BAP ဘာသာပြန်။

 

နည်းဗျူဟာပိုင်းအရ တိကျသေချာသော စစ်ဆင်ရေးတစ်ခုဖြင့် အမေရိကန်စစ်သည်များ အသက်ဆုံးရှုံးမှုမရှိဘဲ မစ္စတာမာဒူရိုကို အောင်မြင်စွာ ဖမ်းဆီးနိုင်ခဲ့သည်။ ဤရလဒ်ကို သမ္မတထရမ့်က ချီးကျူးဂုဏ်ပြုခဲ့သော်လည်း ဗင်နီဇွဲလားရှိ အမေရိကန်၏ လုပ်ဆောင်ချက်များမှာ ဥပဒေနှင့် ညီညွတ်မှု ရှိ၊ မရှိနှင့် အခြေခံအကြောင်းရင်းများနှင့် ပတ်သက်၍ မေးခွန်းထုတ်မှုများ ကျယ်ကျယ်ပြန့်ပြန့် ထွက်ပေါ်နေသည်။

 

ဩဂုတ်လအတွင်းက CIA အရာရှိများ ပါဝင်သော လျှို့ဝှက်အဖွဲ့တစ်ဖွဲ့သည် ထရမ့်အစိုးရက မူးယစ်ဆေးဝါး အကြမ်းဖက်သမားအဖြစ် တံဆိပ်ကပ်ထားသည့် ဗင်နီဇွဲလားသမ္မတ နီကိုးလပ်စ် မာဒူရိုနှင့် ပတ်သက်သော သတင်းအချက်အလက်များ စုဆောင်းရန် ဗင်နီဇွဲလားနိုင်ငံအတွင်းသို့ လျှို့ဝှက်ဝင်ရောက်ခဲ့သည်။ ၎င်း CIA အဖွဲ့သည် ကာရာကတ်စ်မြို့အတွင်း လှုပ်ရှားသွားလာခဲ့ပြီး နိုင်ငံအတွင်းရှိနေစဉ် လပေါင်းများစွာ မရိပ်မိအောင် နေထိုင်ခဲ့သည်။ ဗင်နီဇွဲလားခေါင်းဆောင်၏ နေ့စဉ်သွားလာလှုပ်ရှားမှုများ၊ မာဒူရိုနှင့် နီးစပ်သည့် သတင်းပေးတစ်ဦးထံမှ အချက်အလက်များနှင့် အထက်ကောင်းကင်တွင် လျှို့ဝှက်ပျံသန်းနေသော ကိုယ်ပျောက်ဒရုန်းများမှတစ်ဆင့် ရရှိသည့် သတင်းများကြောင့် ၎င်းအေဂျင်စီအနေဖြင့် မာဒူရို၏ နေ့စဉ်လုပ်ငန်းဆောင်တာများကို မိနစ်မပြတ် အသေးစိတ် မြေပုံညွှန်းနိုင်ခဲ့သည်။

 

ဤမစ်ရှင်မှာ အလွန်အန္တရာယ်များလှသည်။ အမေရိကန်သံရုံး ပိတ်ထားရသည့်အတွက် CIA အရာရှိများသည် သံတမန်အကာအကွယ်အောက်တွင် လုပ်ကိုင်နိုင်ခြင်း မရှိပေ။ သို့သော်လည်း အလွန်အောင်မြင်ခဲ့သည်။ စစ်ဦးစီးချုပ်များအဖွဲ့ ဥက္ကဋ္ဌ ဗိုလ်ချုပ်ကြီး ဒန်ကိန်းက သတင်းစာရှင်းလင်းပွဲတွင် ပြောကြားရာ၌ အဆိုပါအဖွဲ့က စုဆောင်းခဲ့သည့် ထောက်လှမ်းရေးသတင်းများကြောင့် မာဒူရို ဘယ်နေရာသို့ ရွေ့လျားသည်၊ ဘာစားသည်နှင့် မည်သည့်အိမ်မွေးတိရစ္ဆာန်များ မွေးမြူထားသည်အထိ အမေရိကန်က သိရှိခဲ့ကြောင်း ဆိုသည်။

 

ရလဒ်မှာ နည်းဗျူဟာပိုင်းအရ တိကျပြီး လျင်မြန်စွာ အကောင်အထည်ဖော်နိုင်ခဲ့သော စစ်ဆင်ရေး ဖြစ်ကာ မာဒူရိုကို ၎င်း၏နိုင်ငံအတွင်းမှ အမေရိကန်စစ်သည် တစ်ဦးတစ်ယောက်မျှ အသက်ဆုံးရှုံးမှုမရှိဘဲ ဖမ်းဆီးခေါ်ဆောင်နိုင်ခဲ့သည်

 

အဆိုပါ အချက်အလက်များသည် စနေနေ့ အရုဏ်တက်ချိန်တွင် ပြုလုပ်ခဲ့သော အထူးတပ်ဖွဲ့ (Army Delta Force) ကွန်မန်ဒိုများ၏ စီးနင်းမှုအတွက် အလွန်အရေးပါခဲ့သည်။ ဤစစ်ဆင်ရေးသည် ၂၀၁၁ ခုနှစ်က ပါကစ္စတန်ရှိ လုံခြုံစိတ်ချရသော အိမ်တစ်လုံးတွင် နေဗီဆီးလ် (Navy’s SEAL Team 6) အဖွဲ့ဝင်များက အိုစမာဘင်လာဒင်ကို သုတ်သင်ခဲ့သည့် စစ်ဆင်ရေးနောက်ပိုင်း အန္တရာယ်အရှိဆုံး အမေရိကန်စစ်ရေးစစ်ဆင်ရေးတစ်ခု ဖြစ်သည်။

 

ရလဒ်မှာ နည်းဗျူဟာပိုင်းအရ တိကျပြီး လျင်မြန်စွာ အကောင်အထည်ဖော်နိုင်ခဲ့သော စစ်ဆင်ရေး ဖြစ်ကာ မာဒူရိုကို ၎င်း၏နိုင်ငံအတွင်းမှ အမေရိကန်စစ်သည် တစ်ဦးတစ်ယောက်မျှ အသက်ဆုံးရှုံးမှုမရှိဘဲ ဖမ်းဆီးခေါ်ဆောင်နိုင်ခဲ့သည်။ ဤရလဒ်ကို သမ္မတထရမ့်က ဂုဏ်ပြုပြောကြားခဲ့သည်။

 

သမ္မတထရမ့်က ‘Operation Absolute Resolve’ ဟု အမည်ပေးထားသည့် ဤစစ်ဆင်ရေးကို မူးယစ်ဆေးဝါး ကုန်ကူးမှုအပေါ် တိုက်ခိုက်မှုအဖြစ် အကြောင်းပြခဲ့သည်။ သို့သော်လည်း ဗင်နီဇွဲလားသည် အခြားနိုင်ငံများနှင့် နှိုင်းယှဉ်လျှင် နိုင်ငံတကာ မူးယစ်ဆေးဝါး ကုန်သွယ်မှုတွင် အဓိကနေရာမှ ပါဝင်ခြင်းမရှိသလောက် ဖြစ်သည်။ အစိုးရတာဝန်ရှိသူများကလည်း ဗင်နီဇွဲလားရှိ ၎င်းတို့၏ ရည်မှန်းချက်မှာ အစိုးရအပြောင်းအလဲလုပ်ရန် မဟုတ်ကြောင်း လွှတ်တော်ခေါင်းဆောင်များကို ယခင်က ပြောကြားခဲ့ဖူးသည်။ ထို့ပြင် မစ္စတာထရမ့်သည် အမေရိကန်၏ ပြည်ပကျူးကျော်သိမ်းပိုက်မှုများကို ဆန့်ကျင်ကြောင်း ကာလရှည်ကြာ ပြောဆိုလာခဲ့သူဖြစ်သည်။

 

သို့သော်လည်း စနေနေ့တွင်မူ သမ္မတက အမေရိကန်အရာရှိများသည် ဗင်နီဇွဲလားကို တာဝန်ယူအုပ်ချုပ်နေပြီဖြစ်ကြောင်းနှင့် အမေရိကန်သည် နိုင်ငံ၏ ရေနံအခြေခံအဆောက်အအုံများကို ပြန်လည် တည်ဆောက်မည်ဖြစ်ကြောင်း ကြေညာခဲ့သည်။

 

ယခင်က ပနားမားရှိ စစ်တပ်၏ စွက်ဖက်မှု သို့မဟုတ် ကျူးဘားရှိ CIA ၏ စွက်ဖက်မှုများကဲ့သို့ ရှုပ်ထွေးမှုများ ရှိခဲ့သော်လည်း၊ မာဒူရိုကို ဖမ်းဆီးသည့် စစ်ဆင်ရေးမှာမူ လုံးဝနီးပါး ချို့ယွင်းချက်မရှိကြောင်း အစီအစဉ်ကို သိရှိနားလည်သည့် အရာရှိအများအပြားက အမည်မဖော်လိုသည့် အခြေအနေဖြင့် ပြောကြားသည်။

 

စစ်ဆင်ရေးမတိုင်မီတွင် Delta Force ကွန်မန်ဒိုများသည် ကင်တပ်ကီးပြည်နယ်၌ ပူးတွဲအထူးစစ်ဆင်ရေးဌာနချုပ်မှ တည်ဆောက်ထားသော မာဒူရို၏ နေအိမ်ဝင်းပုံစံတူအတွင်း၌ ဖမ်းဆီးခေါ်ဆောင်မှုအတွက် လေ့ကျင့်ခဲ့ကြသည်။ ၎င်းတို့သည် သံမဏိတံခါးများကို အမြန်ဆုံး ဖောက်ခွဲဝင်ရောက်သည့် နည်းလမ်းများကို လေ့ကျင့်ခဲ့ကြသည်။ စစ်တပ်သည် ဤမစ်ရှင်ကို အကောင်အထည်ဖော်ရန် ရက်ပေါင်းများစွာ အသင့်ပြင်ဆင်နေခဲ့ပြီး ရာသီဥတုအခြေအနေ ကောင်းမွန်မည့်အချိန်နှင့် အရပ်သား ထိခိုက်သေဆုံးမှု အနည်းဆုံးဖြစ်မည့် အချိန်ကို စောင့်ဆိုင်းခဲ့သည်။

 

တင်းမာမှုများ မြင့်တက်နေစဉ်အတွင်း မာဒူရိုသည် နေရာ ၆ ခုမှ ၈ ခုအကြား လှည့်လည်နေထိုင်ခဲ့ပြီး အမေရိကန်အနေဖြင့် သူမည်သည့်နေရာတွင် ညအိပ်မည်ကို ညဉ့်နက်ပိုင်းအထိ အမြဲတမ်း မသိရှိခဲ့ပေ။ စစ်ဆင်ရေးကို အကောင်အထည်ဖော်ရန်အတွက် မာဒူရိုသည် ၎င်းတို့လေ့ကျင့်ထားသည့် အဆောက်အအုံဝင်းအတွင်း ရှိနေကြောင်း အမေရိကန်စစ်တပ်က အတည်ပြုချက်လိုအပ်ခဲ့သည်။

 

စီးနင်းမှုမတိုင်မီ ရက်များတွင် အမေရိကန်သည် အထူးစစ်ဆင်ရေးလေယာဉ်များ၊ အထူးပြုအီလက်ထရွန်နစ်စစ်ဆင်ရေးလေယာဉ်များ၊ လက်နက်တပ်ဆင်ထားသော Reaper ဒရုန်းများ၊ ရှာဖွေကယ်ဆယ်ရေး ရဟတ်ယာဉ်များနှင့် တိုက်လေယာဉ်များကို ဒေသတွင်းသို့ တိုးမြှင့်ချထားခဲ့သည်။ ဤနောက်ဆုံးမိနစ် အင်အားဖြည့်တင်းမှုများသည် စစ်ရေးအရ လုပ်ဆောင်ရန်မှာ အချိန်ပိုင်းသာ လိုတော့ကြောင်း ပြသနေသည်ဟု သုံးသပ်သူများက ဆိုသည်။

 

အမေရိကန်သည် မာဒူရိုအပေါ် ဖိအားများ တိုးမြှင့်ရန်နှင့် သူ့ကိုဖမ်းဆီးရန်အတွက် အခြားသော ပြင်ဆင်မှုများကိုလည်း ပြုလုပ်ခဲ့သည်။ တစ်ပတ်အလိုတွင် CIA သည် ဗင်နီဇွဲလားရှိ ဆိပ်ကမ်းတစ်ခုကို ဒရုန်းဖြင့် တိုက်ခိုက်ခဲ့သည်။ ထို့ပြင် လပေါင်းများစွာအတွင်း အမေရိကန်စစ်တပ်သည် ဥပဒေအရ အငြင်းပွားဖွယ်ဖြစ်နေသော စစ်ဆင်ရေးတစ်ရပ်ကို ဆင်နွှဲခဲ့ပြီး ကာရစ်ဘီယံနှင့် ပစိဖိတ်အရှေ့ပိုင်းတွင် လှေပေါင်းများစွာကို ဖျက်ဆီးကာ အနည်းဆုံး လူ ၁၁၅ ဦးကို သတ်ဖြတ်ခဲ့သည်။

 

မကြာသေးမီရက်များအတွင်း မာဒူရိုသည် အမေရိကန်၏ စီးနင်းမှုကို ဟန့်တားရန် ကြိုးပမ်းခဲ့ပြီး ဗင်နီဇွဲလားရေနံကို အမေရိကန်အား အသုံးပြုခွင့်ပေးရန် ကမ်းလှမ်းခဲ့ကြောင်း ထရမ့်က စနေနေ့တွင် ပြောကြားခဲ့သည်။ အမေရိကန်အရာရှိတစ်ဦး၏ အဆိုအရ ဒီဇင်ဘာ ၂၃ ရက်တွင် ကမ်းလှမ်းခဲ့သော အဆိုပါ သဘောတူညီချက်အရ မာဒူရိုအား တူရကီနိုင်ငံသို့ ထွက်ခွာခွင့်ပေးရန် ပါဝင်သော်လည်း မာဒူရိုက ထိုအစီအစဉ်ကို ဒေါသတကြီး ငြင်းပယ်ခဲ့သည်။ မာဒူရိုမှာ အလေးအနက်ထားခြင်းမရှိသည်မှာ ရှင်းလင်းကြောင်း အဆိုပါအရာရှိက ဆက်ပြောသည်။

 

ဆွေးနွေးပွဲများ ပျက်ပြားသွားခြင်းက ဖမ်းဆီးရေးမစ်ရှင်အတွက် လမ်းစဖြစ်လာခဲ့ပြီး နောက်ဆုံးတွင် မာဒူရိုကို အမေရိကန်သို့ လေယာဉ်ဖြင့် ခေါ်ဆောင်လာကာ ဖက်ဒရယ် မူးယစ်ဆေးဝါး ကုန်ကူးမှု စွဲချက်များဖြင့် ဘရွတ်ကလင်းတွင် ထိန်းသိမ်းခဲ့သည်။

 

အမေရိကန် လာရောက်မည်ကို ဗင်နီဇွဲလားအစိုးရအတွင်း သံသယရှိဖွယ် မရှိသော်လည်း၊ စစ်တပ်သည် နည်းဗျူဟာပိုင်းအရ အလစ်အငိုက်ဖမ်းနိုင်ရန် အထူးဂရုစိုက်ခဲ့သည်။ သမ္မတထရမ့်သည် ဒီဇင်ဘာ ၂၅ ရက်ကတည်းက စတင်ရန် ခွင့်ပြုခဲ့သော်လည်း မြေပြင်အခြေအနေ အကောင်းဆုံးဖြစ်စေရန် အချိန်ကို ပင်တဂွန်တာဝန်ရှိသူများနှင့် အထူးစစ်ဆင်ရေး စီစဉ်သူများထံ လွှဲထားခဲ့သည်။ အစိုးရအရာရှိ အများအပြားနှင့် ဗင်နီဇွဲလား စစ်ဘက်ဆိုင်ရာ ပုဂ္ဂိုလ်များ အားလပ်ရက် အနားယူနေသည့် အချိန်ဖြစ်သောကြောင့် အားလပ်ရက်ကာလအတွင်း စစ်ဆင်ရေးကို ဆောင်ရွက်လိုခြင်း ဖြစ်ကြောင်း အမေရိကန်အရာရှိတစ်ဦးက ဆိုသည်။

 

ရာသီဥတု ဆိုးရွားမှုကြောင့် စစ်ဆင်ရေးမှာ ရက်အနည်းငယ် နောက်ကျခဲ့သည်။ သို့သော်လည်း အပတ်စဉ်အတွင်း ရာသီဥတု ပြန်လည်သာယာလာသောအခါ စစ်ဦးစီးချုပ်များသည် ပစ်မှတ်ထားတိုက်ခိုက်ရန် အခွင့်အလမ်းကို စောင့်ကြည့်ခဲ့ကြသည်။ သမ္မတထရမ့်သည် သောကြာနေ့ ည ၁၀:၄၆ နာရီတွင် နောက်ဆုံးအမိန့်ကို ပေးခဲ့သည်။ ရာသီဥတုသာ မသာယာပါက ဤမစ်ရှင်သည် ဇန်နဝါရီလလယ်အထိ နောက်ဆုတ်သွားနိုင်ကြောင်း အရာရှိတစ်ဦးက ဆိုသည်။

 

စစ်ဆင်ရေးကို သောကြာနေ့ ညနေ ၄:၃၀ နာရီဝန်းကျင်တွင် စတင်ခဲ့ပြီး အရာရှိများက လေကြောင်းပိုင်ဆိုင်မှုအချို့ကို စတင်ရန် ပထမအဆင့် ခွင့်ပြုချက်များ ပေးခဲ့သည်။ သို့သော်လည်း မစ်ရှင်တစ်ခုလုံးကို ခွင့်ပြုလိုက်ခြင်း မဟုတ်သေးပေ။ နောက်ထပ် ၆ နာရီကြာအောင် တာဝန်ရှိသူများသည် မြေပြင်အခြေအနေ၊ ရာသီဥတုနှင့် မာဒူရို၏ တည်နေရာကို ဆက်လက်စောင့်ကြည့်ခဲ့သည်။ မစ္စတာထရမ့်သည် ထိုညနေခင်းကို ဖလော်ရီဒါရှိ ၎င်း၏ Mar-a-Lago ကလပ်တွင် အကြံပေးများ၊ ဝန်ကြီးများနှင့်အတူ ညစာစားရင်း ကုန်ဆုံးခဲ့သည်။ အကြံပေးများက သမ္မတအား ည ၁၀:၃၀ နာရီဝန်းကျင်တွင် နောက်ဆုံးခွင့်ပြုချက်အတွက် ဖုန်းဆက်မည်ဟု ပြောကြားခဲ့သည်။ ထရမ့်က ဖုန်းဖြင့် ခွင့်ပြုခဲ့ပြီးနောက် ခြံဝင်းအတွင်းရှိ လုံခြုံစိတ်ချရသော နေရာတစ်ခု၌ အမျိုးသားလုံခြုံရေး အဆင့်မြင့်အရာရှိများနှင့် ပူးပေါင်းခဲ့သည်။

 

ဗင်နီဇွဲလားအတွင်း၌ လေယာဉ်များ၊ ဒရုန်းများနှင့် ရဟတ်ယာဉ်များ မရိပ်မိဘဲ ချဉ်းကပ်နိုင်ရန် ကာရာကတ်စ်မြို့၏ နေရာအတော်များများကို လျှပ်စစ်မီးဖြတ်တောက်သည့် ဆိုင်ဘာစစ်ဆင်ရေးဖြင့် စတင်ခဲ့သည်။ ဒရုန်းများ၊ တိုက်လေယာဉ်များနှင့် ဗုံးကြဲလေယာဉ်များ အပါအဝင် စစ်လေယာဉ် ၁၅၀ ကျော်သည် စစ်အခြေစိုက်စခန်း ၂၀ နှင့် ရေတပ်သင်္ဘောများမှ ပျံတက်ကာ မစ်ရှင်တွင် ပါဝင်ခဲ့သည်။ လေယာဉ်များ ချဉ်းကပ်လာစဉ် ထောက်လှမ်းရေးများအရ မာဒူရိုမှာ ကြိုတင်သတိပေးချက် မရရှိထားဘဲ အလစ်အငိုက် မိနေသည်ဟု ဆိုသည်။

 

စနေနေ့ နံနက်အစောပိုင်းတွင် အမေရိကန် တိုက်လေယာဉ်များက ရေဒါနှင့် လေကြောင်းရန်ကာကွယ်ရေး စနစ်များကို တိုက်ခိုက်ခဲ့ရာ ကာရာကတ်စ်မြို့တစ်ခွင် ပေါက်ကွဲသံများ ဟည်းသွားခဲ့သည်။ စနေနေ့ တိုက်ခိုက်မှုအတွင်း စစ်ဘက်နှင့် အရပ်သား အနည်းဆုံး ၄၀ ဦး သေဆုံးခဲ့ကြောင်း ဗင်နီဇွဲလား အဆင့်မြင့်အရာရှိတစ်ဦးက ဆိုသည်။ နောက်ပိုင်းတွင် ဗိုလ်ချုပ်ကြီး ကိန်းက သတင်းထောက်များကို ပြောကြားရာ၌ တိုက်လေယာဉ်များနှင့် ဒရုန်းများသည် အထူးတပ်ဖွဲ့များ တင်ဆောင်လာသည့် ရဟတ်ယာဉ်များအတွက် ဘေးကင်းသော လမ်းကြောင်းရရှိစေရန် နိုင်ငံ၏ လေကြောင်းရန်ကာကွယ်ရေးစနစ်များကို ရှာဖွေဖျက်ဆီးခဲ့ကြောင်း ဆိုသည်။

 

ဗင်နီဇွဲလားခေါင်းဆောင်နှင့် ၎င်း၏ဇနီးသည် သံမဏိဖြင့် အခိုင်အမာပြုလုပ်ထားသော အခန်းအတွင်းသို့ ထွက်ပြေးရန် ကြိုးစားခဲ့သော်လည်း အမေရိကန်တပ်ဖွဲ့ဝင်များက တားဆီးနိုင်ခဲ့ကြောင်း ဆိုသည်

 

ဗင်နီဇွဲလား၏ လေကြောင်းရန်ကာကွယ်ရေးကို နှိမ်နင်းနိုင်ခဲ့သော်လည်း၊ ဒေသစံတော်ချိန် နံနက် ၂:၀၁ နာရီဝန်းကျင်တွင် မာဒူရို၏ နေအိမ်ဝင်းသို့ ချဉ်းကပ်စဉ် အမေရိကန် ရဟတ်ယာဉ်များမှာ ပစ်ခတ်မှုကို ခံခဲ့ရသည်။ ဗိုလ်ချုပ်ကြီး ကိန်းက ရဟတ်ယာဉ်များသည် "ပြင်းထန်သော အင်အား" ဖြင့် ပြန်လည်တုံ့ပြန်ခဲ့ကြောင်း ဆိုသည်။ ရဟတ်ယာဉ်တစ်စီး ထိမှန်ခဲ့ပြီး စစ်သည် ၆ ဦးခန့် ဒဏ်ရာရရှိခဲ့သည်။ မာဒူရိုအား ဖမ်းဆီးရန် တာဝန်ပေးထားသည့် Delta Force တပ်ဖွဲ့ဝင်များကို ဗင်နီဇွဲလား၏ အခိုင်အမာဆုံး စစ်အခြေစိုက်စခန်းရှိ ၎င်းတို့၏ ပစ်မှတ်ဆီသို့ အဆင့်မြင့် MH-60 နှင့် MH-47 ရဟတ်ယာဉ်များဖြင့် ပို့ဆောင်ခဲ့သည်။ "Night Stalkers" ဟု အမည်ပေးထားသည့် အဆိုပါတပ်ဖွဲ့သည် အန္တရာယ်များသော ညပိုင်းမစ်ရှင်များကို အထူးပြုလုပ်ဆောင်သည့် အဖွဲ့ဖြစ်သည်။

 

မြေပြင်သို့ရောက်သည်နှင့် Delta Force သည် မာဒူရိုကို ရှာဖွေရန် အဆောက်အအုံအတွင်းသို့ လျင်မြန်စွာ လှုပ်ရှားခဲ့သည်။ မိုင် ၁,၃၀၀ ခန့်အကွာရှိ Mar-a-Lago ရှိ အခန်းတစ်ခန်းအတွင်း၌ မစ္စတာထရမ့်နှင့် အဓိကအကြံပေးများသည် အထက်ရှိ လေယာဉ်ပေါ်တွင် တပ်ဆင်ထားသော ကင်မရာမှတစ်ဆင့် စီးနင်းမှုကို တိုက်ရိုက်ကြည့်ရှုနေခဲ့ကြသည်။ သမ္မတထရမ့်က "ကျွန်တော် တီဗွီအစီအစဉ်တစ်ခုကို ကြည့်နေရသလိုမျိုး စောင့်ကြည့်ခဲ့တာပါ။" ဟု Fox News သို့ ပြောကြားခဲ့သည်။

 

Delta Force တပ်ဖွဲ့ဝင်များသည် အဆောက်အအုံအတွင်းသို့ ဝင်ရောက်ရန် ဖောက်ခွဲရေးပစ္စည်းကို အသုံးပြုခဲ့ကြသည်။ တံခါးကို ဖောက်ခွဲဝင်ရောက်ပြီးနောက် မာဒူရိုရှိရာသို့ ရောက်ရှိရန် ၃ မိနစ်သာ ကြာမြင့်ခဲ့သည်။ မစ္စတာထရမ့်က အထူးတပ်ဖွဲ့ဝင်များ မာဒူရို၏ အခန်းသို့ ရောက်ရှိသောအခါ ဗင်နီဇွဲလားခေါင်းဆောင်နှင့် ၎င်း၏ဇနီးသည် သံမဏိဖြင့် အခိုင်အမာပြုလုပ်ထားသော အခန်းအတွင်းသို့ ထွက်ပြေးရန် ကြိုးစားခဲ့သော်လည်း အမေရိကန်တပ်ဖွဲ့ဝင်များက တားဆီးနိုင်ခဲ့ကြောင်း ဆိုသည်။ "သူက လုံခြုံတဲ့နေရာကို သွားဖို့ ကြိုးစားနေတာ၊ တံခါးက အလွန်ထူပြီး လေးလံတယ်၊ ဒါပေမဲ့ သူ မရောက်သွားနိုင်ခဲ့ဘူး။" ဟု သမ္မတက ဆိုသည်။ အဆောက်အအုံအတွင်း ဝင်ရောက်ပြီး ၅ မိနစ်ခန့်အကြာတွင် မာဒူရိုအား ဖမ်းဆီးရမိကြောင်း Delta Force က အစီရင်ခံခဲ့သည်။

 

မာဒူရိုက လက်နက်ချရန် ငြင်းဆန်ပါက ညှိနှိုင်းရန်အတွက် FBI ဓားစာခံညှိနှိုင်းရေးမှူးလည်း ပါဝင်ခဲ့သော်လည်း ညှိနှိုင်းမှုများမှာ မလိုအပ်ခဲ့ပေ။ ဒေသစံတော်ချိန် နံနက် ၄:၂၉ နာရီတွင် မာဒူရိုနှင့် ဇနီးကို ကာရစ်ဘီယံပင်လယ်ရှိ USS Iwo Jima စစ်သင်္ဘောသို့ ပို့ဆောင်ခဲ့သည်။ ထိုမှတစ်ဆင့် ဂွမ်တာနာမိုပင်လယ်အော်ရှိ အမေရိကန်ရေတပ်စခန်းသို့ ပို့ဆောင်ကာ၊ ထိုနေရာတွင် FBI က အသင့်စောင့်နေသော ၇၅၇ အစိုးရလေယာဉ်ဖြင့် မန်ဟက်တန်မြောက်ဘက်ရှိ စစ်ဘက်ထိန်းချုပ်ထားသော လေဆိပ်သို့ ခေါ်ဆောင်သွားခဲ့သည်။ သမ္မတထရမ့်သည် အထူးတပ်ဖွဲ့ဝင်များ ဗင်နီဇွဲလားမှ ထွက်ခွာသွားသည်အထိ စောင့်ကြည့်ခဲ့သည်။

 

သမ္မတထရမ့်က အမေရိကန်အနေဖြင့် ဗင်နီဇွဲလားအပေါ် ဒုတိယအကြိမ် တိုက်ခိုက်မှုများ ပြုလုပ်ရန် အသင့်ရှိသော်လည်း လိုအပ်မည်ဟု မထင်ကြောင်းနှင့် အခြားသော ဗင်နီဇွဲလားခေါင်းဆောင်များကိုလည်း အလားတူ လိုက်လံဖမ်းဆီးရန် ဝန်လေးမည်မဟုတ်ကြောင်း သတိပေးခဲ့သည်။

 

ကိုးကား - The New York Times

ပုံစာ - သမ္မတထရမ့် မျှဝေခဲ့သည့် ဖမ်းဆီးရမိထားသော နီကိုးလပ်စ် မာဒူရိုအား မျက်စိစည်းနှောင်ပြီး လက်ထိပ်ခတ်ထားသည့် ဓာတ်ပုံ။