မတ်လ ၁၅

နွေဦးတော်လှန်ရေးကိုအနုပညာဖြင့် ပံ့ပိုးပေးနိုင်ရန်အနုပညာကိုစိတ်ဝင်စားသည့် CDM ကျောင်းသူ/သားများနှင့် တော်လှန်ရေးသမားများအတွက် နွေဦးရုပ်ရှင်အကယ်ဒမီကျောင်းကို ဖွင့်လှစ်ထား‌ကြောင်း Spring Film Academy ကဆိုသည်။

 

နွေဦးရုပ်ရှင်အကယ်ဒမီသည် အမျိုးသားညီညွတ်ရေးအစိုးရ၊ ပညာရေးဝန်ကြီးဌာန၊ မြန်မာစာဘုတ်အဖွဲ့နှင့် Myanmar Citizen Journalist Network မှ ပူးပေါင်းကာ နွေဦးရုပ်ရှင်ကျောင်း (Spring Film Academy) ကို ကြားကာလ ပညာရေးအထောက်အကူဖြစ်စေရန် ရည်ရွယ်ကာ ဖွင့်လှစ်ထားသည့် သင်တန်းကျောင်းတစ်ခု ဖြစ်သည်ဟု ယင်းကဆိုသည်။

 

"ဒီကျောင်းဟာ CDM ကျောင်းသူ/သားတွေနဲ့ တော်လှန်ရေးသမားတွေအတွက် ပညာသင်ယူခွင့်နဲ့ အသိပညာ သစ်များ ဆက်လက်ဆည်းပူးခွင့်ကို ထောက်ပံ့ပေးဖို့ဖြစ်ပါတယ်။ ဒီကျောင်းကနေ နိုင်ငံတကာ ရုပ်ရှင် ကျောင်းများနဲ့ ဆက်လက်ပေါင်းကူးနိုင်အောင်ချိတ်ဆက်ဖို့ရာ ကြိုးပမ်းနေပါတယ်" ဟု Spring Film Academy မှဆိုသည်။

 

အဆိုပါကျောင်းတွင် အနုပညာနှင့်ပတ်သက်သည့် ဘာသာရပ် ၁၂ ခုတိတိ သင်ကြား‌ပေးသွားမှာဖြစ်ပြီး၊ ရုပ်ရှင်ပညာဒီပလိုမာအဆင့်အထိ သင်ကြားပေးအပ်သွားနိုင်ရန် ရည်ရွယ်ထားကာ အနိမ့်ဆုံး ပညာအရည် အချင်း တက္ကသိုလ်ဝင်တန်းအောင်မြင်မှသာ လျှောက်ထားနိုင်မည်ဖြစ်ကြောင်းသိရသည်။

 

ဘာသာရပ်များကို အခမဲ့သင်ကြားပေးမည်ဖြစ်သည့်အပြင်၊ ဘာသာတစ်ခုသင်ကြားအောင်မြင်ပြီးတိုင်း အသိအမှတ်ပြု လက်မှတ် ချီးမြှင့်ပေးမည်ဖြစ်‌ကြောင်း၊ ဘာသာရပ် ၁၂ ခုလုံး သင်ကြားအောင်မြင်ပြီးမှသာ အမျိုးသားညီညွတ်ရေးအစိုးရ၊ ပညာရေးဝန်ကြီးဌာနမှ အသိမှတ်ပြုသော Diploma Course in Film Making သင်တန်းပြီးမြောက်ကြောင်းလက်မှတ်ကို ချီးမြှင့်ပေးသွားမည်ဖြစ်ကြောင်း ထုတ်ပြန်ချက်က ဆိုသည်။

 

အဆိုပါဘာသာရပ်တစ်ခုစီ၏သင်ကြားချိန်မှာ ၃လတာကြာမြှင့်မည်ဖြစ်ကာ၊ သင်တန်းပို့ချရာတွင် ZOOM ဖြင့် တိုက်ရိုက်သင်ကြားပို့ချပေးမည် ဖြစ်သည်။

 

အဆိုပါသင်တန်းများကို စိတ်ဝင်စား တက်ရောက်လိုသူများအနေဖြင့် https://forms.gle/YVcuDXhoDnkc4nyMA တွင် စာရင်းပေးသွင်းနိုင်ကာ၊ တက်ရောက်ရမည့်နေ့ရက်နှင့်အချိန်ကို မေးလ်မှတဆင့် ပြန်လည်ပေးပို့သွားမည်ဖြစ်ကြောင်းထုတ်ပြန်ထားသည်။

Burma Associated Press