BAP၊ ဘာသာပြန်။

 

“ကျွန်မ ရင်ဘတ် အကုန်ပေါ်တယ်။ အရှက်ရသလို ခံစားရတယ်။” ဟု ဂျပန်မိန်းကလေးငယ်တစ်ဦးက သူမ၏ အလယ်တန်းကျောင်းတွင် နှစ်ပတ်လည်ကျန်းမာရေး စစ်ဆေးမှုခံရပြီးနောက် ရေးသားခဲ့သည်။

 

 

အခြားတစ်ဦးက "စစ်ဆေးမှုမတိုင်ခင်မှာ ကျွန်မတို့ရဲ့ ဆရာ/ဆရာမက ကျွန်မတို့ရဲ့ အပေါ်ဝတ်နဲ့ ဘရာကို လှန်ပြရမယ်လို့ ပြောတယ်။ ကျွန်မ မလုပ်ချင်ဘူး။ ဒါပေမယ့် ငြင်းလို့မရခဲ့ဘူး။” ဟု ဆိုသည်။

 

 

ဂျပန်နိုင်ငံရှိ ကျောင်းများတွင် ကျောင်းတက်ရသော ကလေးသူငယ်များသည် စိတ်မသက်သာရာရမှုများ ပုံမှန်လို ခံစားရပြီး အချို့ဖြစ်စဉ်များတွင် စိတ်ဒဏ်ရာများ ခံစားရလေ့ရှိသည်ဟု The Guardian မှ တွေ့မြင်ခဲ့ရသော အသက် ၁၃ နှစ်အရွယ် ကလေးသူငယ်နှစ်ဦးထံမှ သက်သေခံထွက်ဆိုချက်အရ သိရသည်။ ဂျပန်နိုင်ငံမှ ကျောင်းများတွင် အသက် ၅ နှစ်မှ ၁၈ နှစ်အထိ ယောက်ျားလေးများနှင့် မိန်းကလေးများသည် ကျန်းမာရေးစစ်ဆေးမှုများပြုလုပ်စဉ် ရှပ်အင်္ကျီ ချွတ်ပြရသည်။

 

 

မိဘများနှင့် စည်းရုံးလှုံ့ဆော်သူများအကြား ဒေါသထွက်စိတ်ဆိုးမှုများ ဖြစ်ပေါ်လာပြီး ပညာရေးနှင့် ကျန်းမာရေးအာဏာပိုင်များကို ဧပြီလတွင် စတင်မည့် ပညာသင်နှစ်သစ်တွင် ၎င်းကဲ့သို့ ပြုမူစစ်ဆေးခြင်း ရပ်တန့်ရန် တောင်းဆိုခဲ့ကြသည်။

 

 

Matsuyama မှ မြို့တော် ကောင်စီဝင်တစ်ဦးဖြစ်သူ Noriko Babuchi က သူမ၏ အင်္ဂလိပ်စကားပြောသင်တန်း ကျောင်းသူ၊ ကျောင်းသားများမှတဆင့် အပေါ်ပိုင်းဗလာ ကျန်းမာရေးစစ်ဆေးမှုကို ပထမဆုံး သိရှိခဲ့သည်။ "သူမက ၁၃ နှစ်ပါ။ သူ့မိဘတွေကို မပြောနိုင်ခဲ့ဘူး။ ဒါပေမယ့် သူအဆင်မပြေဘူးဆိုတာ ကျွန်မ မြင်နေရတော့ ဘာအဆင်မပြေတာရှိလဲလို့ သူ့ကို မေးခဲ့တယ်။” ဟု Tabuchi က ပြောသည်။ သူမသည် လာရောက်စစ်ဆေးသည့် ဆရာဝန်များကို အင်္ကျီချွတ်ပြခိုင်းခံရသည့် အသက် ၁၂ နှစ်နှင့် ၁၃ နှစ်အရွယ် အခြားမိန်းကလေးများကိုလည်း တွေ့ဆုံခဲ့သည်။

 

အလယ်တန်းကျောင်းသား၊ ကျောင်းသူများကို ဆန္ဒမဲကောက်ယူမှုတစ်ခုတွင် အသက် ၁၂ နှစ်မှ ၁၆ နှစ်အကြား ဖြေဆိုသူ ၉၅.၅% က ၎င်းတို့၏ အဝတ်အစားများ ချွတ်ပြရသည်ကို မကြိုက်နှစ်သက်ကြောင်း ဖြေဆိုခဲ့ကြသည်

 

စစ်ဆေးစဉ်အတွင်း အဝတ်အစားချွတ်ရန်၊ သို့မဟုတ် ချွတ်ရန်မလိုဟု တညီတညွတ်တည်း ဆုံးဖြတ်ထားသော မူဝါဒမရှိပေ။ ဒေသခံပညာရေးဘုတ်အဖွဲ့နှင့် လာရောက်စစ်ဆေးသည့် ကျန်းမာရေးကျွမ်းကျင်သူတို့က ပူးပေါင်းဆုံးဖြတ်ရန် ခွင့်ပြုထားသည်။ အချို့ကျောင်းများတွင် ကလေးသူငယ်များ၏ ခန္ဓာကိုယ်ကို ဖုံးအုပ်ထားစေသည်။ အချို့ကျောင်းများကမူ ၎င်းတို့၏ တီရှပ်များကို ချွတ်ခိုင်းပြီး မိန်းကလေးငယ်များကို ဘရာချွတ်ခိုင်းသည်။ ဂျပန်နိုင်ငံအနောက်ပိုင်းမြို့တစ်ခုမှ အထက်တန်းကျောင်းများတွင် အသက်အကြီးဆုံး ကျောင်းသား၊ ကျောင်းသူများမှာ ၁၈ နှစ်အရွယ်ရှိပြီး စစ်ဆေးစဉ်အတွင်း အပေါ်ပိုင်းချွတ်ပြရန် လိုအပ်သည်။

 

စစ်တမ်းများအရ ဆရာ၊ ဆရာမအများစုက ၎င်းလိုအပ်ချက်ကို ရပ်တန့်လိုကြသည်။ အလယ်တန်းကျောင်းသား၊ ကျောင်းသူများကို ဆန္ဒမဲကောက်ယူမှုတစ်ခုတွင် အသက် ၁၂ နှစ်မှ ၁၆ နှစ်အကြား ဖြေဆိုသူ ၉၅.၅% က ၎င်းတို့၏ အဝတ်အစားများ ချွတ်ပြရသည်ကို မကြိုက်နှစ်သက်ကြောင်း ဖြေဆိုခဲ့ကြသည်။

 

"ကျန်းမာရေးစစ်ဆေးမှုတွေကြောင့် ကလေးသူငယ်တွေအတွက် ပြင်းထန်ပြီး မလိုလားအပ်တဲ့ နောက်ဆက်တွဲရိုက်ခတ်မှုတွေ ဖြစ်ပေါ်နိုင်ပါတယ်။” ဟု Nishinomiya မှ မြို့တော်ကောင်စီဝင်တစ်ဦးဖြစ်သူ Akiyo Tanaka က ပြောသည်။ "သူတို့ထဲက တစ်ချို့ဆိုရင် အရွယ်ရောက်တဲ့အထိ စိတ်ဒဏ်ရာ ခံစားမှု ဆက်လက်ကြုံတွေ့ရတတ်ပါတယ်။”

 

 

'သူစိမ်းတွေရှေ့မှာ အဝတ်ချွတ်ပြရတာ စိတ်ပျက်စရာပဲ'

 

 

၎င်းအရေး မီဒီယာများနှင့် နိုင်ငံ့ နိုင်ငံရေးသမားများ၏ အာရုံစိုက်မှုရရှိလာပြီးနောက် ဩဇာကြီးမားသည့် အဖွဲ့အစည်းများကို တာဝန်ယူခိုင်းရန် တွန့်ဆုတ်နေသည့် ဂျပန်နိုင်ငံ ဆေးဘက်ဆိုင်ရာအသင်းနှင့် ပညာရေးအရာရှိများထံမှ ခုခံမှုများ ရင်ဆိုင်ရလာသည်ဟု စည်းရုံးလှုံ့ဆော်သူများက ပြောသည်။ "အချို့ ဖြစ်စဉ်တွေမှာ အမျိုးသားတွေ အများစုဖြစ်တဲ့ ဆရာဝန်တွေက လုပ်ထုံးလုပ်နည်း အတင်းအကျပ် ပြောင်းလဲ မယ်ဆိုရင် စစ်ဆေးမှုတွေ ရပ်တန့်လိုက်မယ်လို့ ခြိမ်းခြောက်ကြပါတယ်။” ဟု ၎င်းအရေး သိရှိသူတစ်ဦး က အမည်မဖော်ဘဲ ပြောသည်။

 

 

“ကလေးသူငယ်တွေ အဝတ်အစား အပြည့်အစုံဝတ်ထားရင် စနစ်တကျ စစ်ဆေးမှု လုပ်ဖို့ မဖြစ်နိုင်ဘူးလို့ သူတို့က အတင်းအကျပ် ပြောကြတယ်။ ကလေးတွေက ငြင်းပယ်ခွင့် မရှိတဲ့ အခြေအနေပါ။ ကျောင်းတွေက ဒီကိစ္စကို တကယ် စိုးရိမ်နေကြပြီး တစ်ခုခုလုပ်လိုကြပါတယ်။”

 

 

ဂျပန်နိုင်ငံ ဆေးဘက်ဆိုင်ရာအသင်း က The Guardian ၏ မှတ်ချက်ပေးရန် တောင်းဆိုမှုကို တုန့်ပြန်ခြင်း မရှိပါ။

 

 

“ကျွန်မသမီးအရွယ် မိန်းကလေးတွေက သူတို့ခန္ဓာကိုယ်အကြောင်း မိဘတွေကို ပြောပြရမှာ ရှက်ကြပါတယ်။” ဟု Chiyoko Suda က ပြောသည်။ သူမ၏ အသက် ၁၃ နှစ်အရွယ် သမီးက ကျောင်းတွင် ခန္ဓာကိုယ် တစ်စိတ်တစ်ပိုင်း ဝတ်လစ်စလစ်ဖြင့် ကျန်းမာရေးစစ်ဆေးခြင်း ခံရမှုအတွက် ကျောင်းကို ရင်ဆိုင်ဖြေရှင်းခြင်း မပြုရန် တောင်းပန်ခဲ့သည်။ "ဒီတော့ သူတို့ သူစိမ်းတွေရှေ့မှာ အဝတ်အစားတွေချွတ်ပြရတာ ဘယ်လောက် ဆိုးရွားတယ်ဆိုတာ မြင်ယောင်ခံစားကြည့်လို့ ရနိုင်ပါတယ်။”

 

အနည်းဆုံး မူလတန်းကျောင်း ၁၆ ခုတွင် အပေါ်ပိုင်းနှင့် ဘရာများ ချွတ်ရန်လိုအပ်သည်ဟု အာဏာပိုင်များက ပြောသော Yokohama အပါအဝင် နိုင်ငံအဝှမ်းရှိ ကျောင်းများမှ ကျောင်းသားမိဘများက ကျန်းမာရေးစစ်ဆေးမှုများအပေါ် စောဒကတက်မှုများ ပြုလုပ်ခဲ့ကြသည်

 

 

 

စစ်ပွဲအလွန် ခြိုးခြံချွေတာရေးနှစ်များအတွင်း အချို့ဒေသများတွင် လွန်ကျူးသော ကျန်းမာရေးစစ်ဆေးမှုများ ပိုမိုစတင်လုပ်ဆောင်ခဲ့ကြသည်။ ၎င်းကာလများတွင် ကလေးသူငယ်များ ကျန်းမာရေးကောင်းမွန်မှုနှင့် စနစ်တကျ ကျွေးမွေးမှု ရှိ၊ မရှိ‌ သေချာစေရန် ကျောင်းများက ပိုမိုအရေးပါသည့် အခန်းကဏ္ဍကို ရယူထားခဲ့ကြသည်။

 

 

atopic dermatitis (အရေပြား ခြောက်သွေ့၊ ယားယံ၊ ရောင်ယမ်းခြင်း) လက္ခဏာများ၊ နှလုံးမူမမှန်မှုများနှင့် အခြားအခြေအနေများကို စစ်ဆေးရန် အပေါ်ပိုင်းချွတ် စစ်ဆေးမှုများ လိုအပ်သည်ဟု ဆရာဝန်များက ပြောသည်။ "ဆရာဝန်အများအပြားက အထူးသဖြင့် အသက်ကြီးတဲ့ ဆရာဝန်တွေက ရှေးရိုးဆန်ပြီး သူတို့ရဲ့ နည်းလမ်းတွေကို မပြောင်းချင်ကြဘူး။” ဟု ကိုဘေး တက္ကသိုလ်ဆေးရုံးမှ ကူးစက်ရောဂါ ပါမောက္ခ Kentaro Iwata က ပြောသည်။

 

 

“စနစ်တကျ” စစ်ဆေးရန် ကလေးသူငယ်များကို အဝတ်အစားချွတ်ခိုင်းရမည်ဟု ဆေးဘက်ဆိုင်ရာ ကျင့်သုံးမှု တစ်စုံတစ်ရာ ရှိပါသလားဟု မေးမြန်းမှုအပေါ် Iwata က "ကျွန်တော် သိသလောက် မရှိဘူး။ နှလုံးခုံသံ အရည်အသွေး နည်းနည်းလေး ပိုကြားရမယ်။ ဒါပေမယ့် ဒါက ကလေးသူငယ်တွေရဲ့ ကျန်းမာရေးကို တိုးမြှင့်ဖို့ အထောက်အကူပြုတယ်လို့ ကျွန်တော် မထင်ပါဘူး။” ဟု ပြောသည်။

 

 

အနည်းဆုံး မူလတန်းကျောင်း ၁၆ ခုတွင် အပေါ်ပိုင်းနှင့် ဘရာများ ချွတ်ရန်လိုအပ်သည်ဟု အာဏာပိုင်များက ပြောသော Yokohama အပါအဝင် နိုင်ငံအဝှမ်းရှိ ကျောင်းများမှ ကျောင်းသားမိဘများက ကျန်းမာရေးစစ်ဆေးမှုများအပေါ် စောဒကတက်မှုများ ပြုလုပ်ခဲ့ကြသည်။

 

 

“ဆေးဘက်ဆိုင်ရာ စစ်ဆေးမှုများကို ကိုယ်ရေးလွတ်လပ်ခွင့်နှင့် ကျောင်းသား၊ ကျောင်းသူများ၏ ခံစားချက်ကို ထည့်သွင်းစဉ်းစားပြီး လုပ်ဆောင်ရန်” ဟု ပညာရေးဝန်ကြီးဌာနက ပညာရေးဘုတ်အဖွဲ့များကို နှစ်စပိုင်းတွင် တောင်းဆိုထားသည့် အသိပေးစာထုတ်ပြန်ထားသည့်အကြားမှ ၎င်းအရေးထွက်ပေါ်လာခြင်းဖြစ်သည်။ ၎င်းအသိပေးစာတွင် "စစ်ဆေးမှု၏ တိကျမှန်ကန်မှုကို အနှောင့်အယှက်မဖြစ်စေသည့် အတိုင်းအတာအထိ” ကျောင်းသား၊ ကျောင်းသူများကို ကာယပညာရေးဝတ်စုံ ဝတ်ဆင်ခွင့်ပြုရမည် သို့မဟုတ် ၎င်းတို့၏ ခန္ဓာကိုယ်အပေါ်ပိုင်းကို ပဝါဖြင့် ဖုံးအုပ်ထားရန် ခွင့်ပြုရမည်ဟု ပါရှိသည်။

 

 

ပညာရေးဝန်ကြီးဌာနက ယောက်ျားလေးများနှင့် မိန်းကလေးများကို အခန်းကန့်ခြင်း၊ လိုက်ကာ ကာခြင်းတို့ဖြင့် သီးသန့်ခွဲခြား စစ်ဆေးရန်၊ ကလေးသူငယ်နှင့် ကျား၊ မ တူညီသည့် ဆရာ၊ ဆရာမများ၊ ဝန်ထမ်းများ အတူရှိနေရန်၊ အချို့ဖြစ်စဉ်များတွင် စမ်းသပ်စစ်ဆေးမှု မှန်ကန်တိကျစေရေး ကလေးသူငယ်များက ရှပ်အင်္ကျီများ လှစ်ဟပြရန်လိုအပ်သည့်အတွက် မိဘနှင့် အုပ်ထိန်းသူများကို ကြိုတင်အကြောင်းကြားရန်တို့ကိုလည်း တောင်းဆိုထားသည်။

 

 

မိဘများ၏ ဖိအားပေးမှုကြောင့် ကျိုတိုမြို့တွင် ကျောင်းများက "အခြေခံအားဖြင့်" ကလေးသူငယ်များကို အတွင်းခံနှင့် ကာယပညာရေးဝတ်စုံ ဝတ်ဆင်ခွင့်ပြုရန် ၎င်း၏ မူဝါဒကို ပြောင်းလဲခဲ့သည်။ အခြားကျောင်းများကလည်း လိုက်လံကျင့်သုံးခဲ့ကြသည်။

 

 

“ပညာရေးဝန်ကြီးဌာနက ပိုမိုတိကျတဲ့ လမ်းညွှန်ချက်တွေ ပေးနိုင်ရင် ကောင်းမယ်။ ဒါမှ ဒေသတွင်းအစိုးရတွေနဲ့ ကျောင်းတွေမှာ တသမတ်တည်း ဖြစ်သွားမယ်။” ဟု ကျိုတိုတက္ကသိုလ်မှ ဆေးဘက်ဆိုင်ရာကျင့်ဝတ် ကျွမ်းကျင်သူနှင့် ပါမောက္ခတစ်ဦးဖြစ်သူ Satoshi Kodama က Mainichi Shimbun သတင်းစာကို ပြောသည်။

‌

 

Mai Okumura က သူမ၏ သမီးဖြစ်သူ အလယ်တန်းကျောင်းသူသည် သူမ၏ တီရှပ်နှင့် ဘရာကို ချွတ်ပြရမည်ဆိုသောအခါ ကျန်းမာရေးစစ်ဆေးမှုပြုရန် အစပိုင်းတွင် ငြင်းဆန်ခဲ့သည်ဟု ပြောသည်။ "ကျွန်မ သူ့ကို မေးတော့ စည်းကမ်းတွေက အရွယ်ရောက်ပြီးသူ‌တွေ ဆုံးဖြတ်တာဖြစ်တဲ့အတွက် သူလည်း မတတ်နိုင်ဘူးလို့ ပြောပါတယ်။”

 

 

Sachiko Shimada ၏ သမီးဖြစ်သူသည်လည်း အလားတူ အပေါ်ပိုင်းချွတ်မပြလိုသော်လည်း ငြင်းဆန်ရန် မတတ်နိုင်ခဲ့ပေ။ "သူ အိမ်ပြန်လာပြီး ကျွန်မကို သူ့ အပေါ်ပိုင်းနဲ့ ဘရာ ချွတ်ပြရတယ်၊ ရင်သားတွေပြရတယ်ဆိုတာ ပြောပြတော့ ကျွန်မ တုန်လှုပ်မိတယ်။” ဟု Shimada က ပြောသည်။

 

“ဒါက သူတို့ရဲ့ ကိုယ်ရေးလွတ်လပ်ခွင့်နဲ့ ဂုဏ်သိက္ခာကို လေးစားမှု အားနည်းတယ်ဆိုတာ ပြနေတာပဲ။”

 

 

ကလေးသူငယ်များ၏ မိခင်အမည်များကို ၎င်းတို့၏ တောင်းဆိုချက်အရ လွှဲပြောင်းထားသည်။

 

 

ကိုးကား - The Guardian

 

 

ပုံစာ - ကျောင်းများတွင် ခန္ဓာကိုယ် အပေါ်ပိုင်းဗလာဖြင့် ဆေးဘက်ဆိုင်ရာ စစ်ဆေးမှုကို ရပ်တန့်ရန် ဂျပန်နိုင်ငံရှိ မိဘများက ပညာရေးနှင့် ကျန်းမာရေးအာဏာပိုင်များကို တောင်းဆိုနေကြသည်။ (urbancow/Getty Images)