က​လော၊ မတ် ၁၈။

 

ရှမ်းပြည်နယ်တောင်ပိုင်း၊ ကလောမြို့မှာ စစ်​ကောင်စီထံ စစ်မူထမ်းဖို့ လူရွေးချယ်ရာမှာ အချို့ရပ်ကွက်တွေက စစ်မူထမ်းမယ့်သူရှိနေလို့ မဲနိုက်စရာမလိုတဲ့ရပ်ကွက်တွေ ရှိနေတယ်လို့ မြို့ခံတွေဆီကသိရပါတယ်။

 

"ရပ်ကွက် ၄၊ ၅၊ ၇ ရက်ကွက်တွေက စစ်မူထမ်းမယ့်သူရှိလို့မဲနိုက်စရာမလိုဘူး" လို့ ရပ်မိရပ်ဖအချို့က​ပြောပါတယ်။

 

တရပ်ကွက် တစ်​ယောက်နှုန်း​ရွေးရာမှာ အမှတ် ၁၀ ရပ်ကွက်မှာ​တော့ စစ်မူထမ်းချင်သူမရှိလို့ မဲနိုက်ဖို့လုပ်တဲ့အခါ ကန့်ကွက်လို့ ရက်ရွှေ့လိုက်ရတယ်လို့ ဆိုပါတယ်။

 

" ၁၀ ရပ်ကွက် အုပ်ကြီးက ​ကြောက်လို့ မဲမလုပ်ရဲဘူး။ အဲဒါကြောင့် ရပ်ကွက်ထဲ စစ်မူထမ်းမယ့်သူအရင်ရှာခိုင်းပြီးရက်ရွှေ့လိုက်ရတယ်" လို့ ရပ်မိရပ်ဖ တစ်ဦးက ​ပြောပါတယ်။

 

လူဦးရေစာရင်းအရ အသက်၂၄ နှစ်ကနေ ၃၀ နှစ်အတွင်း လူစာရင်းကို ရွေးချယ်ထားပြီး ဒီနေ့ မတ်လ ၁၈ ရက်မှာ မဲ စတင်နိုက်နေကြတယ်လို့ ကလောမြို့ခံ ရပ်မိရပ်ဖ​တွေက ပြောပါ။

 

"အချို့ရပ်ကွက်က ဆိုးလို့ဆိုပြီး မိဘကိုယ်တိုင်လာအပ်တာမျိုး၊ တချို့က အလုပ်မရှိသူလူပိုတွေ သေမထူးနေမထူးသူတွေက သူတို့အရင်စစ်မူထမ်းဖို့ စာရင်းပေးကြတော့ မဲနိုက်စရာမလိုတဲ့ ရပ်ကွက်တွေရှိနေတယ်"လို့ က​လောမြို့ခံတဦးက ပြောပါတယ်။

 

ကလောမြို့မှာ စစ်မူထမ်းဖို့ဒီကနေ့ မဲစတင်နိုက်နေကြပြီး အိမ်ထောင်သည်တွေစာရင်းထဲ မပါသေးဘဲ ၃ လ တခါ မဲနိုက်တဲ့စနှစ်နဲ့ ရွေးချယ်ဖို့ ကနဦးစီစဥ်ထားတယ်လို့ စစ်မူထမ်းမဲနိုက်ရွေးရာမှာ ပါဝင်တဲ့ ရပ်မိရပ်ဖတဦးက ပြောပါတယ်။

 

"ကြောက်တဲ့သူကကြောက်​ပေမဲ့ မပြေးနိုင်ကြတဲ့သူတွေကြတော့ မဲလာနိုက်ကြတယ်၊ လူငယ်အတော် များများနိုင်ငံခြားရောက်နေကြပြီ ဆိုတော့ လက်ရှိအချိန် မြို့မှာကျန်နေသူတွေပဲ ပထမအကြိမ်အတွက် မဲနိုက်ကြတယ်၊ တရပ်ကွက်နှစ်​ယောက်ဆိုတော့ အချို့ရပ်ကွက်က လူရထားရင်နိုက်စရာမလိုတော့ ဘူး"လို့ သူက ပြောပါတယ်။

 

တောင်ကြီးမြို့က ရပ်ကွက်အချို့မှာလည်း စစ်မှုထမ်းစာရင်းကောက်ဖို့ မတ်လ ၁၅ ရက်က စပြီး ရပ်ကွက်ရုံးမှာ အစည်းအဝေးစတင်လုပ်ဆောင်နေတယ်လို့ မြို့ခံအချို့ဆီက သိရပါတယ်။

 

ပြည်သူ့စစ်မှုထမ်းဥပဒေအရ မြန်မာနိုင်ငံမှာ စစ်မှုထမ်းဖို့ အသက်ကန့်သတ်ချက်အရ အကျုံးဝင်နေသူ ၁၄ သန်းဝန်းကျင် (အမျိုးသား ၆ ဒသမ ၃ သန်းနဲ့ အမျိုးသမီး ၇ ဒသမ ၇ သန်း) ရှိတယ်လို့ စစ်ကောင်စီက ထုတ်ပြန်ထားပါတယ်။

 

ဒီတပတ်အတွင်း မြန်မာနိုင်ငံက မြို့နယ်တွေမှာ စစ်မူထမ်းဖို့ မဲနိုက်ရွေးချယ်နေတာကြောင့် မဲပေါက်မှာကို မိသားစုဝင်တွေက စိုးရိမ်သောက ရောက်နေကြတာကို ကြုံ​နေရပါတယ်။

 

Burma Associated Press