွတ်ခန့်အပ်လိုက်သော အကြံပေးများမှာ ဟာဆီနာ၏ နိုင်ငံတော်ရန်သူများဖြစ်ကြကာ ထင်ရှားသော NGO ခေါင်းဆောင်များ၊ ဥပဒေသမားများ၊ ဂျာနယ်လစ်များ၊ တက်ကြွလှုပ်ရှားသူများနှင့် ကျောင်းသူ၊ ကျောင်းသားများပါဝင်ကြသည်။

 

နိုင်ငံ၏ မြို့တော် ဒါကာတွင် မျှော်လင့်ချက်ကြီးမားသော အကောင်းမြင်မှုက ရှိနေဆဲဖြစ်သည်။ လူထုက နေ့ချင်းညချင်း လွတ်လပ်စွာ ပြောဆိုခွင့်ရလာခြင်း၊ နိုင်ငံရေးဆွေးနွေးရာတွင် ကြောက်လန့်တကြား စိုးရွံ့ရန် မလိုတော့ခြင်းကြောင်း "ဘင်္ဂလားဒေ့ရှ်၏ ဒုတိယအကြိမ်မြောက် လွတ်လပ်ရေး” အဖြစ် ဝမ်းသာအားရ ပြောဆိုကြသည်။

 

ဒါကာမြို့ ဟိုတယ်တစ်ခု၏ ဧည့်ခန်းအတွင်း ထိုင်နေသော လူသိများထင်ရှားသည့် လူ့အခွင့်အရေးတက်ကြွလှုပ်ရှားသူ Nur Khan Lilton က ပြန်ပြောင်းပြောသည်မှာ လွန်ခဲ့သည့် ရက်သတ္တပတ်အနည်းငယ်က ၎င်းသည် ရဲတပ်ဖွဲ့၏ ဆက်တိုက်စောင့်ကြည့်မှုအောက်တွင် နေခဲ့ရကြောင်း၊ အများရှေ့တွင် လွတ်လပ်စွာ အစည်းအဝေးလုပ်နိုင်လိမ့်မည်ဟု မထင်မြင်ခဲ့ကြောင်း ပြောသည်။ ရာဇဝတ်မှု ရာပေါင်းများစွာဖြင့် စွပ်စွဲဖိနှိပ်ခံခဲ့ရသော BNP ခေါင်းဆောင်များမှာ တရားရုံးနှင့် အကျဉ်းခန်းများတွင် ၎င်းတို့၏ အချိန်များ ကုန်ဆုံးရန် မလိုအပ်တော့သည့်အတွက် ကျေနပ်နေကြသည်။

 

နိုင်ငံ ပုံမှန်ပြန်ဖြစ်ရန် လိုအပ်နေသေးပြီး လုံခြုံမှုမရှိသည့် အခြေအနေတွင်ပင် ရှိနေသေးသည်။ ပြီးခဲ့သည့်လတွင် ကြီးမားကျယ်ပြန့်သော ဆန္ဒပြပွဲများကြောင့် စက်ရုံရာပေါင်းများစွာ ပိတ်ထားရပြီး အကျိုးအမြတ်များသည့် အထည်ချုပ်လုပ်ငန်းမှာ စီးပွားရေးအရ ထိခိုက်ရပ်တန့်သွားသည်။

 

ဟာဆီနာအစိုးရ၏ အသုံးချခံ၊ အရပ်သားများကို ထိတ်လန့်ကြောက်ရွံ့စေခဲ့ပြီး အလွဲသုံးစားဖိနှိပ်မှုများ ပြုလုပ်ခဲ့သည့် ရဲတပ်ဖွဲ့သည် အရပ်သားများ တိုက်ခိုက်လာမည်ကို ကြောက်ရွံ့သည့်အတွက် လမ်းများပေါ်တွင် မမြင်တွေ့ရပေ။ ရဲစခန်းအများအပြား မီးရှို့ခံခဲ့ရသည်။ အရပ်သားများက အခင်းဖြစ်ပွားခြင်း၊ တရားမမျှတမှုများကို ဖြေရှင်းရန် ရဲတပ်ဖွဲ့သို့ မသွားရောက်တော့ပဲ ကျောင်းသူ၊ ကျောင်းသားအဖွဲ့များကို ခေါ်ယူမှုများ အများအပြား ဖြစ်ပေါ်ခဲ့သည်။

 

ယခုအပတ်တွင် ဥပဒေနှင့် အမိန့်အာဏာစိုးမိုးရေးအတွက် ရဲတပ်ဖွဲ့တာဝန်များ ထမ်းဆောင်ရန် စစ်တပ် အထူးအာဏာ ခွင့်ပြုမှု ကြားဖြတ်အစိုးရက ပေးအပ်ခဲ့သည်။ ၎င်းလုပ်ပိုင်ခွင့်တွင် ဖမ်းဆီးမှုများ ဝရမ်းထုတ် ရှာဖွေမှုများလည်း ပါဝင်သည်။ အစိုးရက ၎င်းခွင့်ပြုမှုသည် ယာယီသာဖြစ်သည်ဟု အခိုင်အမာဆိုသော်လည်း နှစ်လ ကြာလာသောအခါ စိုးရိမ်ဖွယ်အဖြစ် မြင်လာကြသည်။

 

လေ့လာအကဲဖြတ်သူများက ယူနွတ်နှင့် ၎င်း၏ အကြံပေးများ ကတိပြုထားသည့် ရည်မှန်းချက်ကြီးမားသော ဒီမိုကရေစီပြုပြင်ပြောင်းလဲမှု အစီအစဉ်များသည် ရှုပ်ထွေးသည်ဟု ဆိုကြသည်။ ၎င်းအစီအစဉ်များတွင် အဓိက အဖွဲ့အစည်းများကို အစမှ အသစ်တဖန် ပြန်လည်တည်ဆောက်ရန် ပါဝင်ပြီး အကောင်အထည်ဖော်ရန် နှစ်များစွာ ကြာမြင့်ဖွယ်ရှိသည်။ ယခုအခါ ယူနွတ်၏ ညာလက်ရုံးဖြစ်လာသောတော်လှန်ရေး၏ ရှေ့တန်းမှ ကျောင်းသူ၊ ကျောင်းသားများအတွက် ရဲတပ်ဖွဲ့မှသည် တရားစီရင်ရေး၊ ဘဏ်များနှင့် ရွေးကောက်ပွဲစနစ်အထိ အာဏာရှင်စနစ် မည်သည့်အခါမျှ ပြန်လည် အသက်ဝင်မလာစေရန် အလုံးစုံ ပြုပြင်ပြောင်းလဲရေး လုပ်ဆောင်ရမည်ဖြစ်သည်။ ဟာဆီနာပြင်ဆင်ခဲ့သည့် ဖွဲ့စည်းပုံအခြေခံဥပဒေကို ပြောင်းလဲရန်လိုအပ်ကြောင်း ပြောဆိုသူအများအပြားလည်း ရှိသည်။

 

“ဒါက ကြီးမားပြီး ရှုပ်ထွေးတဲ့ လုပ်ငန်းစဉ် တစ်ခုပါ” ဟု ဒါကာ တက္ကသိုလ်တွင် ဥပဒေသင်ယူနေသော ဆန္ဒပြပွဲ ညှိနှိုင်းဆောင်ရွက်ရေးမှူး Rezwan Ahmed Refat က ပြောသည်။ "အဓိကစိန်ခေါ်မှုကတော့ ဟာဆီနာထည့်သွင်းသွားခဲ့တဲ့ ဖက်ဆစ်စနစ်တွေက အများကြီး ကျန်နေသေးတယ်။ အစိုးရအတွင်းဝန်၊ ရဲတပ်ဖွဲ့၊ တရားစီရင်ရေးတွေ ပြုပြင်ပြောင်းလဲရေးလုပ်ဖို့က ခရီးရှည်ကြီး တစ်ခုပါ။ ဒီအဖွဲ့အစည်းတွေ သီခြားလွတ်လပ်မှု မရှိမချင်း ဘာမှ ပြောင်းလဲမှာ မဟုတ်ဘူး”

 

“ပြုပြင်ပြောင်းလဲရေး အချိန်ယူရမည်”

 

ယူနွတ်သည် လမ်းများပေါ် နေရာယူခဲ့သည့် လူသန်းပေါင်းများစွာက ပေးအပ်ထားသော အားကောင်းသည့် လုပ်ပိုင်ခွင့်အပ်နှင်းခံရမှုရှိနေပြီး အစိုးရက လျင်မြန်စွာ မလုပ်ဆောင်နိုင်လျှင်၊ ၎င်းတို့၏ ပြုပြင်ပြောင်းလဲမှု အစီအစဉ် မကြာခင် ရှင်းလင်းစွာ မဖော်ထုတ်နိုင်လျှင် ကျောင်းသားများက နောက်တစ်ကြိမ် ဆန္ဒပြရန် တွန့်ဆုတ်နေမည်မဟုတ်ဟု Refat က ဆိုသည်။

 

ထင်ရှားကျော်ကြားသူအများအပြားက ကြားဖြတ်အစိုးရ "လမ်းပျောက်” နေပုံရပြီး အလွန်အကျွံ တာဝန်ယူရန် ကြိုးပမ်းနေသည်ဟု တစ်သီးပုဂ္ဂလ ပြောကြားကြသည်။ အချို့က အများသိရန် ပြောကြားလိုသော်လည်း ယူနွတ်ကို ထိခိုက်အောင် မပြုလိုကြပေ။

 

ယူနွတ်သည် လမ်းများပေါ် နေရာယူခဲ့သည့် လူသန်းပေါင်းများစွာက ပေးအပ်ထားသော အားကောင်းသည့် လုပ်ပိုင်ခွင့်အပ်နှင်းခံရမှုရှိနေပြီး အစိုးရက လျင်မြန်စွာ မလုပ်ဆောင်နိုင်လျှင်၊ ၎င်းတို့၏ ပြုပြင်ပြောင်းလဲမှု အစီအစဉ် မကြာခင် ရှင်းလင်းစွာ မဖော်ထုတ်နိုင်လျှင် ကျောင်းသားများက နောက်တစ်ကြိမ် ဆန္ဒပြရန် တွန့်ဆုတ်နေမည်မဟုတ်

 

ဟာဆီနာထွက်ခွာမှုနောက်ပိုင်း လူထု၏ မျှော်လင့်ချက်ကြီးမားမှုကို အစိုးရက မျှော်လင့်ချက်၏ ဖိစီးမှု အလွန်ကြီးမားကြောင်း၊ ပြုပြင်ပြောင်းလဲရေး လမ်းကြောင်းမှာ စိန်ခေါ်မှုများ ပြည့်နှက်နေကြောင်း၊ အထူးသဖြင့် ဟာဆီနာက တိုင်းပြည်ကို နက်ရှိုင်းသော စီးပွားရေးအကျပ်အတည်းဖြင့် ချန်ထားခဲ့ခြင်းကြောင့်ဖြစ်ကြောင်း ဝန်ခံခဲ့သည်။ အစိုးရအကြံပေးများအဆိုအရ ဟာဆီနာ၏ "ခရိုနီများ” သည် ၂၀၁၄ ခုနှစ်ကပင် စတင်၍ ဘင်္ဂလားဒေ့ရှ်ပြင်ပသို့ အမေရိကန်ဒေါ်လာ ဘီလီယံပေါင်း ဆယ်ချီ၍ တရားမဝင် ခဝါချမှုများ လုပ်ခဲ့ကြောင်း၊ အကျင့်ပျက်ခြစားမှုနှင့် ဆုံးရှုံးမှုပမာဏမှာ ယခုမှ စတင် မြင်သာလာရုံမျှသာ ရှိသေးသည်ဟု ဆိုသည်။

 

အသစ်ခန့်အပ်ခံရသည့် နိုင်ငံခြားရေးရာ အကြံပေး Touhid Hossain က စိတ်ရှည်သည်းခံရန် တောင်းဆိုထားပြီး ကြားဖြတ်အစိုးရက ဆိုလိုသည့် ပြုပြင်ပြောင်းလဲရေးဆိုသည်မှာ "အပြီးသတ်ရေးဆွဲရန် ကျန်နေသေးကြောင်း”၊ "လာမည့်လအနည်းငယ်အတွင်း ရှင်းလင်းပြတ်သား” လာနိုင်ကြောင်း ပြောသည်။

 

အစိုးရသစ်မှ အခြားသူများနည်းတူ Hossain က အလေးပေးပြောသည်မှာ လူငယ်များ အသက်စတေးခဲ့ရသည့် အသွင်သစ် ဘင်္ဂလားဒေ့ရှ်တည်ဆောက်အကောင်အထည်ဖော်ရေးအတွက် တာဝန်ယူထားခြင်းသာဖြစ်သည်ဟု ဆိုသည်။ ယူနွတ်မှာ အသက် ၈၄ နှစ် ရှိပြီဖြစ်သည်။

 

“ကျွန်တော်တို့ အလုပ်ပြီးတာနဲ့ ရွေးကောက်ပွဲ ကျင်းပပေးမှာ ဖြစ်ပါတယ်။” ဟု Hossain က ပြောသည်။ "နိုင်ငံရေးသမားတွေ ဝင်လာမယ်၊ နိုင်ငံကို လည်ပတ်မယ်၊ ကျွန်တော်တို့ မှေးမှိန်ပျောက်ကွယ်သွားမှာပါ။ အနာဂတ်အစိုးရမှာ ကျွန်တော်တို့ တစ်ယောက်မှ ရာထူးတစ်နေရာယူဖို့ ရည်ရွယ် ချက်မရှိပါဘူး။”

 

သို့ဆိုစေကာမူ အကြီးမားဆုံး မေးခွန်တစ်ခုမှာ သူတို့မည်သည့်အချိန်ထိ အာဏာယူထားမည်နည်းဆိုသည့် မေးခွန်းဖြစ်သည်။ ကနဦးတွင် လအနည်းငယ်သာကြာမည်ဟု ဆိုခဲ့သော်လည်း ယခုအခါ လူအများက တိုင်းပြည်၏ အဓိက အဖွဲ့အစည်းများကို အလုံးစုံပြုပြင်ပြောင်းလဲရန် ၎င်းတို့ကို ပေးရမည့်အချိန်မှာ ငါးနှစ်၊ ခြောက်နှစ်အထိ ကြာမြင့်နိုင်သည်ဟု ယုံကြည်နေကြသည်။ အစိုးရက တာဝန်ပေးသည့်အတွက် တက်ကြွလှုပ်ရှားသူများက တိတ်တဆိတ် ပျောက်ဆုံးမှုများကဲ့သို့သော အရေးကိစ္စများကို စုံစမ်းစစ်ဆေးရာတွင် ကနဦး စုံစမ်းစစ်ဆေးမှုများကပင် အနည်းဆုံး ၁၈ လမျှ ကြာမြင့်နိုင်သည်ဟု ဆိုသည်။

 

“ကျွန်တော်ကတော့ အချိန်သတ်မှတ်မှုကို မှန်းဆကြည့်မှာ မဟုတ်ပါဘူး။ ဒါပေမယ့် ဒါက လာမယ့် သုံးလ၊ ခြောက်လအတွင်း ပြီးသွားမယ့် ကိစ္စလို့ မထင်မိဘူး။ ဒီပြုပြင်ပြောင်းလဲရေးက အချိန်ယူလိမ့်မယ်။” ဟု Hossain က ပြောသည်။

 

ယခုအခါ BNP အပါအဝင် နိုင်ငံရေးပါတီများက နောက်ဆုတ်နေပြီး ကြားဖြတ်အစိုးရကို ၎င်းတို့၏ ထောက်ပံ့ကူညီမှုဖြင့် ပြုပြင်ပြောင်းလဲရေး အကောင်အထည်ဖော်ခွင့်ပေးထားရန် သဘောတူခဲ့ကြသည်။ ယူနွတ်၏ အမေရိကန်ပြည်ထောင်စုနှင့် အခြားသော အနောက်နိုင်ငံများနှင့် အားကောင်းသော ဆက်သွယ်ချိတ်ဆက်မှုက နိုင်ငံအတွက် အလွန်လိုအပ်နေသော နိုင်ငံခြား စီးပွားရေးအထောက်အပံ့များ ဝင်ရောက်လာစေရန် အားပေးမည်ဟု မျှော်လင့်နေကြသည်။

 

“ဒီ အသွင်ကူးပြောင်းမှု အစိုးရသာ မအောင်မြင်ခဲ့ရင် အစိုးရကိုပဲ ပျက်စီးစေမှာ မဟုတ်ဘူး။ ဘင်္ဂလားဒေ့ရှ်ကိုပါ ပျက်စီးစေလိမ့်မယ်။” ဟု BNP အကြီးတန်း ခေါင်းဆောင်တစ်ဦးဖြစ်သူ Abdul Moyeen Khan က ပြောသည်။

 

BNP သည် ရွေးကောက်ခံမဟုတ်သည့် ကြားဖြတ်အစိုးရ နှစ်များစွာ တည်ရှိနေမည့်အရေးကို ဆန့်ကျင်သည်။ ဟာဆီနာ၏ Awami League ပါတီ ပြိုလဲသွားပြီးနောက် ၎င်းပါတီခေါင်းဆောင်အများစု ပုန်းကွယ်နေခြင်း၊ နိုင်ငံခြားသို့ ထွက်သွားခြင်းတို့ကြောင့် BNP က မည်သည့်ရွေးကောက်ပွဲကိုမဆို အလွယ်တကူ အောင်နိုင်မည်ဖြစ်သည်ဟု ကျယ်ပြန့်စွာ အသိအမှတ်ပြုထားကြသည်။ လေ့လာအကဲဖြတ်သူများက ယခုအပတ်တွင် ပထမဆုံး ဆန္ဒပြပွဲဖြစ်ပေါ်လာပြီးနောက် BNP ၏ အာဏာပြန်လည် ရရှိရေး စိတ်မရှည်မှုက မတည်ငြိမ်မှုများဖြစ်ပေါ်စေနိုင်သည်ဟု ဆိုကြသည်။ ဆက်လက်ဖြစ်ပေါ်နေသော နိုင်ငံရေး လေဟာနယ်က ဘင်္ဂလားဒေ့ရှ်တွင် ရှိနှင့်ပြီးဖြစ်သော ပို၍ အစွန်းရောက်သည့် အစ္စလမ် လှုပ်ရှားမှုများ ထွက်ပေါ်လာစေပြီး အားကောင်းလာစေနိုင်သည်ဟု အခြားသော အကဲဖြတ်များက သတိပေးသည်။

 

လမ်းများပေါ်တွင်မူ အများစုက အနာဂတ်အတွက် မျှော်လင့်နေကြဆဲဖြစ်သည်။ ရဲတပ်ဖွဲ့၏ ပစ်ခတ်မှုကြောင့် မျက်စိ တဝက်တပျက် ကွယ်ခဲ့ရပြီး ထောင်ထဲတွင် ရက်သတ္တပတ် များစွာ ဆေးကုသမှုမရရှိဘဲ ထိန်းသိမ်းခံခဲ့ရသူ လူပေါင်း ၄၀၀ ခန့်တွင် အပါအဝင်ဖြစ်သည့် အသက် ၃၅ နှစ် အရွယ် Gazi Jakaria က "ဟာဆီနာကို ဖြုတ်ချဖို့ ဒီလို စွန့်လွှတ်စတေးခံခဲ့ရတာကို နောင်တ မရပါဘူး။” ဟု ပြောသည်။ "အပြောင်းအလဲကို တိုက်ယူဖို့ လမ်းပေါ်ကို ကျွန်တော်တို့ ထွက်ခဲ့တယ်။ ယူနွတ်အစိုးရကလည်း ပြောင်းလဲဖို့ လုပ်နေတဲ့အတွက် ကျွန်တော် ဝမ်းသာပါတယ်။ ကျွန်တော်တို့ အရာအားလုံးကိုတော့ နေ့ချင်းညချင်း ပြုပြင်နိုင်မှာ မဟုတ်ပါဘူး။”

 

ကိုးကား - The Guardian

 

ပုံစာ - ဘင်္ဂလားဒေ့ရှ် ဝန်ကြီးချုပ်ဟောင်း ရှိတ်ဟာဆီနာကို ဖြုတ်ချမှု တစ်လပြည့်အထိမ်းအမှတ် အာဇာနည်ချီတက်မှုအတွင်း ဆန္ဒဖော်ထုတ်သူများက ဘင်္ဂလားဒေ့ရှ်နိုင်ငံအလံကို ကိုင်ဆောင်ထားကြစဉ်။ Photograph: Munir Uz Zaman/AFP/Getty Images