နိုဝင်ဘာ ၉။

ရှမ်းပြည်နယ်မြောက်ပိုင်းအချက်အချာနေရာဖြစ်သည့် ကွမ်းလုံမြို့ကို တော်လှန်ရေးပူးပေါင်းတပ်များက ယနေ့ နိုဝင်ဘာ ၉ ရက် နေ့လယ်တွင် သိမ်းပိုက်လိုက်ကြောင်း MNDAA ထံမှ အတည်ပြုချက်ရသည်ဟု အမျိုးသား ညီညွတ်ရေး အစိုးရ၊ ကာကွယ်ရေးဝန်ကြီးဌာနကဆိုသည်။

 

စစ်ဆင်ရေးအမှတ် - ၁၀၂၇ စတင်ပြီးနောက် ကွမ်းလုံမြို့ကို ယခုလမှစတင်ကာ ကိုးကန့်တပ် MNDAA နှင့် မဟာမိတ်များက ထိုးစစ်ဆင်တိုက်ခိုက်နေခြင်းဖြစ်သည်။

 

မကြာသေးမီကလည်း ကွမ်းလုံမြို့တောင်ဘက်ရှိ ကံမိုင်းဒေသအခြေစိုက် ခြေလျင်တပ်ရင်း - (၁၄၃) မှ ဒုတပ်ရင်းမှူးအပါအဝင် အင်အား ၄၁ ဦးမှာ အောက်တိုဘာ ၃၀ ရက်က လက်နက်ချခဲ့သေးသည်။

 

ကွမ်းလုံမြို့မှာ သံလွင်မြစ်မြောက်ဘက်ခြမ်းရှိ ကိုးကန့် ဒေသတခုလုံးအား ထိန်းချုပ်နိုင်လောက်သည့်အထိ အရေးပါနေသည်။

 

ခရိုင်ရုံးစိုက်ရာမြို့ဖြစ်သည့် ကွမ်းလုံသည် ၁၉၇၁ နိုဝင်ဘာတွင် ဗမာပြည် ကွန်မြူနစ်ပါတီနှင့် စစ်တပ်အကြား တိုက်ပွဲအကြီးအကျယ်ဖြစ်ခဲ့ပြီး စစ်တပ်က” ကွမ်းလုံ ရက် ၄၀ “ တိုက်ပွဲဟု ဝါဒဖြန့်ပြောဆိုလေ့ရှိသည်။

 

တော်လှန်ရေးတပ်များ သိမ်းဆည်းထားသည့် မြို့များကို ပြန်လည်ထိန်းချုပ် နိုင်ပြီဟု စစ်ခေါင်းဆောင် ဗိုလ်ချုပ်မှူး ကြီးမင်းအောင်လှိုင်က ယမန်နေ့က နေပြည်တော်တွင် လုပ်သည့် ကာလုံအစည်းအဝေးတွင် ပြောခဲ့ပြီးနောက် ကွမ်းလုံမြို့ကို ထပ်မံစွန့်လွှတ်ရခြင်းဖြစ်သည်။

 

ပုံစာ - MOD ထုတ်ပြန်ချက် နှင့် ကွမ်းလုံတံတားပုံ ( လူမှုကွန်ရက် )

 

Burma Associated Press